[1] Aalasseeyki an weyti 'doono, waha toolla a khadaabeeyki lammaatteete an atin isoochiire. Khadaabbe lammache ka wihi atin 'hor abatteene atin kasoo'helcha, 'dee mali haaggan khabtaan.
[2] Atinhi wihi goorat 'doo'di munyayyeenye Waákh íyeyyeedo cheeke kasoo'hessaane 'doona. Toro la atinhi amurreti Kamureenki toro 'Doorribee miinsane ergaano atin isoocheekte kasoo'hessaan iche 'doona.
[3] Koloo la waha abda, ibeenneti 'da'ddaboot ka 'doo'di runti Waakh kachaarti toro suujoonki uurassicho imoonaan kalday on yeelo a soobaha.
[4] Mehe atin idowaan ya, “Emeetti goorat us ayyiche meete? A mehe aacchinyeteen a tuunte walah tuumman la a i'di maanti goorat harra lasoouume on.”
[5] I'daasenyi dib on u saggi Waakh goorat archiiy yeedi afiissa on ka serey ichoow harra ba isoouume dabaan. Toro la dib on u saggi us harrati kafafsane bicche lakasoohaaggiche, bicche kamarsanyahiin dabaan.
[6] Bicchehaas on jiti 'duleyi buure ka maantaas harra lasuujaache. 'Duleye lakeene wihi harra kajire tuumman lamassiche.
[7] Waakh la yeedaas afoot on ka serey ichoow harrata saggi toolla icho ijiraan on i'diicha ichoowka ibeenki us 'dab kagubo baabiicho yateeh. Ibeenkaas Waakh 'doo'di usu igaran a hukkuma toro la bar tira.
[8] I'daasenyi aalasseeyki an weyti 'doono, waha akadabina. Kamur ka, ibeenkoo a i'di gu'h alifoo, gu'h alifoo la a i'di ibeenkoo.
[9] Kamur wihi us ayyiche ka ma soomalmalo i'di 'doo'd gaasoo malmalli ikhaatuu. Us a atin igarrahsata a mehe usuhi etoo kalday laka iumaatane, i'daasenyi enenyet tuumman uskeel kasoonokhti iche 'doona.
[10] I'daasenyi ibeenki Kamur i'di eti walah hato iyamiit. Maantaas la sereyta daayan saggi uskule iyeedda, baabaata. Wahanyeyyohi sereyta kajiro tuumman la a gubtaane bar waayaan. Toro la harra ichoow wihi harra kajiro tuumman laka a laguba.
[11] Walah tuumman saggane liibaabiicha gone, atinhi jiroti munyee ichoow jiroti Waakh kahamaado jirtaane la'doona,
[12] geeddi atin ibeenki Waakh sugtaane atin ibeenkaas itirriinsattaan. Maantaas la sereyta daayan ichoow wahanyeyyohi kijiro tuumman a gubtaane bar waayaan.
[13] I'daasenyi wihi Waakh ayyiche ka, sereytoo husub ichoow harratoo husube walah tuumman fissanyahiine sugna.
[14] Maantaka aalasseeyki an weyti 'doono, geeddi atin wahaas sugtaan weyti tirriinsada, 'dee atinhi usu nebey ikhabtaane uskeeloo rucchul laka ikhabine eloo rucchul laka ikhabin a atin sooeleelo.
[15] Waha la abda, samacchaari Kamureen ribnaanki us enenyet ribo ikhaata. Walaaleenki inno 'doonno Baawulo layadeeh laka kharati Waakh siiche ka waha a atin isoochiire.
[16] Baawulo khadaabbetiis tuumman ka, wahanyeyyohi emeet Kiriisto miinsan a kaayyeeda. Khadaabbeti Baawulo chiiro meelassoo, wihi us kaayyeedo abane a miig. 'Doo'di waha foolicho ikhabin ichoow ki yeed Yeesso goya kahusube mujjum hiiyyay ibihin la, wihi yeediis essi tuummane urgiyicha. 'Doo'da la Chiirnaanneti Waakh tuumman saggaas on ibaabula. I'da ka bakkinnaanki labakkicho iche isikeenaan.
[17] Maantaka aalasseeyki an weyti 'doono, waha orey on garatteen gone taba isyaakhicha. Uus suujoonki 'doo'di hugumme iraahin atin ekkeysanne luhlo atin kakhaatin. 'Doo'da i'dane atin yeela 'dee kakhuufnaanki atin Waakh kakhuuftaane isesseehin ka kuftaan.
[18] I'daasenyi haaggi Waakhe buure ichoow abanti atin Yeesso Kiriistohi Kamureenenye 'Doorribeheene abattaan ka weynaada. Toolla ichoow jirtuu tuummamba us ba koolo 'hela! Aamiin.