[1] Espíritu Santumi tantiyasimansi shamuq watakunacho wakin runakuna Jesucristuman yärakuyashqanpita qepaman kutikur supaykuna munashqanno lutanta yachasiyänanpaq kashqanta.
[2] Ishkay cära karmi lutankunata yachasirpis penqakuyanqasu.
[3] Say lutan yachasikuqkunaqa majayuq kay mana ali kashqantami niyanqa. Saynöpis wakin mikuykunata mana mikunansipaq kashqantami niyanqa. Mana ali kashqanta niyaptinpis Jesucristuman yärakuqkuna agradëcikur mikuyänanpaqmi Tayta Dios kamash.
[4] Tayta Dios kamashqankunaqa lapanpis alimi kaykan. Majayuq kaypis Tayta Diospitami kaykan. Sayno kaykaptinqa payta agradëcikur mikuytapis y majayuq kaytapis manakaqman ama churashunsu.
[5] Tayta Diospa palabranta tantiyakur y payta manakur agradëcikuptinsiqa mikuykunapis y majayuq kaypis alimi kaykan.
[6] Kay cartacho qelqashqäkunata wawqi panikunata shumaq yachasirqa Jesucristupa ali sirviqninmi kanki. Tayta Diospa wilakuyninta yachakurqa y pay munashqanno kawarqa ali alimentakushnömi kanki.
[7] Runakuna lutanta yachasishqankunata ama chaskipaysu. Puklaqkuna fïsicata rurayashqanno qampis Tayta Dios munashqanno kawanaykipaq yachakuy.
[8] Física rurayqa kay pasacho kawashqansiyaqlami ali kaykan. Tayta Dios munashqanno kawaymi isanqa kay pasacho y gloriachöpis ali kawanansipaq kaykan.
[9] Kay nishqäqa rasun kaqmi kaykan. Saytaqa lapan runakuna chaskikuyäsun.
[10] Sayta tantiyarmi imayyaqpis kawaq Tayta Diosman yärakur imano nakarpis wilakuyninta wilakuykansi. Paymi Jesucristuta chaskikuq kaqtaqa pïmaytapis salvan.
[11] Kay cartacho qelqamushqäkunata wiyakuyänanpaq yachasiy.
[12] “Maqtalaraq kaykar ¿imanöpataq Timoteo yachasimäshun?” niyaptinpis ama cäsupaysu. Saypa trukanqa wawqi panikuna rikakuyänanpaq ali shimilaykipa pïmaywanpis parlay, mana jusalikuypa kaway, runa mayikita kuyapay, Tayta Diosman imaypis yärakuy y pay munashqanno kaway.
[13] Chämushqäyaq Tayta Diospa palabranta wawqi panikunata liyipanki, yachasinki y shakyäsinki.
[14] Jesucristuta sirvinaykipaq Espíritu Santu churaykäshuptikiqa lapan shonquykiwan imaypis sirviy. Sayno churashushkanki profëtakuna qampaq wilakuyaptin y mayor wawqikuna umaykiman makinta churaykur Tayta Diosta manakuyaptinmi.
[15] Kay yäsishqäkunata mana qonqaypa imaypis ruray. Ali kawashqaykita rikayäshushpaykimi tantiyayanqa Tayta Dios munashqanno kawaykashqaykita.
[16] Cuidä jusalikunkiman. Saynöpis cuidä lutanta yachasinkiman. Rasun kaqlata yachasir Tayta Dios munashqannöla imaypis kaway. Sayno kawashpaykimi kikikipis salvakunki y yachasishqaykita chaskikuqkunapis salvakuyanqa.