[1] Waha kamalda bal, mehe jihit ichoow jaakh goytiin keena? Wihi suujenye uurassiin goyaka isdiho menya kayamiitiin?
[2] Atin wohoo weyti 'doontaane, i'daasenyi ma 'hessaan. Enenyet dubunuunu tagiisiine toro walah maanjeerattaane, i'daasenyi walah ma 'hessaan. A isleejaakhtaane toro la isjahtaan. Walah ma 'hessaan, a mehe Waakh walah ma daahtaanee.
[3] Walah a daahtaane ma 'hessaan, a mehe atin uuri suujenye kadaahtaane, 'dee wahaas awtiinna on hamaadichaan.
[4] Atinha waakkhassi addan wahattaan, saggi eti wahanyeyyohi harratane sussuuje aal kabahsate Waakh i'dii'ddanyahe ma garattaan a? Eti wahanyeyyohi harratane sussuuje aal kabahsan goosti chiiytanki Waakhe iskayeela.
[5] Ommos Chiirnaanneti Waakhe, “Rubeyti Waakh goyteen gesse inaafe leetahe,” elatti a immarah on a?
[6] I'daasenyi Waakh haaggiiski buurenye us inno siicho a kakhayma. Jeentetaase Chiirnaanneti Waakh mehe itadeeh ya, “Waakh eti eylajo a 'dii'ddanyahe, i'daasenyi eti isnuglaacho haaggiiski buurenye siicha.”
[7] 'Deerka Waakh afiis akutina. Seytaan iskahossa, ulla a atin kafirdaa.
[8] Waakh isoodowwaada gi'de ulla a atin isoodowwaataa. Atinha uskeel leh, dahanohiin uskeeli atin yeesseen ka dikha. Atinha uurlammaal khabattaan, uurassiin dikha.
[9] Taba, ilmo khuba, ooya toro uuwwicha. Reyati atin reyattaan urgiyicha oytim kayeela, hamaadi atin khabtaan la urgiyicha fooli atin ribowo kayeela.
[10] Kamur ortiis ka isnuglaacha, ulla a atin okkhichaa.
[11] 'Doo'd Kiriistokaaw, taba iishamanna. Eti tuummane etoo koo Kiriistee hayhayo ommos hukkumo a i'doo us amurreti Waakh hanti toro hayhayo. Geedda atin amurreti Waakh hukkuntaan, amurre ma raahtaane, geeddaase iche amurre fit tahe ichoow ichehuus goossaan.
[12] Waakkhoo kalday on amurre enenyet siicha toro enenyet hukkuma. Usu kalday on enenyet ribin yabuu'de toro baabiicha. I'daasenyi atin a ayyo, atinhi ollokkiin hukkuntaan?
[13] Alleya bal atinhi, “Maalinka ommos saahta ilkerengeetta ommos ilkerengeettuus a iranna, gu'hoo fiddiina, bacchaaranna, chilimmeteenyo dessa,” elattaan!
[14] Ya? Wihi saahta yateeh laka ma garattaan! Jirotiin a mehe? Atin a i'di 'duubathi geeddoo rucchul on laargo, toro baabo.
[15] Wihi deefo a atinhi, “Chi' Waakh 'doono a jirra, waha ichoow wahaas yeella,” tadeehiin.
[16] I'daasenyi atin rannyaat ka a eylajjaan. Eylajaas tuumman a uskeel.
[17] Maantaka eti tuummane haaggi imale us yeelo garti toro iyeelin, uskeele yeela.