[1] Nyaakhuteeyki an weyti 'doono, waansihane atin isoochiira, uus 'dee atin uskeel yeeline. I'daasenyi chi' etoo goytiin ka uskeeloo yeelo, eti meesseen ka Aabbaheen hawwaasti a khabna. Eta la a Yeesso Kiriistohi Fissan.
[2] Usu goorat lasoorriyooche, 'dee holi Waakhe uskeeleen keeno bahcha. Jeenteti soorriyotiis u la, Waakh uskeeleen kalday ma bahcho, i'daasenyi uskeeli weeli enenyet tuummane bahcha.
[3] Chirri inno amurretiis raahno, saggi inno rumanka eti Waakh yahe iabanne a garanna.
[4] Eti tuummane, “An eti Waakh rumanka yahe a garda,” essi, i'daasenyi amurreti Waakh iraahin beene gooche, toro la runti Waakh goytiis ma kijirto.
[5] I'daasenyi eti tuummane Yeedi Waakh raaho, 'dooninti Waakh rumanka tuume goytiis kijirta. Saggane saggi inno ichoow Waakh ba wohoo kalday inahe igaranna.
[6] Eti tuummane Waakh goytiissa kijira essi, jiroti Yeesso jire iche jira.
[7] Aalasseeyki an weyti 'doono, amura an atin isoochiiro, koo husub menye, a ki raagane atin uus uumaccho ka atin khabteen on. Amura raagane, “Taba, is'doona,” essi, a farniinki atin daagteen on.
[8] Eheet a, amuroo husube atin isoochiira. Runtiis goytiis ichoow goytiinna lakaarga. A mehe banayhi rummaat a bildiikhaane, mug'di la baaba.
[9] Eti tuummane banay goya kaassohta essi, i'daasenyi etiiskoo Kiriisto rummeeste nihib, uliba mug'di goya kajira.
[10] Eti tuummane etiiskoo Kiriisto rummeeste 'doono la, banay goya kijira, wohoo rucchule goytiis ka tarraantarricho ma jiraan.
[11] I'daasenyi, eti tuummane etiiskoo Kiriisto rummeeste nihib, i'di eti indo laa u mug'di goya kasohta. Inti us isohti ma garti, a mehe uskeel i'di mug'duu indo a 'duu'de.
[12] Nyaakhuteeyki an weyti 'doono, waansihane atin isoochiira, a mehe jeenteti magah Yeessuu, Waakh uskeeliin a atin ikakute.
[13] Atinhi ooyenyee, waansihane atin isoochiira, a mehe atin ki geeddi harra liisoouumin laka jire a garatteen. Atinhi nunnugul, waansihane atin isoochiira, a mehe atin Seytaanki uskeel leh a soorisseen. Nyaakhuteeyki an weyti 'doono, waansihaase atin isoochiira, a mehe atin Waakkhi Aabbaheene a garatteen.
[14] Atinhi ooyenyee, waansihaase atin isoochiira, a mehe atin ki geeddi harra liisoouumin laka jire a garatteen. Atinhi nunnugul, waansihaase atin isoochiira, a mehe atin a tihe, Yeedi Waakh la goytiinna kijira, toro la Seytaanki uskeel leh a soorisseen.
[15] Taba harrata suuje ichoow wahanyeyyohi harratane sussuuje a'doonina. Eti tuummane wahanyeyyohi harratane sussuuje 'doono, 'dooninti Aabbaheen goytiis ma kijirto.
[16] A mehe wahanyeyyohi harrata a i'di maanta wihi 'doo'd uurassicho goya kijiro uskeel imoono ichoow 'doo'di wihi us argo tuumman iildeerroti ichoow 'doo'di wihi us khabo ichoow wihi us yeelo keeylajo. Suujoonka tuumman Waakkhi Aabbaheene ma kayamiite, wihi keeno a wahanyeyyohi harratane la'doono.
[17] Harrata suuje ichoow suujoonkicheki liimoono a kutaane, i'daasenyi eti wihi Waakh 'doono yeelo, jirtuu tuumman a jira.
[18] Nyaakhuteeyki an weyti 'doono, waha a ibeenneti 'da'ddaboot. Saggi goorat atin idaagteen u la, eti Kiriisto igafo a yamiit. Toolla laka 'doo'di ittaawenye Kiriisto igafo a yimiy. I'da ka la saggi waha ibeenneti 'da'ddaboot iyahiin a garanna.
[19] 'Doo'da goyteenna kabahe i'daasenyi rumanka keen ma eheynan. A mehe chi' rumanka goorat icho keen yahiin, a inno leefiddiyaan. I'daasenyi katabinti icho inno katabeen, saggi koo kalday laka keen ieheynane tusa.
[20] I'daasenyi Kiriistohi Munyee Rubeyti Munyee ka a atin subhe, atin tuumman la runti Waakh a garattaan.
[21] Jeenteti atin runtaas igaran mee khadaaba atin ikasoochiiro, a jeenteti atin igarattaan ichoow jeenteti beentoo rucchul laka rum ikiimaatan.
[22] Kamalda bal, eti been leh a ayyee? Eti been leh a eti saggi Yeesso Ki Lasubhe iyahe 'dii'do. Eti i'dee a eti Kiriisto igafo. Us Waakkhi Aabbaheene ichoow Weeli Waakh ba a 'dii'ddanyahe.
[23] Eti tuummane Weeli Waakh 'dii'do, Aabbaheen ma khabo. Eti saggi Yeesso Weeli Waakh iyahe cheeko tuumman la, Aabbaheen laka a khaba.
[24] Maantaka, taba gi'de wori atin uus uumaccho ka atin daagteen goytiin a fiddiyo. Chirri woraas goytiin fiddiyo, atin laka Weeli Waakh ichoow Waakkhi Aabbaheene goychooda fiddiitaan.
[25] Waha la a wihi Kiriisto inno iayyiche, a jiroti jirtuu imassanne inno 'hello.
[26] Wahanyeyyoha an atin isoochiiro, 'doo'di jit atin bujin 'doono miinsanyahiin.
[27] Atin ka la, Kiriisto Rubeyti Munyee ka a atin subhe. Subahnaanka us atin subhe la goytiinna fiddiya. Maantaka etoo addane wihi rummaat atin abcho ma 'doontaan. I'daasenyi Rubeyti Munyee walah tuumman a atin abissa, wihi iche atin abisso la been menye, a rum. Maantaka i'di Rubeyti Munyee atin iabissuu, taba gi'de Kiriisto goytiis fiddiya.
[28] Maantaka nyaakhuteeyki an weyti 'doono, taba Kiriisto goytiis fiddiya, 'dee maanti us soobaho ka, uus inno roorro khabine toro la uryaawin emeettiis ka.
[29] Cha'atin saggi Kiriisto ifissanyahe garattaan, saggi 'doo'di tuummane wihi fissan yeelo nyaakhuti Waakh iyahe a garattaan.