[1] 'Doo'd Kiriistokaaw ayti 'da'ddaboot, saggi atin jiroti Waakh kahamaadisso ijirtaan a atin abinne. Rumanka la i'daas on yeessaan. Toolla la nahi nah ichoow atin ba Yeessohi Kamureene wohoo kalday nahe a atin hawwaassana, taba waha kakhakkhaya yeela.
[2] I'di tahe anto Yeessohi Kamureene ka, wihi nah atin abinne a garattaan.
[3] Wihi Waakh atin ka'doono kallaayo, a atinhi jiroti munyee jirtaane, 'doo'di isidisan isileeur'dine,
[4] toro la ebba jiti munyeenye inkaanyit ka saggi us sartiis ijeysati garti.
[5] I'di 'doo'di Waakh igaranne eti tuummane icho argaan ichohi leeur'do imoono iitaahana.
[6] Toro la etoo Kiriisto rummeeste jita ka iikhufine, ommos makhaabassiis aleeur'din. I'di goorat nah atin inidahye nah atin itootoonnuu, Kamur eti tuummane uskeela yeele, moge kagutta.
[7] I'di tahe Waakh jiroti bi'direnye lajiro ma inno iwahin. I'daasenyi a inno wahe 'dee jiroti munyee jirra.
[8] Maantaka eti waha laabcho 'dii'do weeli enenyet menye, Waakkhi Rubeytiisti Munyee atin siicho iche 'dii'ddanyahe.
[9] Toolla walah 'dooninti atin is'doontaan miinsane atin laatahiine nah atin isoochiirro mele, a mehe Waakh rubeytiis saggi atin isi'doontaan a atin abche.
[10] Rumanka la 'doo'di Kiriisto rummeeste boroofenhi Makedooniya kijiro tuumman a 'doontaan. I'daasenyi 'doo'd Kiriistokaaw, a atin hawwaassanne, taba kakhaya weyti 'doona.
[11] I'di amuri nah atin ibihinnuu, tirriinsada jiroti kowdo laa jira, ebba la wihi usu miinsan on hol a kadowo, toro la ebba dahanohiis ka hil a haaggicho a isgoollicho.
[12] I'daakka 'doo'di Kiriisto irummeysan a atin inkaanyita, toro la et atin kanoossahiin mele.
[13] Toollaka 'doo'd Kiriistokaaw, atinhi wihi 'doo'd Kiriistoki tuume kayateeh wihicho abattaane 'doonna, 'dee jeentetichuu i'di 'doo'di addane khajjeel ikhabin u ooyina.
[14] A mehe chi'inno saggi Yeesso iyumuyye toro us omoot ikasookahe rummeysanni, saggaas on u saggi Waakh 'doo'di Kiriisto rummeeste tuume, Yeesso ileesoolaabo a rummeysanna.
[15] Waha toolla nah atin abinno a Yeedi Kamure, innohi jirraayi Kamur soonokhti, 'doo'di Kiriisto kakhuufe tuume ortiis Kamur or ma kadowno.
[16] A mehe Kamur rubeytiis a riira, amur bahcha, goobi Waakh kasookhubta, hooyi herti Waakhe ween ladaaga, arabi Waakh la ladaaga, 'doo'di Kiriisto kakhuufe tuume la kolooraat omoot kasookaha.
[17] Wahaas 'dubicho ka innohi uliba jirro soo'haane serey inno lageecha, mirso goyaka inno tuumman ichoow Kamur ba serey ka kulanna. 'Deerka jirtuu tuummamba Kamur leejirra.
[18] Taba gi'de, yeedassa ka uur ismiigoocha.