[1] Aalasseeyki an weyti 'doono, eti tuummane rubeytoo woyto mee rummeysattaan. I'daasenyi taba 'doo'daas rubeyohoo woyaan fiiricha, 'dee wihi icho atin abchaan icho Rubeyti Waakh kayimiy fiiricha. I'di tahe 'doo'di ittaawenye 'doo'di Waákh íyeyyeedo iskaayyeelo harrata a itabe.
[2] Saggane eti Rubeyti Waakh khabo iabattaan. Eti tuummane rubeytiis woyto Yeesso Kiriisto uummanki weeli enenyete kayimiy cheeko, Waakhe kayimiy.
[3] I'daasenyi eti tuummane rubeytiis woyto waha Yeesso miinsan cheekin 'dii'do, Waakh ma kiimaatan. Etaas ginnati eti Kiriisto igafo katamiite khaba. Atin saggi eti Kiriisto igafo iyamiit a daagteene, ulla toolla laka harrata a kijira.
[4] Atinhi nyaakhuteeyenye an weyti 'doono, atin a ki Waakhe toro 'doo'daas a soorisseen gon. A mehe Rubeyti Munyeenye goytiin kijirto, Seytaanki harrata kijiro a kussantahe.
[5] 'Doo'daas beenaate Waákh íyeyyeedo a ki harrata suujenye, maantaka wori harrata kayimiy on cheekaane, 'doo'di harrata la icho nabah a isuda.
[6] Inno a ki Waakhe eti tuummane Waákh garti la wihi inno 'doo'd abinno a raaha. I'daasenyi eti Waakh ikiimaatan ma inno daago. Saggane eti Rubeyti Waakh khabo ichoow ki rubeyti beenaate Seytaan khabo seley ibihinna.
[7] Aalasseeyki an weyti 'doono, 'doonine Waakhe katamiit gone, taba gi'de a is'doonno. 'Doo'di tuummane 'doo'di addan 'doono la a nyaakhuti Waakhe toro la Waakh a gartaan.
[8] Eti tuummane enenyet i'doonin, Waakh ma garti, a mehe Waakh wihi us yeelo tuumman 'doonintiissa kayeela.
[9] Waakh saggane 'doonintiis inno ituse, Weeliiski kaldaye harrata isooerge, 'dee Weeliiska ka jirra.
[10] 'Doonine talla, inno mee Waakh 'doonne, i'daasenyi usu inno 'doone toro Weeliis sooerge, soorriyotiis ka, holi Waakhe uskeeleen keeno bahcha.
[11] Aalasseeyki an weyti 'doono, Waakh weyti a inno 'doone gone, taba gi'de inno laka a is'doonno.
[12] Et injire Waákh arge mele. I'daasenyi chirri inno is'doonno, Waakh goyteen a fiddiya, 'doonintiis la goyteen ka tuume tateeh.
[13] Saggi inno goytiis ikijirro ulla goyteen ikijiro a garanna, a mehe us Rubeytiisti Munyee a inno siiche.
[14] Inno saggi Waakkhi Aabbaheene Weeliis isooerge, 'dee us 'Doorribehi 'doo'di harrata iyateeh a agarre, toro la a cheekna.
[15] Eti tuummane saggi Yeesso Weeli Waakh iyahe cheeko, Waakh goytiissa fiddiya ulla Waakh goytiis fiddiya.
[16] 'Dooninti Waakh inno 'doono a garanna, toro la 'doonintaas a kakhuufna. Waakh wihi us yeelo tuumman 'doonintiissa kayeela. Eti tuummane Waakh ichoow 'doo'di addan 'doono, Waakh goytiissa fiddiya, ulla Waakh goytiissa fiddiya.
[17] I'da ka 'dooninti inno is'doonno tuume tateehe, 'dee ibeenki enenyet lahukkumo ka, roorro inno khabno mele. I'di tahe harrata ka inno a i'diissa.
[18] 'Dooninti Waakh roorro mele. I'daasenyi 'doonintiisti tuume roorro goyteen a kabihissa. I'di tahe roorro wihi keeno, saggi Waakh weeli enenyet sirbi igesso iche luuloota. Eti roorro khabo 'doonin ka tuum ma lakayeelin.
[19] Inno Waakh ichoow 'doo'di addan a 'doonna, a mehe Waakhe kolooraat inno 'doonee.
[20] Chi' etoo, “An Waakh a 'doona,” essi, i'daasenyi etoo addane koo Kiriistee nihib, etaas beene leeyahe. I'di tahe eti tuummane etoo koo Kiriisteenye us arge i'doonin, Waakkhi us iargin 'doonin ma yabuu'd.
[21] Amuri Waakh rubeytiis inno siiche mehe yadeeh ya, eti tuummane Waakh 'doono, eti tuummane koo Kiriistee laka a 'doono.