[1] Atinhi kamurree laka saggi atin goobi Waakh ka Kamuroo ikhabtaan a garattaan gone, taba gi'de ilbooyyetiin saggi mujjume iwoywoya, toro geeddi mujjume guta.
[2] Taba, weysi ka orey isohda, geeddaas tuumman isyaakhicha, Waakh la kala'd ilaaba.
[3] Geeddaas la toro Waakh nah isoowaha, 'dee Waakh aritti nah wori Waakh kacheekno a nah ifaho. Wora la a wori goorat dagsane Kiriisto miinsan. Anna jeenteti worane jeela ikajira.
[4] Waakh isoowaha, 'dee wora saggi imasse 'doo'd a ibabbakkaahicho.
[5] Taba 'doo'di urur Kiriisto goya ikajirin jiti khara kaleefiddiya. Ibeenki Waakh atin siicho dakkhan mujjum khaadda, 'doo'daas gargaara 'dee Kiriisto a kakhuufeen.
[6] Kol dakkhan harrabi haaggane, enenyet nabah isudin 'doono khaba, 'dee ebba wihi atin ilaabtaan garda.
[7] Tuuchiko woreey tuumman a atin siicha. Us a eteenki koo Kiriisteenye inno weyti 'doonno, hili Kamur ka lakakhuufo toro la a ilbooyi wahalheenyee.
[8] An usu a atin isooerga 'dee saggi nah tuumman ijirro abattaane, toro la uur laka atin miigoocha.
[9] Usu ichoow Oneesmo a issooraahaan. Oneesmo la a eteenki lakakhuufo, koo Kiriisteenye inno weyti 'doonno toro la a kiinkoo. Lammacho ba wihi inta ka jiro tuumman a atin isoocheekaan.
[10] Aristaarkohi jeela ikaleejiro laka a atin soobariitiche. Markohi Barnaba abaayyahiis yahe laka a atin soobariitiche. Amuri usu miinsan a 'hesseene, chi' Marko atin iyimiy, mujjum martiisda.
[11] Yeessohi magahiiskoo Yaasto layadeeh laka a atin soobariitiche. 'Doo'di hili dakhi Waakh miinsan ileehaaggicho goyaka, 'doo'di Ya'huude Kiriisto rummeeste a reera seyyahtiissa on. Icho la weyti uur imiigoocheen.
[12] Ebaabarahi kiinenye, falfa Yeesso Kiriistee, a atin soobariitiche. Us kol tuumman geeddi us yabuu'de hol dowa Waakh atin isoowaha, 'dee mujjum tolossaane, ii'dowtaane, 'dee wihi tuummane Waakh atin ka'doono rumanka abattaan.
[13] Ani rubeyteey saggi us atin ichoow urur Kiriistoki ilkerengeetohi Lawodeechiya ichoow Haayeraboli yaal hol atin ikadowo rumanka gartiis a laaba.
[14] Luukahi ilkitarreenye weyti aaleene ichoow Deema laka a atin soobariiticheen.
[15] 'Doo'di Kiriisto rummeeste ilkerengeetti Lawodeechiya yaal bariitoteey eleelicha. Niimifa ichoow urur Kiriistoki minkiche ka is'helo, bariitoteey eleelicha.
[16] Chirri khadaaba atin liisoosoome lamassiche, urur Kiriistoki ilkerengeetti Lawodeechiya laka ikuccha, a liisoomo. Atin la khadaabi an icho ierge, a atin liisoosoomo.
[17] Arkiiba la wihi atin itadeehiin, “Tabe hili Kamur dahantaah soogesse, rumanka massi.”
[18] Bariitota la, ani Baawulo rubeytaaya dahanteey ka chiira. Saggi an ihidanahe adabina, isooweesda. Waakh ba atin imaala.