[1] Maantaka sar Yeesso Kiriisto jeenteteen u sina a loomhiche gone, taba atin laka saggi us imasse imalda. I'di tahe eti sartiis sina loomhiche uskeel a kasoonokhte.
[2] Jeentetaas u jirotiisti addane harrata ka us soojiro, suujoonki enenyet imoono ma ijiro i'daasenyi wihi Waakh 'doono yeela.
[3] Goorat 'hor jiroti atin jirteen ka wihi 'doo'di Waakh igaran yeelo goosseene geeddi deer yeesseen. Wihi atin yeesseen a i'di maanta soho'ddarri ichoow suujoonki liimoono ichoow meleefu. Wihi addan a daawohi bi'direnye enenyet soho'ddarri kalug'do ichoow wahnaanki suujenye iyookkoyyohi waakkhakh lakayeessi lawahti.
[4] Waha tuumman ka, aalassiinki oraat weyti atin kagirmeestaan cha'atin kola icho ikakhayine uskeeli buurenye icho i'daanu yeelaan iyeelin. Icho la abaari noole atin korchaan.
[5] I'daasenyi 'doo'da wihi jiroticho miinsane us Waakkhi 'doo'di jiro ichoow ki tuume ba hukkumo idowdowo ma kabahsataan.
[6] Jeentetuu la Wori Haaggan 'doo'di tuume laka a liicheeke, 'dee sarticho i'di enenyet u lahukkuma, i'daasenyi rubey ka jiraan saggi Waakh ijiruu.
[7] Harra 'dubiche kola a yitah. Maantaka mujjum malda toro la isjeycha uus 'dee wohoo weysihiin targeyine.
[8] Walah tuumman 'dirihicho la, weyti is'doona. I'di tahe 'doonine uskeeli buurenye kakutta.
[9] Goobassiin ka nyunnyuuto laan ismartiisda.
[10] Ebba siimbaaw us 'hele ka 'doo'di addan a ihilo. I'da ka ebba haaggi Waakhe buurenye fil ittaawe mujjume dakhta.
[11] Eti siintiis ti Yeedi Waakh lacheeko tahe, yeedaas a cheeko gi'de. Eti siintiis ti us 'doo'di addan gargaaro tahe, miigti Waakh siiche tuumman ka 'doo'di addan a gargaaro. I'da ka walah tuumman ka Yeesso Kiriisto ka Waakh a laweynaacha. Us ba jirtuu tuummamba inkaanyit ichoow miig 'hela. Aamiin.
[12] Aalasseeyki an weyti 'doono, sinayyohi 'dabenye atin yahame atin kajo akagirmeysanna i'doo wohoo girmee atin kayitaaheen u.
[13] I'daasenyi hamaada jeenteti atin Kiriisto sina ileegisantaane 'dee weyti ihamaaddaan maanti weynaantiis enenyet liisoobabbakkaahicho.
[14] Chirri jeenteti at koo Kiriisto itahe lakaabaaro, ati Waakh a kimaale. I'di tahe Rubeyti weynaan lehe toro Rubeyti Waakhe a kileejirta.
[15] I'daasenyi uus etiinkoo kalday laka jeenteti us enenyet iyigis ommos us hatto ileeyahe ommos jeenteti us uskeeloo iyeele ommos us wohoo wihiis ieheynan ikaaddiho sina liiomhin.
[16] I'daasenyi chi' jeenteti at koo Kiriisto itahuu sina kitaham uuryaawine, jeenteti magah Kiriisto liikaawahuu Waakh kooli.
[17] I'di tahe ibeen a yitah ki Waakh enenyet hukkumo. Chi' innohi nyaakhuti Waakhe inno lakasookhabti la, 'doo'di Wori Haaggane Waakh rummeysawwaaye sinati isoobahto a too geeddohe?
[18] I'di Chiirnaanneti Waakh tadeeh u, “Chirri 'doo'di fiffissan ba ribnaanki laribo 'hool yahe, 'doo'di Waakh igaran ichoow ki uskeel leh intaakka mee?”
[19] Maantaka eti tuummane sinati taham ichoow wihi Waakh 'doono ba israahaan, Waakkhi lakakhuufo walah tuumman soouume dahantiis a isgesso. Toro la haaggi us yeelo orey a ileesohti.