[1] وَ آخَرْ شَيْء يَا أَخْوَانَّا، أَسْأَلَوْا لَيْنَا اللّٰهْ أَشَانْ كَلَامْ الرَّبّ يِشَتِّتْ عَجَلَةْ فِي النَّاسْ وَ يِكَرُّمُوهْ مِثِلْ إِنْتُو كَرَّمْتُوهْ.
[2] وَ أَسْأَلَوْا اللّٰهْ أَشَانْ يِنَجِّينَا مِنْ النَّاسْ الشَّرِيرِينْ وَ الْفَسْلِينْ. أَكِيدْ مَا كُلَّ النَّاسْ يِآمُنُوا.
[3] لَاكِنْ رَبِّنَا هُو صَادِقْ وَ هُو يِقَوِّيكُو وَ يَحْفَضْكُو مِنْ الشَّرِيرْ.
[4] وَ فِي الشَّيْء الْبُخُصُّكُو إِنْتُو، رَبِّنَا أَنْطَانَا ضَمَانْ وَ عِرِفْنَا كَدَرْ إِنْتُو قَاعِدِينْ تِتَابُعُوا وَصَايَانَا وَ مَا تِخَلُّوهُمْ مِنْكُو.
[5] خَلِّي الرَّبّ يُخُطّ قُلُوبْكُو فِي مَحَبَّةْ اللّٰهْ وَ يَنْطِيكُو صَبُرْ الْمَسِيحْ الْقَوِي.
[6] وَ بَتَّانْ يَا أَخْوَانَّا، نِوَصُّوكُو بِأُسُمْ الرَّبّ عِيسَى الْمَسِيحْ. أَنْقَرْعُوا مِنْ الْمُؤْمِنِينْ الدَّايْماً عَاطِلِينْ وَ مَا يِتَابُعُوا التَّعْلِيمْ الْعَلَّمْتُوهْ مِنِّنَا.
[7] أَشَانْ إِنْتُو ذَاتْكُو تَعَرْفُوا كَدَرْ وَاجِبْ تِسَوُّوا مِثِلْ أَنِحْنَ سَوَّيْنَا. وَكِتْ أَنِحْنَ قَاعِدِينْ مَعَاكُو شِفْتُوا أَنِحْنَ مَا عَاطِلِينْ.
[8] مَا أَكَلْنَا أَكِلْ هَنَا أَيِّ نَادُمْ سَاكِتْ. تِعِبْنَا وَ خَدَمْنَا بِدُرَاعْنَا لَيْل وَ نَهَارْ أَشَانْ مَا نِكَلُّفُوا نَادُمْ مِنْكُو.
[9] وَ سَوَّيْنَا مِثِلْ دَا مَا أَشَانْ مَا عِنْدِنَا حَقّ نَطْلْبُوا مِنْكُو شَيْء، لَاكِنْ أَشَانْ نَبْقَوْا لَيْكُو مَثَلْ التِّتَابُعُوهْ.
[10] وَ وَكِتْ أَنِحْنَ قَاعِدِينْ مَعَاكُو، وَصَّيْنَاكُو قُلْنَا كَانْ نَادُمْ مَا يِدَوْر يَخْدِمْ، خَلِّي يَابَى الْأَكِلْ كُلَ.
[11] وَ سِمِعْنَا خَبَرْ بُقُولْ وَاحِدِينْ مِنْكُو أَبَوْا الْخِدْمَةْ وَ قَاعِدِينْ يِنْدَسَّوْا فِي شُؤُونْ النَّاسْ.
[12] النَّاسْ الْمِثِلْ دَوْل نَطْلْبُوا مِنْهُمْ وَ نَامُرُوهُمْ بِأُسُمْ رَبِّنَا عِيسَى الْمَسِيحْ أَشَانْ يَخْدُمُوا بِالسَّلَامْ وَ يَكْسَبَوْا رِزِقْهُمْ.
[13] يَا أَخْوَانَّا سَوُّوا دَايْماً الْخَيْر وَ أَبَداً مَا تَكْسَلَوْا مِنَّهْ.
[14] أَوْرُوا كُلَّ الْأَخْوَانْ أَيِّ نَادُمْ الْمَا يِتَابِعْ الْكَلَامْ الْقُلْنَاهْ فِي الْجَوَابْ دَا، أَقْطَعَوْا الْعَلَاقَةْ مَعَايَهْ أَشَانْ تِعَيُّبُوهْ.
[15] مَا تَحْسُبُوهْ عَدُوكُو لَاكِنْ حَذُّرُوهْ أَشَانْ هُو أَخُوكُو.
[16] وَ هَسَّعْ خَلِّي رَبّ السَّلَامْ ذَاتَهْ يَنْطِيكُو السَّلَامْ فِي كُلَّ وَكِتْ وَ فِي كُلَّ شَيْء. الرَّبّ مَعَاكُو كُلُّكُو.
[17] أَنَا بُولُسْ شِلْت الْقَلَمْ في إِيدِي وَ قَاعِدْ نَكْتِبْ السَّلَامْ دَا. دِي بَسْ الْعَلَامَةْ فِي أَيِّ جَوَابْ الْأَنَا نَكْتِبَهْ. دِي بَسْ كِتَابْتِي
[18] عَلَيْكُو كُلُّكُو نِعْمَةْ رَبِّنَا عِيسَى الْمَسِيحْ.