[1] وَ بِكَلَامْ وَاضِحْ، الرُّوحْ الْقُدُّوسْ يُقُولْ كَدَرْ فِي الزَّمَنْ الْأَخِيرْ نَاسْ وَاحِدِينْ يُمُرْقُوا مِنْ دَرِبْ الْإِيمَانْ. و يِتَابُعُوا دَرِبْ الشَّوَاطِينْ الْيِوَدُّرُوهُمْ وَ يَسْمَعَوْا تَعْلِيمْ شَيْطَانِي.
[2] وَ النَّاسْ الْيِشَتُّتُوا التَّعْلِيمْ دَوْل مُنَافِقِينْ وَ كَدَّابِينْ قُلُوبْهُمْ مَيْتِينْ.
[3] يَدْحَرَوْا النَّاسْ مِنْ الْأَخِيدَةْ وَ يِحَرُّمُوا لِلنَّاسْ أَشْيَاءْ وَاحِدِينْ مِنْ الْأَكِلْ. وَ لَاكِنْ الْأَكِلْ دَا، اللّٰهْ خَلَقَهْ أَشَانْ النَّاسْ الْمُؤْمِنِينْ وَ يَعَرْفُوا الْحَقّ يَقْبَلَوْه بِشُكُرْ.
[4] أَيْوَى، كُلَّ شَيْء الْاللّٰهْ خَلَقَهْ سَمَحْ وَ مَا فِي شَيْء مَكْرُوهْ كَانْ نَاكُلُوهْ بِشُكُرْ.
[5] أَشَانْ الْأَكِلْ يَبْقَى طَاهِرْ بِكَلَامْ اللّٰهْ وَ دُعَاءْ هَنَا الشُكُرْ.
[6] كَانْ تِعَلِّمْ الْأَخْوَانْ الْوَصَايَا دَوْل، تَبْقَى خَدَّامْ عَدِيلْ لِلْمَسِيحْ عِيسَى. وَ كَلَامْ الْإِيمَانْ وَ التَّعْلِيمْ الْعَدِيلْ التِّتَابِعَهْ دَا، يَبْقَى لَيْك مِثِلْ أَكِلْ الْيَنْطِيكْ قُدْرَةْ.
[7] أَنْقَرِعْ مَرَّةْ وَاحِدْ مِنْ الْقِصَصْ الْبَاطْلِينْ وَ الْكَلَامْ الْمِثِلْ كَلَامْ الْعَجَايِزْ الْخَرْفَانَاتْ. دَرِّبْ نَفْسَكْ أَشَانْ تَبْقَى نَادُمْ تَقِي.
[8] صَحِيحْ الرِّيَاضَةْ عِنْدَهَا فَايْدَةْ لَاكِنْ التَّقْوَى فَايْدِتْهَا زِيَادَةْ مِنْ كُلَّ شَيْء وَ نَلْقَوْا مِنْهَا، فِي الدُّنْيَا وَ فِي الْآخِرَةْ، الْحَيَاةْ الْاللّٰهْ وَاعَدْنَا بَيْهَا.
[9] الْكَلَامْ دَا حَقّ وَ وَاجِبْ كُلَّ النَّاسْ يِصَدُّقُوا بَيَّهْ.
[10] فِي السَّبَبْ الْوَعَدْ دَا، نَتْعَبَوْا و نِجَاهُدُوا. خَطَّيْنَا عَشَمْنَا ثَابِتْ فَوْق اللّٰهْ الْحَيّ الْهُو بَسْ مُنَجِّي هَنَا كُلَّ النَّاسْ خَاصَّةً الْمُؤْمِنِينْ.
[11] آمُرْهُمْ لِلنَّاسْ أَشَانْ يِتَابُعُوا الْكَلَامْ دَا وَ عَلِّمْهُمْ لَيَّهْ.
[12] مَا تِخَلِّي نَادُمْ يَحْقِرَكْ بِسَبَبْ عُمْرَكْ الصَّغَيَّرْ. سَوِّي نَفْسَكْ مَثَلْ لِلْمُؤْمِنِينْ فِي كَلَامَكْ وَ حَالَكْ. خَلِّي يِشِيفُوا فَوْقَكْ الْمَحَبَّةْ وَ الْإِيمَانْ وَ الطِّهَارَةْ.
[13] لَحَدِّي نَجِيكْ، أَنْكَرِبْ فِي قِرَايَةْ كِتَابْ اللّٰهْ لِلنَّاسْ وَ مَا تِخَلِّي مِنَّكْ الْبَشِّرِينْ وَ الْعَلِّمِينْ.
[14] خُطّ بَالَكْ فِي الْبَرَكَةْ الْاللّٰهْ أَنْطَاهَا لَيْك بِالْكَلَامْ النَّازِلْ مِنْ اللّٰهْ وَكِتْ جَمَاعَةْ الشُّيُوخْ خَطَّوْا إِيدَيْنهُمْ فَوْقَكْ.
[15] أَنْكَرِبْ فَوْق الْوَاجْبَاتْ دَوْل وَ جَاهِدْ فِي شَانْهُمْ أَشَانْ كُلَّ النَّاسْ يِشِيفُوا نَجَاحَكْ.
[16] خُطّ بَالَكْ فِي نَفْسَكْ وَ فِي تَعْلِيمَكْ لِلنَّاسْ. أَنْكَرِبْ فَوْقَهْ وَ بِمِثِلْ دَا، تِنَجِّي نَفْسَكْ وَ تِنَجِّي النَّاسْ الْيَسْمَعَوْا كَلَامَكْ.