[1] Maantaka, wihi an ewweenki urur Kiriisto woyo daaho a waha. Ani laka a ewweenkoo i'diinenye, toro la garti saggi Kiriisto sina liiomhiche a laaba. Ani laka maanti us soonokhti weynaantiis a leegisma.
[2] Ururi Waakhe i'di woyhi Waakhenye dahantiin lagesse ersinkicho ateeha, yaakhicha. Uus wohoo atin liihosso eheynane, i'daasenyi wihi atin kasoouummame a eheetti. Jeenteti 'damaanki lakhaanyee la menye, jeenteti atin weyti Waakh ikafalin 'doontaan a eheetti gi'de.
[3] 'Doo'di dahantiin lagesse i'di kamuri suuje u akaarriirina, i'daasenyi 'doo'di woyha iyookkoti haaggan iateeha.
[4] Maanti Ersinki Ween soobaho la, 'duubi Waakh kayamiite jirtuu duh iurgiyine 'hessaan.
[5] Saggaasu la atinhi nunnugul taba ayti ewween atin idowo akutina. Atin tuumman la tuum isnuglaacha a mehe, “Waakh eti eylajo a 'dii'ddanyahe, i'daasenyi eti isnuglaacho haaggiiski buurenye siicha.”
[6] Maantaka dahanti Waakkhi miig khabo orche ka isnuglaacha, 'dee maanti us 'doono, a atin okkhicho.
[7] Us aw atin ikhaba gone, wa'dwaa'diin tuumman usu dahan gessa gi'de.
[8] Taba isjeycha toro la mujjum toorribda! Seytaanki chiiytankiine i'di bahassihi yeeduu a ismara, eti us bar tiro yowtaa.
[9] Usu iskahossa mujjum Waakh kakhuufa, a garattaanee harra tuumman ka, 'doo'diinki Kiriisto rummeeste tuumman sinata atin taham on taham.
[10] Waakkhi haaggi buure leh, Yeesso Kiriisto ka weynaantiisti armaanjireen a atin iwahe. Inkoo geeddoor sina atin tuhum, usu rubeytiis a atin okkhicha, kakhuufnaanki atin usu kakhuuftaan miigoocha, atin toollicha toro inti wohoo atin ikaasseehin atin gessa.
[11] Jirtuu tuumman la miige a tiissa. Aamiin!
[12] Eti ullaka koo Kiriisteenye Silfaano layadeehe, an eti weyti lakakhuufo iekkaacho, iche khadaaba ileegargaare. Wihi an gaabi ka atin ikasoochiire la uure atin miigoocha, toro a saggi wihi khadaaba kachiiran haaggi Waakhe buure rum iyahe. Haagga akanokhanna gi'de.
[13] Urur Kiriistoki ilkerengeetti Baabiloon kajiro atin laleesoobahsate a atin soobariitiche. Markohi i'di weeleeye laka a atin soobariitiche.
[14] Bariitoti 'doo'd Kiriisto isbariiticho isbariiticha. Atinhi koo Kiriistee tuumman la Waakh ba nebey atin kakaala.