[1] 'Doo'd Kiriistokaaw, buurtiin iiche 'doo'di enenyet Yeedi Waakh abcho itaahan. A mehe a garattaane Waakh nahi Yeedi Waakh enenyet abinno, 'doo'di addan 'dirihiissa nah hukkuma.
[2] Rumanka inno tuumman jitassi ittaawe ka a tarraantarranna. Chi' etoo wihi us yadeeh ka jirtuu ikhufin, etaas tuum a ii'dowe toro la sartiis tuumman jeyin a yabuu'd.
[3] Chi'inno fara'd luugaam af kahiino, 'dee fara'd inno raaho, fara'd tuum laabin a nabuu'de, inti inno 'doonno geenna.
[7] Weeli enenyet a geeddi us wihi lasoouume tuumman dakhti. Waha la a hoola ichoow bina ichoow chimbiro ichoow binahi uur il kajiito ichoow wihiiyye beyo goya kajiro. Rumanka la wahaas tuumman a dakhte.
[8] I'daasenyi et harrab dakhti mele. Harrab a suujoonki jeyin liiubaa'dane, hadaadohi uskul buuhaan.
[9] Inno harraba on Kamureen ichoow Aabbaheen kakoolinna, toro harraba on ka weeli enenyete Waakh iyookkotiis ka soouume falla.
[10] Afa kaldach on koolo ichoow falo leeyamiitiin. 'Doo'd Kiriistokaaw, uus i'daas itaahan.
[11] Bicchehi haaggan ichoow bicchehi magaa'de, koloo kalday issi biccheet a kasoobahaan?
[12] 'Doo'd Kiriistokaaw, dahar maanta medeer a dela? Ommos geeyi hayay bejelo a dela? Mele! Issi bicche hadaade, bicchehi haaggan ma soobihisso.
[13] Chi' goytiin ka etoo khara yahe toro haag ichoow suujoon garti jiro, jiroti haaggane us jiro ka, samacchaari khara kayamiite wihi haaggan us yeelo ka a tuso gi'de.
[14] I'daasenyi chirri uuraah inaaf ichoow bolokh buuhicheene toro la wihi awtaahha on yowatti, tab serey iisgeenne ommos yeedi rummaat a'dii'din.
[15] Kharati i'dee goobi Waakh ma katamiite i'daasenyi a ti harratane, ti wahanyeyyohi Waakh menye, a ti Seytaan.
[16] I'di tahe inti kal'darri kijirto toro la enenyet wihi awtiissa on yowti, intaas wihi jiro a hugun'darri ichoow suujoonki noole layeelo.
[17] I'daasenyi kharati Waakh katamiit a mi'dabe, nebeye 'doonta, a samacchaare, nabahe sudda, uure nugussahe, gurnaanki haaggane dessa, enenyet seley ma sassaahto toro la ma iskaayyeesso.
[18] 'Doo'di enenyet isineybicho la, a i'doo icho ilinti nebeyeet il gessaane, 'dee gurnaanki icho delaan la a jiroti fissan.