[1] Eti nah woriis atin isoochiirro, a ki goorat geeddi wohoo rucchul laka liisoouumin jire. Nah usu a daagne, indoheenyo ka la a agarre, 'dey'doonne, toro la dahanoheenyo ka laka usu a 'daarre. Eta Yeedi jiree iche woriis cheekna.
[2] Eta la a nah isoobahe, nah usu a agarre, runti usu miinsane cheekna. Toro la eta jiroti jirtuu imassan khabo, goorat Aabbahiis leejire nah isoobahe iche atin isoocheekna.
[3] Wihi nah agarre toro nah daagne, iche atin isoocheekna, 'dee atin ichoow nah ba kulankoo kalday khabna. Toro la Waakkhi Aabbaheene ichoow Yeesso Kiriistohi Weeliise kulankoo kaldaye leekhabna.
[4] Wahane atin isoochiirra, 'dee hamaadeenyo tuum kayeella.
[5] Farniinki nah Weeli Waakh kadaagne nah atin isoocheekno kalla, Waakh a banaye, mug'dihoo rucchul laka goytiis ma kijiro.
[6] Chirri inno ichoow Waakh ba kulankoo kaldaye khabna elanni eheet a, mug'di goya kaassohanni, inno beene goonna runti Waakh la ma jirro.
[7] I'daasenyi chirri inno banay goya kaassohanni saggi us banay goya ikajiruu, inno tuumman kulankoo kaldaye khabna, diig Yeessohi Weeli Waakhe la uskeeleen tuumman a inno kadikha.
[8] Chirri inno uskeel ma khabno elanni, inno a isekkeysanna, runti Waakh la goyteen ma kijirto.
[9] Chirri inno uskeeleen Waakh icheekanne, usu a lakakhuufa toro wihi rummaat on yeela, uskeeleen a inno ikakuta toro la khollookh tuumman inno kadikha.
[10] Chirri inno uskeel ma yeelin elanni, inno Waakh eti been lehe kayeella, toro la yeediis i'daaru laka ma raahno.