[1] Mayor wawqi kayta munaqkuna alitami yarpaykäyan. Say nishqäqa rasun kaqmi kaykan.
[2] Mayor wawqikuna kayanman pipitapis mana jamurash, juk warmiyuqla, shumaq tantiyakuq, shumaq yarpachakuskir imatapis ruraq, pïmaypitapis respitash, posädasikuq y shumaq yachasikuq.
[3] Saynöpis kayanman mana upyaq, pitapis mana wajupaq, kuyapäkuq, qellaylapaq mana wachakash
[4] y warminta y surinkunata shumaq ashmaq. Saynöpis surinkunata yachasiyanman cäsukuq y respitakuq kayänanpaq.
[5] Wayincho taqkunata shumaq mana yachasirqa ¿imanöparaq Tayta Diosman yärakuqkunata yachasiyanman?
[6] Jesucristuman sayraq yärakuykaqkunaqa manami mayor wawqi kayanmansu. Yachaq tukurqa diablu maldicionash kashqannömi paykunapis maldicionash kayanqa.
[7] Jesucristuta mana chaskikuq runakunapis rikakuyänanpaq mayor wawqikuna ali kawayäsun. Ali kawayaptinqa paykunapa contran manami pipis parlayanqasu y diablupis toqlanman ishkisinqasu.
[8] Saynöpis diäcunukuna kayanman respitash, imatapis awnishqanta cumpliq, mana upyaq y rïcu kayta munar mana sakyapakuq.
[9] Jesucristupa wilakuyninta yachakuyashqannöla mana jusalikuypa kawayanman.
[10] Diäcunu kananpaq manaraq churar imano kawayashqantapis shumaqraq musyayanman. Ali kawayashqanta musyaykurraq diäcunu kayänanpaq churayanman.
[11] Diäcunupa warminpis kanman respitash, pitapis mana tumpaq, shumaq tantiyakuq y awnishqanta imaypis cumpliq.
[12] Diäcunukunaqa juk warmiyuqla kayanman. Warminta y surinkunata shumaq ashmayanman.
[13] Diäcunu kayninta shumaq cumplirqa pïmaypitapis ali rikashqami kayanqa. Mana mansariypami Jesucristuman yärakuyashqanta wilakuyanqa.
[14] Timoteo, shamuyta yarparpis puntataqa cartakaykämülaraqmi.
[15] Jukla mana shamuptïpis kay cartata liyirnami tantiyanki wawqi panikunata imano rikanaykipaqpis. Noqansiqa imayyaqpis kawaq Diospa iglesian karmi wilakuyninta wilakunsi y lutan yachasikuqkunata corriginsi.
[16] Tayta Dios musyasimashqansi wilakuynin shumaqmi kaykan. Say wilakuynin kaynömi nikan: Jesucristumi runanöla yurirqan. Wanushqanpita Espíritu Santumi kawarisimurqan. Angilkunapis payta rikayarqanmi. Mana Israel runakunatami wilakuyninta wilakuqkuna wilapäyarqan. Maysaychöpis paymanmi yärakuykäyan. Gloriaman kutiykur Tayta Diospa nawpanchönami kaykan.