[1] 'Deerka inkoo nah laantiin fiddi agaafanne ka, wihi nah goonne nah leemujjume, a nahi ilkerengeetti Aa'den ka soo'haano.
[2] Toro la Timooti atin isooeregne. Us a eteenki koo Kiriisteenye, hili Waakh ka a wahalhaanya, Wori Haaggane Kiriisto miinsane 'doo'd icheeka. Usu a sooeregne, 'dee kakhuufnaanki atin Yeesso Kiriisto kakhuuftaan ka atin miigoocha toro la atin faajjiya.
[3] I'dane yeella uus 'dee etiinkoo kalday laka, jeenteti sinayyohi kajo ka Kiriistohi us kakhuufo ka lasesseehin. Rumanka saggi atin igarattaan u, sinayyoha a wihi Waakh inno igooche.
[4] Rumanka maanti nah atin leejirre laka, foga on sinati inno lasoomhicho atin isoocheekne. Saggi atin igarattaan u la, i'daas on titah.
[5] Maantaka inkoo an nabahtiin waaye ka fiddi agaafde, Timooti sooerge. A sooerge 'dee usu atin uliba Kiriisto mujjum kakhuuftaan abda. Mehe karoore ya, kolossoo Seytaanki 'Dookkaje layadeeh jitoo ka kajmeti uskeel atin kalugu'ddo a atin kakaje, hili miigenye nah haagginne ki ilmarhaatteet yitah.
[6] I'daasenyi toolla Timooti a soonokhte. Wori haaggane us keene a atinhi uliba Kiriisto kakhuuftaane toro la uliba is'doontaan. Wihi addane us yidah, a atinhi uliba hamaad ka nah kasoo'hessaane, ichoow saggi atin argin nah i'doontaan saggi nah laka toolla argin atin i'doonnuu.
[7] Maantaka 'doo'd Kiriistokaaw, chirri nah saggi atin mujjum Kiriisto ikakhuuftaan daagne, sina ichoow bolokkhi nah 'helle ka uur a nah miigoosseen.
[8] Atin Kamur ka mujjume tolossaan gone, toolla nah rumanka a jirra.
[9] Geeddoo meheenye jeentetiin u Waakh kala'd ilaabna jeenteti hamaadi buurenye atin Waakh ortiis ka nah ikeenteen u?
[10] Ibeen ichoow maalim ba rumanka Waakh a wahanna, 'dee jiti nah toro atin kasoo'daarro fura, toro la wihi Kiriistohi atin kakhuuftaan ka laatahiin, atin siinna.
[11] Waakkheenki Aabbaheene rubeytiis ichoow Yeessohi Kamureene ba, jiti nah atin ikanamiit soofuraan.
[12] Kamur ba 'dooninti atin is'doontaan ichoow ti atin 'doo'di addan tuumman 'doontaan atin ikakhakkhaya, weyti buuraacha saggi nah atin i'doonnuu.
[13] Kamur ba i'da ka uur a atin miigoocho, 'dee maanti Yeessohi Kamureene 'doo'diis tuumman khabaayi soonokhti ka, Waakkhi Aabbaheene ortiis ka 'doo'di munyeenye toro wohoo rucchul laka liikacheekan tateehiin.