[1] جَوَابْ مِنِّي أَنَا بُولُسْ رَسُولْ هَنَا عِيسَى الْمَسِيحْ بِأَمُرْ هَنَا اللّٰهْ مُنَجِّينَا وَ الْمَسِيحْ عِيسَى الْعَشَمْنَا قَاعِدْ فَوْقَهْ.
[2] وَ نَكْتِبْ لَيْك إِنْتَ، يَا تِمُوتَاوُسْ، الْبِقِيتْ وِلَيْدِي الصَّحِيحْ بِالْإِيمَانْ. عَلَيْكُمْ السَّلَامْ وَ النِّعْمَةْ وَ الرَّحْمَةْ مِنْ اللّٰهْ أَبُونَا وَ عِيسَى الْمَسِيحْ رَبِّنَا.
[3] نُقُولْ لَيْك نَفْس الْكَلَامْ الْقُلْتَهْ لَيْك وَكِتْ خَلَّيْتَكْ وَ سَافَرْت فِي بَلَدْ مَقِدُونِيَةْ. وَاجِبْ تَقْعُدْ فِي حِلَّةْ أَفَسُسْ أَشَانْ تِوَصِّيهُمْ لِلنَّاسْ الْقَاعِدِينْ يِشَتُّتُوا التَّعْلِيمْ الْمَا صَحِيحْ. آمُرْهُمْ أَشَانْ يِخَلُّوا مِنْهُمْ الْكَلَامْ دَا.
[4] قُولْ لَيْهُمْ وَاجِبْ مَا يُخُطُّوا بَالْهُمْ بَتَّانْ فِي قِصَصْ بَاطْلِينْ وَ لَا فِي الْقُرَمْ الطُّوَالْ بِلْحَيْن دَوْل. الْكَلَامْ الْمِثِلْ دَا يِسَبِّبْ الْمُنَاقِشَاتْ الْمَا عِنْدَهُمْ فَايْدَةْ وَ مَا يِلِمُّوا مَعَ الشَّيْء الْاللّٰهْ يِدَوْر يِسَوِّيهْ فِي النَّاسْ. دَرِبْ اللّٰهْ هُو بِالْإِيمَانْ.
[5] و أَنْطَيْتَكْ الْوَصِيَّةْ دِي أَشَانْ نِدَوْر هُمَّنْ يِعِيشُوا بِالْمَحَبَّةْ الْجَايَةْ مِنْ قَلِبْ طَاهِرْ وَ ضَمِيرْ صَافِي وَ إِيمَانْ مُخْلِصْ.
[6] نَاسْ وَاحِدِينْ خَلَّوْا مِنْهُمْ الْأَشْيَاءْ الْعَدِيلِينْ دَوْل وَ دَخَلَوْا فِي مُنَاقَشَاتْ هَنَا كَلَامْ بَاطِلْ.
[7] يِدَوْرُوا يِسَوُّوا نُفُوسْهُمْ مُعَلِّمِينْ فِي التَّوْرَاةْ لَاكِنْ مَا فِهْمَوْا الشَّيْء الْقَاعِدِينْ يِحَجُّوا بَيَّهْ وَ لَا الْكَلَامْ الْمُنْكَرِبِينْ فَوْقَهْ.
[8] وَ أَنِحْنَ نَعَرْفُوا كَلَامْ التَّوْرَاةْ هُو عَدِيلْ كَانْ نِعَلُّمُوهْ بِدَرْبَهْ.
[9] وَاجِبْ نَفْهَمَوْا كَدَرْ اللّٰهْ أَنْطَى شُرُوطْ التَّوْرَاةْ مَا فِي شَانْ الصَّالِحِينْ لَاكِنْ فِي شَانْ الْمُجْرِمِينْ وَ الْعَاصِيِّينْ وَ فِي شَانْ الْكُفَّارْ وَ الْمُذْنِبِينْ وَ فِي شَانْ النَّاسْ النُّجُوسْ وَ الْبَكْرَهَوْا الدِّينْ وَ فِي شَانْ النَّاسْ الْيَكْتُلُوا أَبَّهَاتْهُمْ وَ النَّاسْ الْيَكْتُلُوا أَمَّهَاتْهُمْ وَ فِي شَانْ كُلَّ كَتَّالِينْ الدِّمَمْ.
[10] وَ شُرُوطْ التَّوْرَاةْ هُمَّنْ فِي شَانْ الزَّنَّايِينْ وَ الشَّمَارِيخْ وَ تُجَّارْ الْعَبِيدْ وَ الْكَدَّابِينْ وَ الْيَحْلُفُوا بِالْبَاطِلْ وَ فِي شَانْ كُلَّ النَّاسْ الْيِسَوُّوا أَيِّ شَيْء آخَرْ الْيِخَالِفْ التَّعْلِيمْ الْعَدِيلْ.
