[1] Eti tuummane saggi Yeesso Ki Lasubhe iyahe rummeesti a nyaakhuti Waakh. Eti tuummane Waakkhi Aabbaheene 'doono la, nyaakhuti Waakh laka a 'doona gon.
[2] Saggane saggi inno nyaakhuti Waakh i'doonno igaranna, Waakhe 'doonna toro la amurretiis raahna.
[3] 'Dooninti inno Waakh 'doonno a i'da, amurretiissa raahna. Amurretiis la hulees mele.
[4] A mehe 'doo'di tuummane nyaakhuti Waakhe harrata suuje a soorichaan. Saggane harrata isoorinna, Yeesso kakhuufna.
[5] Kamalda bal, eti harrata suuje sooricho a ayyo? A eti saggi Yeesso Weeli Waakh iyahe rummeesti kalday on.
[6] Yeesso Kiriisto rubeytiis bicche ichoow diige kayimiy. Bicche kalday on la menye, bicche ichoow diige goya leeyimiy. Rubeyti Munyee la waha a cheekta, a mehe Rubeyti Munyee rum on cheekta.
[7] A mehe walah seyyahtane runti saggi Yeesso iyimiyye weeli enenyet iyitah cheeka.
[8] Waha la a Rubeyti Munyee ichoow bicche ichoow diig. Walah seyyahtaas la wohoo kalday on cheekaan.
[9] Wihi weeli enenyet inno idowo a rummeysanna. I'daasenyi wihi Waakh inno idowo weyti kutaan. A mehe wahaas Waakh cheeke Weeliissa miinsanyahiin.
[10] Eti tuummane saggi Yeesso Weeli Waakh iyahe rummeesti, wihi Waakh essi a rummeesta. Eti tuummane wihi Waakh essi irummeysan la, Waákh eti been lehe kayeele, a mehe wihi Waakh cheeke Weeliis miinsan ma rummeysan gon.
[11] Wihi us cheeko la kallaayo. Waakh jiroti jirtuu imassan a inno siiche, jirota la eti lakeelo a Weeliissa.
[12] Eti tuummane Weeli Waakh khabo, jirota jirtuu imassan a khaba. Eti tuummane Weeli Waakh ikhabin la jirota jirtuu imassan ma khabo.
[13] Wahanyeyyoha atinhi saggi Yeesso Weeli Waakh iyahe rummeysatteene atin isoochiira, 'dee saggi atin jiroti jirtuu imassan ikhabtaan garattaan.
[14] Kolbaaw inno Waakh walah daahne wihi inno ubno, chirri wihi inno daahno ichoow wihi us 'doono israahaan, us a inno daaga.
[15] Chirri inno saggi us inno idaago garanni la, walahbaaw inno usu daahne saggi inno ikhabno a garanna.
[16] Chirri etoo etiiski Kiriisto rummeeste uskeeloo omoot ikawoyin yeelo argo, etaas Waakh a iwaho, Waakh jiro a siicho. 'Doo'di uskeelicho omoot ikawoyine kaayyeeda. Uskeeli enenyet omoot iwoyo a jira. 'Doo'di uskeeli i'dee yeelo mee Waakh iwaha atin idowo.
[17] Suujoonki enenyet yeelo tuumman a uskeel. I'daasenyi uskeel tuumman mee enenyet omoot iwoyo.
[18] Wihi inno garanni, 'doo'di tuummane nyaakhuti Waakhe uskeel goya ma kaassohti. Weeli Waakhe icho toorribá, Seytaanki uskeel leh icho i'door rucchul laka ma yeelo.
[19] Saggi inno nyaakhuti Waakh inahe a garanna. Toro la saggi Seytaanki uskeel leh wihi tuummane Waákh tirrimo idakhti a garanna.
[20] Wihi inno garanni Weeli Waakh a yimiyye, miigti inno wahanyeyyohi Waakh kaabanni inno siiche, 'dee saggi Waakh rum iyahe abanna. Toolla la inno ichoow Waakkhi rummaat a wohoo kaldaye, inno ichoow Yeesso Kiriistohi Weeliise laka a wohoo kalday. Us a Waakkhi rummaate, toro a jiroti jirtuu imassan.
[21] Nyaakhuteeyki an weyti 'doono, taba iyookkoyyohi waakkhakh lakayeessi iskahossa.