[1] Khadaaba eti atin isoochiiro, a ani Beeterohi ergaano Yeesso Kiriistee. 'Doo'di an isoochiiro la a 'doo'di Waakh soobahsate, harrata ka i'di 'doo'di yeelan ijiro, boroofenhi Boontus ichoow ki Galaatiya ichoow ki Kabadookiya ichoow ki Aassiya ichoow ki Bi'duuniya tuumman kataasan.
[2] Soobahsanaanki Waakkhi Aabbaheene atin soobahsate ichoow wihi 'hor us garte a israahaan. Toro us a atin soobahsate hili Rubeyti Munyee ka atin munyaache, 'dee Yeesso Kiriisto aytiis raahtaane diiggiis ka atin lakadikha. Waakh ba tuum atin imaala nebey tuum atin kakaala.
[3] Waakkhi Aabba Yeesso Kiriistohi Kamureene koolinno. Us uurnugleeliiski buure on ka, jirotoo husube inno khajjeello a inno siiche. Jiti us waha kayeele la, a Yeesso Kiriistohi us omoot kasookahche.
[4] Toro la jirota husub ka Waakh wihi inno mu'dane jirtuu ituumine, eloo rucchul laka ikhabine, iraagin goobi Waakh ka meel a inno igessa.
[5] Kakhuufnaanki inno Waakh kakhuufno ka, Waakh miigtiis ka a inno toorriba, ichoowka ribnaankaas 'hella. Waha la ibeenki 'da'ddaboote 'dow liisoobahcha.
[6] Wahaas tuumman ka weyti hamaada on. I'daasenyi toolla geeddoor sinayyohi fil ittaawenye bolokh atin ikeeno kolossoo a atin kawaaraan.
[7] Sinayyoha a atin isoobaheene kakhuufnaanki atin Waakh kakhuuftaan kajaane, 'dee saggi us ki rummaat iyahe toro eloo rucchul laka ikhabin tusaan. Kakhuufnaanka Waakh lakakhuufo gatoti 'dahab laka a kussanyahe. A mehe 'dahabi kheerowo laka 'dabe lakakaja toro la 'dabe dikha. Maanti Yeesso Kiriisto harra tuumman liisoobabbakkaahicho ka kakhuufnaankiin koolo ichoow weynaan ichoow inkaanyiti buure 'hela.
[8] Atin usu injire ma argine, eheetteey laka, usu a 'doontaan. Atin usu toolla ma agartaane, eheetteey laka, usu a rummeysattaane toro la hamaadi etoo cheekin iubaa'dane toro weyti buurenye khabtaan,
[9] a mehe rubeyohiin a laribe. Wahaase Yeesso Kiriisto ikakhuufteen.
[10] Wori ribnaanka miinsan la 'doo'di Waákh íyeyyeedo wihiis weyti yowte toro la mujjum hiisteen. Icho la haaggi Waakhe buurenye inno imunneynane atin iyamiit a cheekeen.
[11] 'Doo'da Waákh íyeyyeedo Rubey Kiriistoti goycho kijirto icho et ichoow maan tusso iche aban 'dooneen. Rubey Kiriisto la wahanyeyyoha saggi Kiriisto sina liikawaaricho yomboka liiweynaacho miinsan orey on cheekte.
[12] Wihi liisoobabbakkaahiche a mehe ya icho ma isihiline, i'daasenyi atine atin ihileen maanti icho wahanyeyyohi geeddi icho noolyahiin iitaahane gu'hassi ittaawenye yombo sooraaho sooyateeh kaayyeedeen. Toolla la 'doo'di Wori Haaggane miigti Rubeyti Munyeenye goobi Waakh lakasooergo cheeko ka, wahanyeyyoha a atin liisoocheeke. Herti Waakh laka ichehi wahanyeyyohaas agarto imoonta.
[13] Maantaka maliin hil itannabicha, isjeycha, haaggi Waakhe buurenye maanti Yeesso Kiriisto atin liisoobabbakkaahicho atin lasiicho tuum khajjeel kakhaba.
[14] I'di nyaakhuti yeed daaguu, suujoonki liimoono maanti atin wohoo igaran atin khabteen iinokhanna.
[15] I'daasenyi saggi eti atin wahe munya iyahuu, atin laka wihi atin yeessaan tuumman ka munya ateeha.
[16] A mehe wihi chiiran, “Munya ateeha, an a munyaa.”
[17] Atin Waakkhi Aabbaheenenye enenyet seley isassaahine ebba wihi us yeelo on ka hukkumo wahattaan gone, taba geeddi atin harrata ka jirtaan tuumman usu inkaanyita.
[18] I'di tahe a garattaane, jiroti ilmarhaatteete atin aacchinyetiin ka'hesseen, wahanyeyyohi suujowo i'di maanta lahaag ommos 'dahab mee lagute atin lafure.
[19] I'daasenyi diig Yeesso Kiriistoki lagane i'di heleenki mi'dabenye eloo rucchul laka ikhabine lagute.
[20] Geeddi harra liisoouumin on usu lasoobahche, i'daasenyi iroonotiin u ibeenneta 'da'ddaboote lasoobabbakkaahiche.
[21] Usu ka atin Waakkhi usu omoot kasookahche toro la weynaache a rummeysatteene, 'dee Waakh on kakhuuftaane, toro la usu on khajjeel kakhabtaan.
[22] Toolla runti atin raahtaan ka a isdikhteene 'dee 'doo'di Kiriisto rummeeste 'dooninti rummaat ikhabtaan gone, taba gi'de uurassiin ka weyti is'doona.
[23] A mehe toro a delatteen. Delmaattiin ilinti suujowto ma kiimaataane i'daasenyi ilinti jirtuu tuumman ituumine leetimiy. Waha la a Yeedi Waakhe jiro khabo toro jirtuu tuumman ituumin.
[24] A mehe i'di Chiirnaanneti Waakh tadeeh u, “Weeli enenyet tuumman a i'di hoose, weynaantiis tuumman la a i'di fiikheet. Hoos a angaga fiikhe la a khubatta.
[25] I'daasenyi Yeedi Kamur jirtuu tuumman a jira.” Yeeda la a Wori Haaggane atin liicheeke.