[1] Khadaaba 'doo'di atin isoochiiro a ani Baawulo ichoow Silfaano ichoow Timooti. 'Doo'di nah isoochiirro la a atinhi urur Kiriisteenye ilkerengeetti weene 'Dessaloonika taalliine, koo Waakkhi Aabbaheene ichoow koo Yeesso Kiriistohi Kamure. Waakh ba atin imaala, nebey atin kakaala.
[2] Nah kol dakkhan jeenteti atin tuumman u Waakh kala'd a ilaabna, geeddi nah weysanni la Waakh a atin isoowahna.
[3] Kol dakkhan Waakkhi Aabbaheene ortiis ka saggi jeenteti atin Kiriisto ikakhuuftaan u hili haaggan ihaaggissaan ichoow jeenteti atin usu i'doontaan u hol idowtaan ichoow jeenteti atin Yeesso Kiriistohi Kamureene khajjeel ikakhabtaan u igarrahsattaan, a kasoo'hella.
[4] 'Doo'd Kiriistokaaw, nah saggi Waakh atin i'doono toro la us atin isoobahsate a garanna.
[5] I'di tahe maanti nah Wori Haaggan atin icheekne, woraas yeedi afoot kalday menye, miigti Rubeyti Munyee laka us a atin tuse. Wori Haaggane nah atin icheekne tuume rummeysanne. Toro la saggi fiddihi nah goytiin fiddiine iroonotiin ieheneet a garattaan.
[6] Atin chirri sinayyo atin loomhiche laka, Wori Haaggan hamaadi buurenye Rubeyti Munyee atin siisse iche kakhaatatteen. I'da ka la, atin dabateenyo ichoow koo Kamureen a raahteen.
[7] Jeentetaas u 'doo'di Kiriisto rummeeste boroofenhi Makedooniya kijiro ichoow ki boroofenhi Akhaaya kijiro ba iyookko a ititaaheen.
[8] A mehe wori Kamur miinsane goytiin kasoobahe, 'doo'di boroofenhi Makedooniya ichoow ki boroofenhi Akhaaya laka a khaatte. Toro la wori saggi atin Waakh ikakhuuftaan il tuumman a kataa'he. Maantaka wohoo rucchule nah kakhayno laka ma jiraan.
[9] I'di tahe icho rubeycho saggi atin goorat nah imartisatteen ichoow saggi atin iyookkoyyohi beenaate Waakh lakayeessi atin orey wahatteen ikasoonokhatteene, 'dee atin Waakkhi jiro toro rummaat ikafassaan a cheekaan.
[10] Toro la saggi atin Weeli Waakhe goobi Waakh ka soonokhti isugtaan laka a cheekaan. Us a Yeessohi Waakh omoot ka sookahche, holi Waakhe soosohti inno karibo.