[1] 'Doo'd Kiriistokaaw, atin rubeytiin a garattaane emeetti nah goytiin nimiy, ti ilmarhaatteet ma eheynan.
[2] Geeddi goorat nah atin ikiimaatan, saggi ilkerengeetti Fiiliffi ka sina nah liikawaariche ichoow saggi 'doo'di wewween nah ileeabaarrame a garattaan. I'daasenyi jeenteti Waakh uur nah imiigooche u, Wori Haaggane Waakh a atin icheekne chirri 'doo'di nah 'dii'ddan jire laka.
[3] A mehe wori nah enenyet icheekne khollookh ma kijirine ommos mali suuje ma kasoobahine ommos ekkeysi ma eheynan.
[4] I'daasenyi nah saggi 'doo'di Waakh khaatte, hili Wori Haaggan lakorche iche iyeyyeena. Nah hol ma downo weeli enenyet ma kahamaadinno, Waakkhi uurasseen kajo kahamaadinna.
[5] A mehe saggi atin igarattaan u, nah injire fool ma atin haagginne, ommos jeenteti 'damaam u ma atin ekkeysan. Waakh la garteenyo a laaba.
[6] Nah weeli enenyet, atin eheetteey ommos 'doo'doo addan eheetteey ka ba, koolo ma kayowan. Nah a ergaano Kiriisto gone, a geeddi kootte nah walah atin leemaranno.
[7] I'daasenyi nah i'di abarti nyaakhutiche nuugisso toro woywoytuu, samacchaar on goytiin fiddiine.
[8] Weyti atin 'doonne ichoowka hamaad ka Wori Haaggane Waakh kalday menye, jiroteenyo laka a atin leegisanne. Weyti atin chinneysanna!
[9] Rumanka 'doo'd Kiriistokaaw, atin hili miigenye nah haagginne a kasoo'hessaan. Ibeen ichoow maalim ba hol a downe uus 'dee geedda nah Wori Haaggane Waakh atin icheekno etiinkoo kalday laka hulees korinne.
[10] Atin ichoow Waakh laka saggi nah atinhi Kiriisto rummeysatteen goyaka jiroti munyeenye, fissane toro la eloo rucchul laka ikhabin ijirre ka garteenyo a laabtaan.
[11] A mehe saggi nah atin tuumman saggi ooyo nyaakhutiis iwoywoyo atin iwoywoyne a garattaan.
[12] Nah uur a atin miigoonne, uur atin khoboonne, atin hawwaassanne, 'dee jiroti Waakh kahamaado jirtaan. A mehe Waakh dakhiis ichoow weynaantiisti ababto a atin iwaha.
[13] Maanti atin Yeedi Waakhe atin nah kadaagteen khaatatteen, atin saggi yeedi weeli enenyet menye, saggi us rumanka Yeedi Waakh iyahe on ikhaatatteen. Yeeda atin rummeysatteen la a atin urgiyicha. Jeentetuu laka kol dakkhan Waakh kala'd a ilaabna.
[14] 'Doo'd Kiriistokaaw, atin laka dabati ururreti Waakhe ili Ya'huudiya kijirto Yeesso Kiriisto kakhuufte on raahteen. Saggaas 'doo'di Ya'huud icho sina ikawaariche, iche atin laka 'doo'diin sina atin ikawaariche.
[15] 'Doo'di Ya'huud Yeessohi Kamureene ichoow 'doo'di Waákh íyeyyeedo a yigaaseene, nah laka a nah sooriheen. Icho la Waakh ma kahamaadichaane, toro la enenyet tuumman a tirrimeen.
[16] Icho nahi Wori Haaggane yaafohi Ya'huud ieheynan icheekno 'dee Waakh icho ribo laka jeyine 'doonaan. I'da ka la, kol dakkhan uskeelichooda on weyti isibuuraachaan. Kola holi Waakh icho a sooeleele.
[17] 'Doo'd Kiriistokaaw nah kol tuumman uur a atin kakhabne. Inkoo geeddoor seley inno labahche laka, weyti atin towne, fooli nah atin agarro imoonne.
[18] A mehe atin soo'daarin a 'doonne. Ani, Baawulo kolassi ittaawenye inonnokhde kaje, i'daasenyi Seytaan a nah tirte.
[19] A mehe maanti Yeessohi Kamureene soonokhti ortiis ka khajjeel ommos hamaad ommos kala'ddi nah keeylajno a mehe? Atin menya?
[20] A mehe atin a 'doo'di nah keeylajno toro nah kahamaano.