[1] Khadaaba eti atin isoochiiro a ani, Siimonhi Beetero layadeeh. Ani la a falfa ichoow ergaano Yeesso Kiriisto. 'Doo'di an isoochiiro la a 'doo'di fissanoonki Waakh ichoow koo Yeesso Kiriistohi 'Doorribeheene ka i'denyuu rumanka kakhuufnaanki Yeesso Kiriisto lakakhuufo 'hele.
[2] Waakh ichoow Yeessohi Kamureene ba garanti atin icho garattaan ka tuum atin imaalaane tuum nebey atin kakaalaan.
[3] Miigti Waakh ka wihi tuummane jiro miinsane 'dee inno jiroti Waakh kahamaado jirro a inno siiche. Garanti inno Kiriisto garanni ka wahanyeyyohaas a khabna. Toro la weynaantiis ichoow haaggiiski weyti deefo ka a inno wahe.
[4] Wahanyeyyohaas ka Waakh ayyinti weyti haaggane indigir inno ikhabto a inno igooche, 'dee ayyintaas ka Waakh uummankiis leegisanna toro suujoonki harratane wahanyeyyohi liimoono keenaan kabahsanna.
[5] Jeentetuu la taba tirriinsada kakhuufnaanki atin Waakh kakhuuftaan haag kakhaya, haag la abannaanki atin Waakh abattaan kakhaya.
[6] Abannaan la isjeyin kakhaya, isjeyin la garrahsi kakhaya, garrahsi la jiroti Waakh kahamaado kakhaya.
[7] Jiroti Waakh kahamaado la uuri 'dabakhe kakhaya, uuri 'dabakhe la 'doonin kakhaya.
[8] Chirri wahaas tuumman wihiin yahiine toro la kakhaymaan, Yeesso Kiriistohi Kamureenenye atin abattaan ka, 'doo'di ollommeenye gurnaan idelin ma tateehiin.
[9] I'daasenyi eti wahanyeyyohaas laa a i'di eti walah igaranne indo laaye, saggi uskeeliiski oraat liidikhe dabe.
[10] Maantaka 'doo'd Kiriistokaaw a atin hawwaasde, tirriinsada wihi saggi Waakh atin iwahe toro us atin isoobahsate tuso yeela. A mehe cha'atin i'da yeesseen jirtuu ma tarraantarrattaan.
[11] I'da ka goobi Waakhe jirtuu imassanne Yeesso Kiriistohi Kamureenenye 'Doorribeheene dakhti ka weyti atin lasoodowwaacha.
[12] Rumanka runti Chiirnaanneti Waakhe goorat atin laabche a garattaane toro la a raahtaan. Eheetteey laka, a inokhda one toro kol tuumman atin kasoo'helcha.
[13] Ani ka kootte wihi mujjume, a anihi geeddi uliba an noolahe waha atin kasoo'he'hhelcho.
[14] A mehe a garda omootteey a soodowwaatte, saggi Yeesso Kiriistohi Kamureene itusuu.
[15] Hol la a dowa saggi 'dee inkoo an umuy laka atin kol dakkhan waha ikasoo'hessaan yeela.
[16] A mehe maanti nah miig Yeesso Kiriistohi Kamureene ichoow saggi us isoonokhti nah atin icheekne, wahaas hawweesseti beenaate nah kharateenyo ka soouunne nah raahne menye, nah indoheenyo ka weynaantiis a agarre.
[17] A mehe chirraas us inkaanyit ichoow weynaan Waakkhi Aabbaheene ka'hele, hooyi Waakkhi Weyti Ween kayimiy mehe yidah ya, “Waha a Weeleeyki an weyti 'doono, an weyti kahamaado.”
[18] Nah rubeyteenyo la hooya goobi Waakh kasooyeede a daagne a mehe nah usu hali lagan ka a leejirree.
[19] Inno la runti 'doo'di goorat Waákh íyeyyeedo cheeke weyti tissibna. Yeeda weyti nabah isuda a mehe yeeda a i'di taahi inti mug'dee kabolkho. Nabah isuda ichoowka ibeen a yimaate ki Kiriisto soobaho banayhiis la uurassiin goya kabolkhaan.
[20] Waha tuumman 'dirihicho la, saggi Chiirnaanneti Waakhe goorat 'doo'di Waákh íyeyyeedo cheeke too kalday laka malicho ikiimaatan abda.
[21] A mehe 'doo'da Waákh íyeyyeedo yeedicho 'dooninti weeli enenyet ma kasoouummamin. I'daasenyi yeedi icho cheekeen, a ki Waakh kayimiyye Rubeyti Munyee aficho leekeente.