[1] Noqa Pablumi Jesucristupa apostolnin kaykä. Apostolnin kanäpaqmi salvakuq Tayta Dios y yärakushqansi Señor Jesucristo churamash.
[2] Timoteo, Jesucristuman yärakushpayki kuyay surïno kaptikimi kay cartata cartakaykämü. Papäninsi Tayta Dios y Señor Jesucristupis kuyapäshushpayki ali kawanaykipaq yanapaykuläshunki.
[3] Macedonia provinciaman aywarmi Éfeso markacho qamta kachaykamurqä lutan yachasikuqkunata michänaykipaq.
[4] Say lutan yachasikuqkunaqa yarpaylankunapita yachasirmi unay tiempu imanöpis kashqanta y unay ayllunkuna pï kayashqanta yachasiyan. Saykunata yachasiyaptinmi Tayta Diosman yärakuyänanpa trukan manakaqkunapita rimanakular kawaykäyan.
[5] Say lutan yachasikuqkunata michänaykipaq nikä wawqi panikuna rimanakuyänanpa trukan kuyanakuyänanpaqmi. Sayno kuyanakuyänanpaqqa mana jusalikuypa alilata rurar kawayäsun y lapan shonqunwan Tayta Diosman yärakuyäsun.
[6] Say lutan yachasikuqkunaqa kuyanakuyänanpa trukan manakaqkunapita rimanakularmi kawayan.
[7] Tayta Diospa leyninkunata selläma yachaq kayashqanta nirpis senqan maycho kashqantapis manami musyayansu.
[8] Musyansimi Tayta Dios munashqanno kawayänanpaq yachasishqaqa leyninkuna ali kashqanta.
[9] Manami jusaynaq runakunapaqsu leyninkunata Tayta Dios kamariparqan, sinöqa jusalikuqkunapaqmi. Saymi leyninkuna kaykan mana cäsukuqkunapaq, fiyu runakunapaq, jusasapakunapaq, Tayta Diosta manakaqman churaqkunapaq, mamanta y taytanta maqaqkunapaq y runa mayinta wanusiqkunapaq.
[10] Saynöpis kaykan majanta qanrataqkunapaq, olqupura kakuqkunapaq, warmipura kakuqkunapaq, runa mayinta rantikuqkunapaq, lulakuqkunapaq, manakaqta jitapar runa mayinpa contran sharkuqkunapaq y ali yachasikuyta mana cäsukur ima jusatapis jusalikuqkunapaqmi.
[11] Sayta nikan alabash Tayta Diospa ali wilakuyninchömi. Wilakuyninta wilakunäpaqmi Tayta Dios kachamash.
[12] Señorninsi Jesucristutami agradëcikü wilakuyninta wilakunäpaq yanapämashqanpita. Saynöpis agradëcikü yärakamashpan wilakuyninta wilakur purinäpaq churamashqanpitami.
[13] Nawpataqa Jesucristuta manakaqman churarmi payman yärakuqkunatapis ashi ashiykur carcilman wichqasirqä. Mana musyaynïpa sayno rurash kaptïmi Tayta Dios kuyapämar perdonamash.
[14] Perdonamashpanmi tantiyasimash Jesucristuman yärakur pïmaytapis kuyapänäpaq.
[15] Jusasapa runakunata salvananpaqmi kay pasaman Jesucristo shamush. Rasun kaqta nikaptïqa pïmaypis criyiyäsun. Noqalätapis lapan runakunapita mas jusayuq kaykaptïmi
[16] kuyapämar salvamash. Sayno salvamarqan Jesucristo perdonakuq kashqanta wakin runakunapis tantiyakur payman yärakuyänanpaq y mana ushakaq kawayta tariyänanpaqmi.
[17] ¡Tayta Diosmi imayyaqpis munayyuq rey, imayyaqpis kawaq y mana rikakaq kaykan! Pay japalanmi Dios kaykan. [Manami pipis payno yachaq kansu.] ¡Imayyaqpis alabash kaykuläsun! ¡Amén!
[18] Kuyay Timoteo, Tayta Diospa jutincho wawqikuna niyäshushlaykitami noqapis qamta yäsï: Ali soldädu mana mansariypa pelyashqanno qampis mana mansariypa Jesucristupa wilakuyninta wilakuy.
[19] Sayno wilakushpayki Jesucristuman yärakur Tayta Dios munashqanno imaypis kaway. Wakin runakunaqa Tayta Dios munashqanno manana kawarmi Jesucristuman yärakuyannasu.
[20] Saynölami Alejandruwan Himeneupis qepaman kutikuyash. Paykunatami Satanáspa makinman entregashkä. Saynöpa capazchir tantiyakur lutanta yachaykäsiyashqanta kacharir Jesucristuman yapay yärakuyanmanpis.