[1] Atinhi kamurree, alleya bal! Jeenteti sinati atin isoosahattuu, weyti ooya toro la uuwwicha.
[2] Kamurroonkiin a suusahe, gaaddiinti hahhaaggan la riirime a tuhum.
[3] 'Dahabiin ichoow lahaagtiin kuuttu a gele, ibeenki enenyet lahukkumo ka la, kuuttuhaas a atin cheekta, toro i'di 'dab u sartiin a yaham. Waha a ibeenneti 'da'ddaboote, atin la kamurroonkiin weyti meel gessatteen.
[4] Yeya, ilbooyyeti gosashiin ka gurnaan gurto chilimmeticho ma gutine, chilimmeticho a atin kooyta. Toro la oytinti 'doo'di gurnaan guro nabahti Kamureenki Miig Tuumman Leh a eleesse.
[5] Jiroti atin harrata ka jirteen a ti atin wihi atin 'doonteen tuumman khabteene, toro la hamadiinna on yowatteen. Atin wihi uurassiin 'doonaan tuumman a dargisseen, i'daasenyi ibeenki Waakh enenyet hukkumo ma kasin.
[6] Atin 'doo'di fiffissane atin itirrimine uskeel igoosseene toro dubunuunu bakkisseen.
[7] Maantaka 'doo'd Kiriistokaaw, 'doo'di samacchaare ateeha ichoowka Kamur a soonokhti. Saggi eti gos leh gosiiski gurnaanki haaggan bahcho isugo yeya. Us a samacchaara one ichoowka hiri oraat ichoow ki 'da'ddaboot 'deyaan.
[8] Atin laka 'doo'di samacchaare ateeha, mujjum tolossada i'di tahe ibeenki Kamur soonokhti a soodowwaatee.
[9] 'Doo'd Kiriistokaaw, taba iiskaannyuwina, uus Waakh uskeel atin igoonne. Waakkhi enenyet hukkumo min khariissa sootoolla.
[10] 'Doo'd Kiriistokaaw, 'doo'di iyookkoti haaggane geeddi sinayyo lakawaariche samacchaar fiddiye, a 'doo'di goorat Kamur iyeyyeedo.
[11] Saggi atin igarattaan u, inno 'doo'di sinayyo lakawaariche garrahsate 'doo'di Waakh imaale iekkaanna. Atin saggi Ayuub igarrahsate ichoow wihi Kamur yomboka iyeele a daagteen. Waakh weyti uur nugulyahe, toro la enenyet a isoonaha.
[12] 'Doo'd Kiriistokaaw walah tuumman 'dirihicho ka, taba adaatanna, goobi Waakh ommos harrata ommos wohoo addan akadaatanna. “Aa” ti atin tadeehiin, “Aa” a titaahe. “Mele” ti atin tadeehiin la “Mele,” a titaahe. I'da ka Waakh sina ma atin ikeeno.
[13] Etoo goytiin ka sina khaba? Waakh on a wahti. Etoo goytiin ka a hamaada? Waakh a saa'do.
[14] Etoo goytiin ka a khannanyahe? Ewweenki urur Kiriisto woyo a waho, a iweesti, magahi Kamur ka subah ka matah a subho.
[15] Weysihi saggi Waakh eta khannan isamaacho lakakhuufo la eti khannan a samaachaan. Kamur la etaas ilaali us kajiifo a kasookahcha. Chu'us uskeel yeele la, Kamur uskeel a ikakuta.
[16] Maantaka uskeeli atin isiyeesseen isicheekda, toro la isiweesda, 'dee Waakh a atin samaacho. Weysihi eti fissan weyti miig a khabaane toro la wihi buurenye yeelaan.
[17] Eliiya weeli enenyete i'deene on eheete, weyti Waakh wahte, hiri ilaas i'deyin daahe, gu'h seyyah ichoow nyuus la hir 'deye mele.
[18] Toro Waakhe wahte, serey ka hir soo'deye, harra la gurnaan bihisse.
[19] 'Doo'd Kiriistokaaw, chi' etoo goytiin ka jiti rummaat kabaabe, etoo addan la soohosse,
[20] waha kasoo'hela, eti etoo addane uskeel yeelo uskeeliis kasoolaabe, rubeyti etaas omootti armaanjireene kasoohossa, Waakh la uskeeli buurenye eti kootteet yeelo a ikakuta.