[1] Maantaka, suujoon tuumman ichoow ekkeysi tuumman ichoow iskaayyeelnaan ichoow kal'darri ichoow ham tuumman kasootaba.
[2] I'di nyaakhuti rurrucchule dessuu, taba atin laka Wori Haaggan i'di haanuut u iamuuma, 'dee ribnaankiin ka weynaada.
[3] I'di tahe toolla saggi Kamur ihaagganyahe a chanchanteen.
[4] Kamuri i'di daakki jireenye 'doo'd 'dii'de, i'daasenyi Waakkhi soobahsate ka weyti khumman iamiita.
[5] Toolla la i'di dagahti jiro khabtuu, Waakh minki 'doo'di Waakh waho iche atin kadisa. Waakh la i'dane yeela 'dee kuhaaniyyohi munyee atin kayeela. I'di kuhaaniyyoot u la, Yeesso Kiriisto ka, i'di soorriyoti Rubeyti Munyee woyto toro Waakh kahamaaduu Waakh isibihissaan.
[6] I'di tahe Chiirnaanneti Waakh mehe tadeeh ya, “An ilkerengeetti Saayon ka daakkoo an soobahsade khummane tirrinki dagaheetenye chuukha, eti tuummane usu rummeeste la lakhaanyo ma lakadowo.”
[7] Atinhi usu rummeysattaan ka daakka weyti atin ikhummanyahe. I'daasenyi 'doo'di irummeysan ka, “Daakki 'doo'di minan diso 'dii'de, usu tirrinki dagaheete min tiiro yitah.”
[8] Toro la, “Us a i'di daakki enenyet tarraantarricho, a daddaabti enenyet laga'ddo.” Jeenteti icho ayti Waakh idaagine itarraantarrataan. Waha la a wihi goorat Waakh igooche on.
[9] I'daasenyi atin a 'doo'di Waakh soobahsate, a kuhaaniyyohi karnat, a yaafti munyee, a 'doo'di Waakhe Waakkhi mug'di goya kasoobahche banayhiiski haaggan goya soogesse wihi weyti haaggane us yeele cheeko.
[10] Atin goorat 'hor 'doo'di Waakh ma eheynane, i'daasenyi toolla a 'doo'di Waakh. Goorat 'hor uurnugleeli Waakh ma 'heline, i'daasenyi toolla uurnugleeli Waakh a 'hesseen.
[11] Aalasseeyki an weyti 'doono, i'di 'doo'di harrata ka yeelan ichoow ki meel ikhabin u, a atin hawwaasda, taba wihi uurassiin goya kijiro uskeel imoono kol dakkhan atin isdihtaan uus atin kahataatin.
[12] 'Doo'di Waakh igaran goyaka jiroti haaggan jira, 'dee koli icho suujoonkoo atin kacheektaan tuumman, jeenteti icho haaggi atin yeessaan ifiirichaan u, Waakh a koolicheen maanti us yamiit.
[13] Taba weynaanti sirgaal tuumman afiche akutina i'di tahe waha a wihi Kamur atinhi yeessaan 'doono. Karnati weyti ween eheetteey ommos,
[14] gaafanayyohi karnat soobahsate 'doo'di uskeel yeele sina tuso ommos 'doo'di haag yeele koolicho eheetteey ka ba afiche akutina.
[15] A mehe wihi Waakh 'doono a mehe ya, a atinhi haaggi atin yeessaan ka, 'doo'di wihi 'dalam atin kacheekti chubbahissaan.
[16] Saggi 'doo'di lasoofure ijira. I'daasenyi furnaankaas atin lasoofure akagir'daamina suujoon ayeelina. Saggi falfayyohi Waakh ijira.
[17] Taba enenyet tuumman inkaanyita, 'doo'di addane Kiriisto rummeeste 'doona, Waakh karoora, karnat la inkaanyita.
[18] Atinhi bow'dayyee, taba inkaanyit tuumman ka kamurretiin aficho akutina. Kamurreti hahhaaggane toro samacchaare kalday menye, ti saggi suuje atin iwoyto laka aficho akutina.
[19] A mehe Waakh a kaahamaada cha'at bolokkhi ikaamaline lakituse ka garrahsatte jeenteti at wihi Waakh 'doono igarattuu.
[20] I'daasenyi koolohoh sugta chirri at uskeeli at yeesse on ka lakijahe, at garrahsatte. I'daasenyi chirri haaggi at yeesse ka sina lakoomhicho, at la garrahsatti, Waakh a kaahamaada.
[21] A mehe jeentetane atin liiwahe. Kiriisto laka sina a kawaarte gone, us iyookkoti atin dabatiis raahtaan a atin iyitah.
[22] “Uskeel us yeele mele, been afiis leetimiy mele.”
[23] Us maanti laabaare laka abaar ma laabin. Maanti sina lakawaariche laka, 'doo'di sina kawaariche ma itiftoonne, Waakkhi enenyet saggi mujjume ihukkumo on dahantiis isgesse.
[24] Usu rubeytiis la massalaaba ka uskeeleen a si'de. I'dane yeele 'dee uus kola uskeel inno dakhanne, jiroti fissan jirra. Sinati loomhiche ka, atin a samaatteen.
[25] I'di tahe atin i'di iiyti baabaa kijirto eheet. I'daasenyi toolla Ersinki rubeyohiin yaakhicho a isoonokhatteen.