[1] Khadaaba eti soochiiro a anihi ewweenenye urur Kiriisto woyo. Eti ani isoochiiro a ati, makhaabassi lasoobahsate ichoow nyaakhutaahha. An rumanka weyti atin 'doona. Ani kalday la menye, eti tuummane runti Waakh garti a atin 'doona.
[2] A mehe runta goyteenna fiddiita, jirtuu tuumman la rubeyoheen goya fiddiita.
[3] Waakkhi Aabbaheene ichoow Yeesso Kiriistohi Weeli Aabbaheene ba rum ichoow 'doonin ka inno imaalaane, uur inno isoonugleestaane, nebey inno kakaalaan.
[4] An weyti hamaade cha'an nyaakhutaahki gaasoo usuhi runti Waakh raaho arge, saggi Waakkhi Aabbaheene amur inno isiichuu.
[5] Maantaka makhaabassaneey, amura an kisoochiiro koo husub menye, a ki uus uumaccho ka inno khabne one, a kihawwaasdee, taba a is'doonno.
[6] 'Doonine la talla, jiroteen ka amurretiissa raahna. Saggi atin uus uumaccho ka idaagteen u, amuriis a ki atin is'doontaane, taba jirotiin ka is'doona.
[7] 'Doo'di ittaawenye enenyet ekkeesti, saggi Yeesso Kiriisto harrata uummanki weeli enenyet ikayimiy icheekin harra a kataa'he. Eti i'dee tuumman a ki enenyet ekkeesti, toro la a eti Kiriisto igafo.
[8] Taba isyaakhicha uus hili atin Waakh ihaaggisseen ki ilmarhaatteet eheynane, Waakh tuum a atin guto.
[9] Eti tuummane wihi Kiriisto 'doo'd abche iraahine, wihi awtiis kakhaye, Waakh ma khabo. Eti tuummane orey isohti wihi Kiriisto 'doo'd abche khuccho, Waakkhi Aabbaheene ichoow Weeli Waakh ba a khaba.
[10] Chi' etoo atin iyimiyye ulla wori us keene, wori Kiriisto enenyet abche buusanyahe, etaas urantiin laka asoogelinna ommos bariito laka abariitinna.
[11] Eti tuummane eti i'dee martiisti, hilaas weyti suujenye etaas haaggicho iche ullaka leegisma.
[12] Wihi noole an atin isoochiirin 'doono a khaba, i'daasenyi khadaab ichoow ringi kasoochiirin ma 'doono. Anihi atin soo'daaro iche khajjeela, afiin 'hela 'dee weyti isleehamaana.
[13] Nyaakhut walaassaahti Waakh soobahsate weyti a atin soobariitiche.