[1] 'Doo'd Kiriistokaaw, maan ichoow chirri Kamur soonokhti woriis atin laatahiin mele. Maantaka walah nah atin isoochiirro mele.
[2] I'di tahe atin rubeytiin tuum saggi Kamur saha'ddi liikamurin iyamiit a garattaan, i'di eti walah ibeen hatuu.
[3] Geeddi 'doo'di Kiriisto ikakhuufin, “Nebey on jirta, walah nah uloonni mele,” essi, chirraase doglaan sinati buure isoobahta, i'di bolokkhi makhaabassi chiise u. Ma bahsataan la.
[4] I'daasenyi 'doo'd Kiriistokaaw, atin mug'di goya ma kijirtaan, uus 'dee ibeenka i'di eti walah hatuu doglaan atin soogelinee.
[5] Atin tuumman a 'doo'di banay goya kijiro, fiddihiin la a ki 'doo'di maalim chirri walah tuumman laargo walah yeelo. Atin 'doo'di mug'di ichoow ibeen goya kijiro mee.
[6] 'Deerka uus inno i'di 'doo'di addane ur'do itaahan. I'daasenyi taba a neybaanni toro la a isjeyinno.
[7] A mehe 'doo'di ur'do ibeene ur'da, 'doo'di meleefu yateeh la, ibeene meleefu yateeh.
[8] I'daasenyi inno a 'doo'di banay goya kijiro gone, isjeyinno gi'de. Saggi eti iskareete birtiis gessate kacchiis jeychuu, inno laka kakhuufnaanki inno Kiriisto kakhuufno ichoow 'dooninti inno khabno gaacchaankeen a yitaaheen. Toro la khajjeeli saggi Waakh inno iribo kuubno, i'di koofiyati eti iskareet matah jeyisso a inno iyitaahe.
[9] I'di tahe Waakh holiiski us inno tusti menye, a inno soobahsate 'dee Yeesso Kiriistohi Kamureene ka inno riba.
[10] Yeesso a inno iyumuyye 'dee jirreey ommos tuunneey ka ba, usu a leejirro.
[11] Toollaka uur ismiigoocha, toro isgargaara i'di toolla atin yeessaan u.
[12] 'Doo'd Kiriistokaaw, a atin daahnee, taba 'doo'di Kamur ka goytiin ka hol dowo atin itoollo atin waanicho inkaanyita.
[13] Jeenteti hili icho atin ihaaggichaan u weyti inkaanyita, toro la 'doona. Taba nebey iskaleefiddiya.
[14] 'Doo'd Kiriistokaaw, a atin hawwaassanne, 'doo'di ollommee tootoocha. Ki roorro khabo uur miigoocha. Ki isuubaa'dan gargaara. 'Doo'd tuumman la igarrahsada.
[15] Taba uus etoo kalday laka eti suujoon iyeele suujoon tusan. I'daasenyi kol tuumman hol dowa, wihi haaggan isiyeela 'doo'di addan laka haag iyeela.
[16] Kol dakkhan hamaada.
[17] Kol dakkhan weesda.
[18] Walahbaaw atin isoobahe ka, Waakh kala'd ilaaba. I'di tahe waha a wihi Waakh atinhi atin ichoow Yeesso Kiriisto wohoo kalday tahiin atin i'doono.
[19] 'Dabi Rubeyti Munyee goytiin ka a jitinna.
[20] Wori 'doo'di Waákh íyeyyeedo atin icheeko a'darraawina.
[21] Worar tuumman kaja, wori haaggan la khuccha.
[22] Suujoonki fil tuummane la kasoonokhda.
[23] Toollaka Waakkhi nebey leh ba tuum atin munyaacha. Waakh ba rubeyohiin ichoow uurassiin ichoow sartiin ba tuum el tuumman kasoohossa, ichoowka ibeenki Yeesso Kiriistohi Kamureene soonokhti yateeh.
[24] Waakkhi atin waho a lakakhuufa gone, waha a yeela.
[25] 'Doo'd Kiriistokaaw, nah laka Waakh nah isoowaha.
[26] Taba 'doo'di Kiriisto rummeeste tuumman 'doonin Kiriisto kabariiticha.
[27] Magahi Kamur ka amure atin ibahchaa, khadaaba 'doo'di Kiriisto rummeeste tuumman a liisoomo.
[28] Yeesso Kiriistohi Kamureene ba atin imaala.