[1] يَا أَخْوَانِي، كَانْ وَاحِدْ مِنْكُو وَقَعْ فِي ذَنِبْ، وَاجِبْ إِنْتُو الْقَوِيِّينْ بِقُدْرَةْ الرُّوحْ الْقُدُّوسْ تِخَطُّمُوا لَيَّهْ بِنَفَسْ بَارِدْ وَ تِقَبُّلُوهْ فِي الدَّرِبْ الْعَدِيلْ. وَ فَكُّرُوا لِنُفُوسْكُو أَشَانْ الذَّنِبْ مَا يِنَّصِرْ فَوْقكُو كُلَ.
[2] وَ فِي وَكِتْ التَّعَبْ، أَسَّاعَدُوا أَمْبَيْنَاتْكُو. وَ مِثِلْ دَا، تِطَبُّقُوا شُرُوطْ الْمَسِيحْ.
[3] وَ كَانْ نَادُمْ سَوَّى نَفْسَهْ عَالِي مِنْ أَخْوَانَهْ لَحَدِّي مَا يِسَاعِدْهُمْ، بِالصَّحِيحْ هُو مَا بِسَاوِي شَيْء وَ غَشَّ نَفْسَهْ.
[4] خَلِّي أَيِّ وَاحِدْ يِجَرِّبْ الْخِدْمَةْ الْهُو ذَاتَهْ يِسَوِّيهَا لِلرَّبّ وَ مِثِلْ دَا، هُو يَفْرَحْ مِنْ خِدِمْتَهْ وَ مَا يِشِيفْ خِدْمَةْ هَنَا نَادُمْ آخَرْ.
[5] أَشَانْ أَيِّ وَاحِدْ مَسْؤُولْ فِي نَفْسَهْ.
[6] كَانْ نَادُمْ قَاعِدْ يِعَلِّمْكُو كَلَامْ اللّٰهْ، وَاجِبْ تَنْطُوهْ مِنْ الْمَالْ الْعِنْدُكُو.
[7] مَا تُغُشُّوا نُفُوسْكُو. اللّٰهْ مَا بِنْغَشَّ. الشَّيْء النَّادُمْ يِتَيْربَهْ، دَا بَسْ الْيُقُمّ لَيَّهْ.
[8] كَانْ نَادُمْ يِتَابِعْ شَهْوَاتَهْ الْفَسْلِينْ، هُو يَلْقَى مِنْ شَهْوَاتَهْ الْهَلَاكْ. وَ كَانْ نَادُمْ يِتَابِعْ الرُّوحْ الْقُدُّوسْ، خَلَاصْ هُو يَلْقَى مِنْ الرُّوحْ الْقُدُّوسْ الْحَيَاةْ الْأَبَدِيَّةْ.
[9] أَشَانْ دَا، خَلِّي نِسَوُّوا الْخَيْر دَايْماً وَ أَبَداً مَا نَكْسَلُوا مِنَّهْ. بَعَدَيْن كَانْ مَا كِسِلْنَا، نَلْقَوْا مِنَّهْ فَايْدَةْ.
[10] وَ أَشَانْ دَا، فِي أَيِّ وَكِتْ عِنْدِنَا فُرْصَةْ، خَلِّي نِسَوُّوا الْخَيْر لِكُلَّ النَّاسْ وَ خَاصَّةً لِأَهَلْ الْإِيمَانْ.
[11] شِيفُوا الْحُرُوفْ الْكُبَارْ دَوْل. أَنَا شِلْت الْقَلَمْ وَ أَنَا ذَاتِي نَكْتِبْ الْكَلَامْ دَا.
[12] النَّاسْ الْيِدَوْرُوا يِسَوُّوا الطَّهُورَةْ فَرْض لَيْكُو، هُمَّنْ يِدَوْرُوا رِضَاءْ مِنْ النَّاسْ بَسْ. يِدَوْرُوا الْيَهُودْ مَا يِتَعُّبُوهُمْ بَتَّانْ بِسَبَبْ بِشَارَةْ مَوْت الْمَسِيحْ فِي الصَّلِيبْ.
[13] وَ النَّاسْ الْمُطَهَّرِينْ ذَاتْهُمْ مَا يِطَبُّقُوا كُلَّ شُرُوطْ التَّوْرَاةْ لَاكِنْ يِدَوْرُوا يِطَهُّرُوكُو أَشَانْ يِفَاشُرُوا لِلنَّاسْ بِجِلِدْكُو الْمُطَهَّرْ.
[14] وَ كَانْ لَيِّ أَنَا، أَبَداً مَا نِدَوْر نِفَاشِرْ لِلنَّاسْ بِأَيِّ شَيْء، إِلَّا بِصَلِيبْ هَنَا رَبِّنَا عِيسَى الْمَسِيحْ. وَ الصَّلِيبْ دَا كَتَلْ لَيِّ رِضَاءْ هَنَا نَاسْ الدُّنْيَا وَ بَيَّهْ أَنَا بِقِيتْ لِنَاسْ الدُّنْيَا مِثِلْ نَادُمْ مَيِّتْ.
[15] أَشَانْ كَانْ نَادُمْ مُطَهَّرْ وَلَّا مَا مُطَهَّرْ، دَا مَا بِسَوِّي شَيْء. الشَّيْء الْمُهِمّ، أَيِّ نَادُمْ وَاجِبْ يَدْخُلْ فِي الْحَيَاةْ الْجَدِيدَةْ.
[16] السَّلَامْ وَ الرَّحْمَةْ لِكُلَّ النَّاسْ الْيِتَابُعُوا الْوَصِيَّةْ دِي. هُمَّنْ بَسْ أُمَّةْ اللّٰهْ.
[17] خَلَاصْ، خَلِّي نَادُمْ وَاحِدْ مِنْكُو مَا يِبَشْطِنِّي بَتَّانْ أَشَانْ عِنْدِي أَلَمْ فِي جِلْدِي مِنْ زَعَلْ النَّاسْ وَ دِي الْعَلَامَةْ التِّوَصِّفْ أَنَا عَبِدْ هَنَا عِيسَى بِالصَّحِيحْ.
[18] يَا أَخْوَانِي عَلَيْكُمْ نِعْمَةْ رَبِّنَا عِيسَى الْمَسِيحْ. آمِينْ.