[11] وَ التَّعْلِيمْ هُو عَدِيلْ كَانْ يِوَافِقْ مَعَ الْبِشَارَةْ الْاللّٰهْ كَلَّفَانِي بَيْهَا أَشَانْ نِبَلِّغْهَا وَ هِي الْبِشَارَةْ الْمَجِيدَةْ الْمِنْ اللّٰهْ الْوَاجِبْ لَيَّهْ الشُّكُرْ.
[12] وَ أَنَا نَشْكُرْ كَتِيرْ رَبِّنَا عِيسَى الْمَسِيحْ الْأَنْطَانِي الْقُدْرَةْ الْبَيْهَا نِسَوِّي الْخِدْمَةْ دِيْ. نَشْكُرَهْ أَشَانْ هُو جَعَلَانِي نَادُمْ أَمِينْ وَ إِخْتَارَانِي أَشَانْ نَخْدِمْ لَيَّهْ.
[13] وَ دَا عَجِيبْ أَشَانْ أَوَّلْ أَنَا كَافِرْ بَيَّهْ وَ قَاعِدْ نِتَعِّبْ نَاسَهْ وَ أَنَا قَدُّومِي مُرّ مَرَّةْ وَاحِدْ. لَاكِنْ الرَّبّ رَحَمَانِي أَشَانْ سَوَّيْت الذُّنُوبْ دَوْل وَكِتْ لِسَّاعْنِي مَا عِرِفْت الْحَقّ وَ مَا عِنْدِي إِيمَانْ.
[14] وَ رَبِّنَا أَنْطَانِي نِعْمَةْ كَبِيرَةْ بِلْحَيْن وَ أَنْطَانِي الْإِيمَانْ وَ الْمَحَبَّةْ الْقَاعِدِينْ فِي الْمَسِيحْ عِيسَى.
[15] نُقُولُوا الْمَسِيحْ جَاءْ فِي الدُّنْيَا أَشَانْ يِنَجِّي الْمُذْنِبِينْ وَ الْكَلَامْ دَا حَقّ وَ وَاجِبْ لِكُلَّ النَّاسْ يِصَدُّقُوا بَيَّهْ. وَ أَنَا أَذَنَبْت فَوْقَهْ زِيَادَةْ مِنْ كُلَّ النَّاسْ.
[16] وَ لَاكِنْ دَاهُو السَّبَبْ الرَّبِّنَا رَحَمَانِي. أَنَا الْمُذْنِبْ الْأَكْبَرْ وَ لَاكِنْ الْمَسِيحْ عِيسَى وَصَّفْ فَوْقِي صَبْرَهْ الْعَظِيمْ وَ سَوَّانِي مَثَلْ وَاضِحْ لِكُلَّ النَّاسْ الْيِآمُنُوا بَيَّهْ وَ يَلْقَوْا الْحَيَاةْ الْأَبَدِيَّةْ.
[17] وَ الْحَمَدْ وَ الْإِكْرَامْ لِلّٰهْ إِلَى الْأَبَدْ. هُو بَسْ الْمَلِكْ الدَّايِمْ الْأَبَداً مَا يُمُوتْ وَ لَا يِنْشَافْ، اللّٰهْ الْوَاحِدْ. آمِينْ.
[18] يَا وِلَيْدِي تِمُوتَاوُسْ، الْوَصِيَّةْ الأَنْطَيْتهَا لَيْك تِوَافِقْ مَعَ الْكَلَامْ الْاللّٰهْ قَالَهْ وَكِتْ هُو حَجَّى بَيْك بِخُشُومْ الشُّيُوخْ. فَكِّرْ فَوْقَهْ وَ جَاهِدْ بَيَّهْ جِهَادْ عَدِيلْ.
[19] أَكْرُبْ الْإِيمَانْ قَوِي وَ سَوِّي كُلَّ شَيْء بِنِيَّةْ مُخْلِصَةْ. نَاسْ وَاحِدِينْ خَلَّوْا مِنْهُمْ النِّيَّةْ الْمُخْلِصَةْ وَ أَشَانْ دَا، تَلَّفَوْا إِيمَانْهُمْ مَرَّةْ وَاحِدْ.
[20] وَ مِنْهُمْ هَمَانِي وَ إِسْكَنْدَرْ وَ أَنَا سَلَّمْتُهُمْ لِلشَّيْطَانْ أَشَانْ يَعَرْفُوا وَاجِبْ مَا يِحَجُّوا بَتَّانْ ضَدّ اللّٰهْ.