[1] Awkinkunata ama olqutupaysu. Saypa trukanqa taytaykitano respitashpayki ali shimilaykipa tantiyasiy. Maqtakunatapis wawqikitano ali shimilaykipa tantiyasiy.
[2] Chakwankunatapis mamaykitano respitashpayki ali shimilaykipa tantiyasiy. Saynöla jipashkunatapis panikitano respitay.
[3] Aylluynaq viüdakunata imalawanpis yanapäyay.
[4] Isanqa mayqan viüdapapis wawankuna o wilkankuna karqa paykuna yanapäyäsun. Kuyar ashmashqanta ama qonqäyäsunsu. Sayno yanapaptinmi Tayta Dios kushikun.
[5] Aylluynaq kaq viüdakunaqa Tayta Diosman yärakurmi paqasta junaqta payta manakuyan.
[6] Jusalikuyman churakash viüdakunami isanqa wanush japuy kaykäyan.
[7] Ayllunkuna viüda kaptinqa yanapäyänanpaq wawqi panikunata yachasiy. Yanapäyaptinqa manami pipis jamuräyanqasu.
[8] Mamanta, awilanta y wayincho taqkunata mana kamaripaptinqa Tayta Diosman yärakushqanpis manakaqlapaqmi kaykan. Tayta Diosta mana cäsukuq runapitapis peormi kaykan.
[9] Viüdakunapa jutinkunata listaman churanki soqta chunka (60) watayuq kayaptinraq. Saynöpis kayanman juk runalawan tash,
[10] alita rurayashqanpita shumaq respitash, wamrankunata shumaq ashmaq, wayinman chaqkunata posädasiq, Diosman yärakuqkunata ali shonqunwan yanapaq, muchuqkunata kuyapaq y alita ruraq.
[11] Manaraq soqta chunka (60) watayuq kaq viüdakunataqa listanman manami churankimansu. Paykunaqa mana yapapakuypa Jesucristuta sirviyänanpaq promitirkurpis runayuq kaytami yapay munayan.
[12] Yapapakurmi Jesucristuta promitishqantapis mana cumplir jusayuq rikakuyan.
[13] Qelan waqaptinmi rurayninkunata kachaykur wayin wayin purikuyan. Saynöpis tulu shimi y rayan wishla kayashpanmi manakaqkunata parlar purikuyan.
[14] Sayno mana kayänanpa jipashlaraq viüdakunaqa runawan yapay majasakäyäsun, wawankunata ashmayäsun y wayincho rurayninkunata rurayäsun. Sayno kawayaptinqa contransi kaqkuna manami jamurämäshunsu.
[15] Wakin viüdakunaqa Jesucristuman yärakuykäyashqanta kacharirmi Satanás munashqannöna kawaykäyan.
[16] Mayqan [wawqipapis o] mayqan panipapis aylluncho viüda kaptin paykuna ashmayäsun. Saynöpami wawqi panikuna shuntayashqan aypanqa aylluynaq viüdakunata yanapäyänanpaq.
[17] Diospa wilakuyninta wilakuq y yachasiq mayor wawqikunata shumaq respitar ali pägayäsun. Saynöla shumaq mandaq mayor wawqikunata respitar pägayäsun.
[18] Tayta Diospa palabranpis kaynömi nikan: “Ëracho trillaptin töruta ama shinqalwayankisu”. Saynöpis kaynömi nikan: “Arupakuq runata ama dembaldilaqa arusinkisu”.
[19] Mayor wawqi jusalikuykashqanta ishkaq o kimsaq nishuptikiraq cäsupanki. Juk runala niptinqa ama cäsupankisu.
[20] Jusalikuyta mana kachariptinqa lapanpa nawpancho payta rimanki. Sayno rimaptikimi wakinpis mansapakur mana jusalikuyänanpaq tantiyakuyanqa.
[21] Tayta Diospa, Señor Jesucristupa y payta sirviq angilkunapa nawpanchömi qamta nï: Pipapis favornin mana sharkuylapa kay nishqäkunata cumplinki.
[22] Mayor wawqi kananpaq churayta munar pipa umanmanpis makikita lutalaqa ama churankisu. Jusalikuq runaman makikita churarqa qampis jusayuqmi kanki. Kikikipis Tayta Dios munashqannöla kaway.
[23] Pacha nanaywan saynöla qeshyarqa yakulata upunaykipa trukan vïnuta ichik upurkunki.
[24] Wakin runakuna jusalikuyashqanqa manaraq tapuptikipis juklami musyakan. Wakin runakuna jusalikuyashqanmi isanqa nirkurraq musyakan.
[25] Saynölami wakin runakuna alita rurayashqanpis jukla musyakan. Wakinpanami isanqa nirkurraq musyakan.