[1] 'Doo'd Kiriistokaaw, atin Yeesso Kiriistohi Kamureenenye toro weynaan tuumman leh a rummeysatteen gone, taba enenyet seley asassaahina.
[2] Eemba a kulanteene etoo gaaddi weyti gato miige khabo, lahaagti 'dahab far kakhabo soogel. Toro etoo addane miskiinenye, gaaddi 'debbeysatte khabo soogel.
[3] Kolossoo eti kamure inkaanyit ka soodowwaassaane, mehe itadeehiin ya, “Komborta haaggan koorrommo,” i'daasenyi ki miskiine mehe itadeehiin ya, “Intuus tolosso,” ommos, “Il orrommo.”
[4] I'daakka atin enenyet seley ma sassaahine toro la mali suuje ka enenyet ma hukkumin a?
[5] 'Doo'd Kiriistokaaw, waha daaga bal, Waakh 'doo'di harrata ka miskiin liiekkaacho ma soobahsanne, 'dee kakhuufnaanki icho Yeesso kakhuufaan ka Waakh icho kamurre ma iekkaanna? Toro la Waakh 'doo'da ma soobahsanne 'dee dakhi Waakhe Waakh 'doo'di usu 'doono iayyiche ma mu'dan a?
[6] I'daasenyi atin miskiino lakhaanyo a kadowteen. Kamurre menya sina atin kawaarisso? Toro la icho menya kootiin atin geesso?
[7] Kamurre menya magah Yeesso Kiriistoki liinkaanyito atin lakawaho igafto?
[8] Chirri atin rumanka amuri weyti khummane Yeessohi karnateene inno siiche, Chiirnaanneti Waakh goya kachiirane, “Ollokkaah geeddi at is'doonto 'doon,” yadeeh raahtaan, haage yeessaan.
[9] I'daasenyi chirri atin enenyet seley sassaahtaan, atin uskeele yeessaane toro amurreti Waakh a jebisseen.
[10] I'di tahe eti amurreti Waakh tuumman raaho i'daasenyi aytoo kalday katarraantarrate, sinati eti amurre tuumman jebcho liigoocha.
[11] A mehe Waakkhi, “Makhaabali kaah ieheynan ommos makhaabassi taah ieheynan aleeur'din,” yidah on, “Weeli enenyet dubunuunu iigaasan,” laka yidah. Chirri at makhaabali kaah ieheynan ommos makhaabassi taah ieheynan ileeur'dine, i'daasenyi at enenyet dubunuunu tagiis, at amurreti Waakh a jebissa.
[12] Taba saggi 'doo'di Waakh amurretaas enenyet furto dowwanoha ka kahukkumo iyeyyeeda toro la ijira.
[13] I'di tahe eti 'doo'di addan uur ikanugleysan, Waakh maanti us 'doo'd hukkumo laka usu uur ma inugleesti. I'daasenyi, eti 'doo'di addan uur inugleesti maanti lahukkumo, walah us karooro mele.
[14] 'Doo'd Kiriistokaaw, chi' etoo, Yeesso a kakhuufa essi, i'daasenyi wihi us yeelo usu rumanka Yeesso kakhuufe itusin, haaggoh ibahta? Kakhuufnaanki i'daase usu ribaayi?
[15] Eemba etoo koo Kiriisteenye gaad laaye toro la gololi maan dakkhan ikhabine jira.
[16] Chirri etiinko etaas, “Nyaam nebey leeiro, roffo iskajeyiche toro mujjum golosso,” idowo i'daasenyi wihi us 'doono ka igargaarin, haaggoh ibahta?
[17] Saggaas on u kakhuufnaanki Yeesso Kiriisto lakakhuufo i'daasenyi haag liiyeelin, kakhuufnaankaas a yumuy.
[18] I'daasenyi etoo mehe yadeeh ya, “Eemba at Kiriisto a kakhuufta, ani la haage yeela.” Wihi an etaas ilaabo a mehe ya, “Bal saggi at Kiriisto on ikakhuufto toro la haag iyeelin itus. Ani la haaggi an yeelo ka saggi an Kiriisto ikakhuufo a kitusaa.”
[19] Saggi Waakkhoo kalday on ijiro a rummeysatta? A haaggantahe! Ginnayyo laka saggi Waakkhoo kalday on ijiro a rummeestaane, roorro ka harmaan.
[20] 'Dalamoow, anihi saggi Kiriistohi lakakhuufo toro haag liiyeelin wihi ilmarhaatteet iyahiin kituso 'doonta?
[21] Aacchiheenki Aburaaham layadeeh, jeenteti wihi us yeele menya Waakh usu eti fissan iekkaache? Wahaas la a maanti us inankiiski Isakh layadeeh chalag ka Waakh soorriyo ikabahin leheet.
[22] Wihi atin agartaan kakhuufnaanki us Waakh kakhuufo ichoow wihi us yeele a israaheen. Toro la wihi us yeele ka, kakhuufnaanki us Waakh kakhuufo tuume lakayeele.
[23] Chiirnaanneti Waakhe, “Aburaaham Waakhe rummeeste, Waakh la eti fissan iekkaache,” tadeeh a labuuhiche. Aburaaham la aali Waakhe lakawahe.
[24] Kola saggi Waakh jeenteti inno usu ikakhuufno kalday on menye, jeenteti haaggi inno yeello 'doo'di fiffissan inno iekkaacho a agartaan.
[25] Saggaas on u inanti malaayeenye Raahab layadeeh laka i'daas on eheet. Jeenteti wihi haaggane iche yeesse iche 'doo'di Issiraayele 'degeye inti icho baryaan isiisse, toro jitoo addan igattuu, Waakh iche laka eti ortiis ka fissan ma iekkaanna?
[26] A mehe enenyeti rubey ikhabin a yumuy. Saggaas on u kakhuufnaanki inno Waakh kakhuufno haag liiyeelin a yumuy on.