[1] 'Dooninti Waakkhi Aabbaheene inno 'doono eenna a buure. Waakh rubeytiis laka nyaakhutiissa inno yadeeh! Rumanka la inno a nyaakhuti Waakh! Maantaka 'doo'di harrata ma inno garti, a mehe icho Waakkhi Aabbaheene ma gartaane.
[2] Aalasseeyki an weyti 'doono, inno toolla a nyaakhuti Waakh. Wihi berri inno nateeh la ma inno latusin. I'daasenyi wihi inno garanni, maanti Kiriisto soobaho inno laka i'diissa nateeh, a mehe maantaas i'di rumanka us yahe a agarra.
[3] Eti tuummane khajjeela khabo mi'dabe iskayeela, saggi Kiriisto rubeytiis mi'dab iyahuu.
[4] Eti tuummane uskeel yeelo, amuri Waakhe jebcha. Rumanka uskeel a hugun'darri.
[5] I'daasenyi saggi Yeesso iyimiyye 'dee uskeeleen inno ikabahcho a garattaan. Ulla uskeeloo rucchul laka ma yeelin.
[6] Et Kiriisto goytiis kijiro uskeel goya kaassohti mele. Et uskeel goya kaassohti, Kiriisto arge ommos garti mele.
[7] Nyaakhuteeyki an weyti 'doono, uus etoo kalday laka jit atin bujin. Eti wihi fissan yeelo a fissanyahe, saggi Kiriisto ifissanyahuu.
[8] Eti tuummane uskeel yeelo a ki Seytaan, a mehe Seytaan uus uumaccho ka us uskeel on yeela. Weeli Waakh a yimiyye 'dee hili Seytaan baabiicha.
[9] Etoo kaldaye nyaakhuti Waakhenye uskeel goya kaassohti mele. Us jiroti Waakhe husube jira, uskeel goya kaassohan ma yabuu'd, a mehe us a nyaakhuti Waakh kichokoo.
[10] Saggane nyaakhuti Waakh ichoow nyaakhuti Seytaan seley ibihinna. Eti tuummane wihi fissan iyeelin, ki Waakh mee. Eti tuummane etiiski Kiriisto rummeeste i'doonin laka ki Waakh mee.
[11] Waha a farniinki atin uus uumaccho ka atin daagteene, taba a is'doonno.
[12] I'di Kaayinhi koo Seytaanki uskeel lehe walaaliis dubunuunu yigis iitaahana. Kamalda bal, us a i'doh walaaliis dubunuunu iyigis? A jeenteti jiro Kaayin suuj itahe, too walaaliis la ifissantahe.
[13] 'Doo'deeyki Kiriisto rummeeste, chirri 'doo'di harrata atin nibhaate agirmeysanna.
[14] Saggi inno omoot i'dallaabsanne inno jiroti jirtuu imassan ikhabno a garanna, a mehe inno 'doo'di Kiriisto rummeeste a 'doonna. Eti etoo koo Kiriistee i'doonin la, omoot goya fiddiya.
[15] Eti tuummane etiiski Kiriisto rummeeste nihib, a i'doo us dubunuunu diig gele. Wihi atin garattaan la, et dubunuunu diig gele jiroti jirtuu imassan 'helo mele.
[16] Saggane wihi 'doonine tahe igaranna. Yeesso Kiriisto jirotiis a inno isoobahche. Inno laka innohi 'doo'deenki Kiriisto rummeeste jiroteen ibihinno la'doona.
[17] Chirri etoo hoolahi harrata khabo etoo addane koo Kiriisteenye walah laa argo i'daasenyi etaas uur ikasoonugleysan, 'dooninti Waakh saggoh goytiis ikijirta?
[18] Nyaakhuteeyki an weyti 'doono, uus inno yeed ommos af on ka 'doo'di addan 'doonine, wihi inno yeello ichoow wihi rummaat ka 'doonno.
[19] Saggane 'deerka rumanka saggi inno 'doo'di Waakh inahe iabanna, toro la Waakh ortiis ka uurasseen nebey i'helaan.
[20] A mehe chirri uurasseen uskeel inno igoochaan laka, Waakh uurasseen a kaweenyahe, ulla walah us igaran mala.
[21] Aalasseeyki an weyti 'doono, chirri uurasseen uskeel inno ikagoon, Waakh ortiis ka roorro inno khabno mele gon.
[22] Waakh la walahbaaw inno daahne ka a inno siicha. A mehe inno amurretiis a raahna, toro la jiroti usu kahamaadisso jirra.
[23] Amuri Waakh inno siiche kalla, Yeesso Kiriistohi Weeliise rummeesda, toro la saggi us amur inno isiichuu, is'doona.
[24] 'Doo'di tuummane amurretiis raaho, Waakhe leefiddiya Waakh la icho leefiddiya. Rubeyti Munyeenye Waakh inno siiche ka la, saggi us inno ileefiddiyo a garanna.