[1] Khadaaba 'doo'di atin isoochiiro a ani, Baawulo ichoow Silfaano ichoow Timooti. 'Doo'di nah isoochiirro la a atinhi urur Kiriisteenye ilkerengeetti weene 'Dessaloonika taalliine, koo Waakkhi Aabbaheenenye toro la koo Yeesso Kiriistohi Kamure.
[2] Waakkhi Aabbaheene ichoow Yeesso Kiriistohi Kamure ba atin imaalaane, nebey atin kakaalaan.
[3] 'Doo'd Kiriistokaaw, nah kol dakkhan jeentetiin u Waakh kala'de ilaabna. Waha la a wihi mujjumenye kootte nah imale, jeenteti atin weyti ikakhayantaane, Waakh ikakhuuftaane, 'dooninti atin isikhabtaan la ikakhayantuu.
[4] Maantaka ururreti Waakhe addan saggi nah atin ikeeylajno jeenteti atin sinayyohi atin loomhicho ichoow bolokkhi atin latuso atin kajo ka igarrahsattaane toro la Waakh ikakhuuftaan a icheekna.
[5] Waha la mehe tusaan ya, Waakh saggi imasse enenyet ihukkuma, 'dee 'doo'di dakhi Waakh mu'dan atin liiekkaacha. Atin la jeenteti Waakh atin idakhti iche chiiytiin sina atin iomhissa.
[6] Waakh saggi imasse enenyet ihukkuma gone, 'doo'di sina atin omhicho, moge kagutta.
[7] Toro la atinhi sina atin loomhicho ichoow nah ba sina a inno kabukkhicha. Waha la maanti icho yateehiin, a maanti Yeessohi Kamure i'di 'dabi bolkhuu, herti Waakhe miig leh khabaayi goobi Waakh kayamiit.
[8] Ulla eti tuummane Waakh igaranne toro la Wori Haaggane Yeessohi Kamureene miinsan daagin 'dii'de, sirbi gessa.
[9] Icho la sirbiti lagesso a ti icho jirtuu tuumman labaabiicho, toro la fooli Kamur ichoow miigti weynaantiis labuucho.
[10] Waha la maanti icho yateehiin, a maanti us soonokhti, 'doo'diiski munyeenye usu rummeeste tuumman usu saa'do, toro la kagirmeesti. Waha atin laka goya a kijirtaan jeenteti atin wihi Waakh yeele nah agarre nah atin isoocheekne irummeysatteen u.
[11] Jeentetaase kol dakkhan Waakh atin isoowahna, 'dee Waakkheen 'doo'di jiroti us iwahe imale jiro atin iekkaacha. Toro la Waakhe atin isoowahna, 'dee miigtiis ka haaggi atin yeelin 'doontaan tuumman ichoow wihi atin yeessaan tuumman jeenteti atin usu ikakhuuftaan u massicha.
[12] Nah wahane iweysanna 'dee enenyet tuumman Yeessohi Kamureene saa'da jeenteti wihi us jirotiin ka yeeluu, toro la Kiriisto a atin saa'da. Waha dakkhan la haaggi Waakhe buure ichoow koo Yeesso Kiriistohi Kamurenye israaho on kayateehiin.