[1] Saggaas on u, deyyeho taba makhaaballetiin aficho akutina. I'da yeela 'dee chi' gaasichokoo Yeedi Waakh iraahin laka, yeedi aficho ka menye, jeenteti jiroti oboorrihicho jiro,
[2] mi'dabe ichoow jiroti inkaanyite icho jiraan ka a lasoojiito.
[3] Eykodi sartiinna atin iseykoddaan uus wahanyeyyohi kharaate i'di maanta tinti lajirfo ichoow 'dahabi lagessati ichoow gaaddi gato miige kalday eheynan.
[4] Eykodi atin iseykoddaan ki goytiin kasoobaho jirtuu tuumman ituumin a eheetti. Jiroti samacchaarenye sir laaye Waakh ortiis ka weyti khumman jira.
[5] A mehe saggane deyyehoti goorat archiiye munyeenye Waakh khajjeel kakhabte isieykodde. Arammeticho aficho ma kutin.
[6] Saara i'daase eheete, Aburaaham yeediis raahte, “Kamuraaya,” tidah. Atin albehicheeda tateehiin cha'atin haag yeessaane roorro ikhabin.
[7] Saggaas on u, atinhi arammee taba deyyehotiin jiti samacchaare ka leefiddiya saggi icho wahalhi atin kaa'ddaran iyahiin kasa. Toro la inkaanyita i'di tahe atin tuumman jiroti Waakh enenyet i'daanu siicho a islee'hessaan. Cha'atin i'da yeessaan la, walah weysihiin jeycho mele.
[8] Ayti 'da'ddaboot, taba atin tuumman maloo kalday khaba, uur isinugleesda, i'di 'doo'di uuroo kaldaye u is'doona, isnuglaacha.
[9] Eti suujoonkoo kiyeelo ommos kiabaaro aal akagutanne, i'daasenyi iweyso Waakh a imaalo. A mehe wihi atin liiwahe a wahaase, 'dee buuh 'hessaan.
[10] I'di Chiirnaanneti Waakh tadeeh u, “Eti jiro 'doono, ibeenneti haaggan la argin 'doono, harrabiis suujoon a kahosso, afiis la been a kahosso.
[11] Suujoon a kasoonokhti haag a yeelo, nebey a yowti, nebey a 'don'doono.
[12] I'di tahe indohi Kamur 'doo'di fiffissan a katoollaane, dogtiis la weysihicho a ifurantahe. I'daasenyi Waakh 'doo'di suujoon yeelo a 'dii'ddanyahe.”
[13] Ayyo wohoo atin yeela cha'atin haag yeelin imoontaan?
[14] I'daasenyi chirri jeenteti wihi fissane atin yeessaan on sina atin loomhicho, a atin liimaale. “Wihi icho karooraan akaroorina, anahina.”
[15] I'daasenyi uurassiin ka, Kiriisto tuum isisoobahcha i'di Kamur u. Chirri khajjeeli atin Kiriisto kakhabtaan atin laworsate la, tannabda kol dakkhan ayti atin laabtaan khaba. I'daasenyi waha samacchaar ka ichoow inkaanyit ka yeela.
[16] Toro rubeyti suujoon atin ikacheekan khaba, 'dee jirotiinti haaggane jeenteti atin Kiriisto ikakhuuftaan jirtaan ka atin hayhayo hankichokaas ka lakhaanyo a khaatatti.
[17] Wihi deefo, chi'iche 'dooninti Waakh tahe, a atihi jeenteti at haag iyeessuu sina kaawaarto, atihi jeenteti at suujoon iyeessuu sina kaawaarto ka.
[18] A mehe Kiriisto maantoo kalday on uskeeleen iyumuyye, maantoo addan la uskeeleen ma iyamuut. Eti fissan jeenteti ki khollokkhane iyumuyye 'dee inno Waakh inno ikeena. Usuhi weeli enenyetenye layigisye, i'daasenyi Rubeyti Munyee ka omoot lakasookahche.
[19] Ulla a irte rubeyohi 'doo'di goorat tuume hidan wori Waakh icheeke.
[20] Waha a rubeyohi 'doo'di goorat ayti Waakh raahiwwaaye maanti goorat Noowa koobanhi buure dise. Waakh la 'doo'daas a isamacchaare. I'daasenyi et siyyeet kooban goya kijirte kaldaye bicche ikhaatin.
[21] Biccheha la mehe itoollaan ya, baattissiyoti toolla atin laka atin ribto. Baattissiyota la wohoo sartiin chaafo kabahcho menye, a rubeyti wahanyeyyohi Waakh ka suujoon inno ikacheekan. Baattissiyota la Yeesso Kiriistohi omoot kasookahe ka a atin ribta.
[22] Kiriisto la goobi Waakhe inokhte, Waakh dahantiisti miigeet orronte, herti Waakh tuumman ichoow wihi tuummane goobi Waakh ka anto ichoow miig leh ba afiis ma kutaan.