<2 Tesalonicenses - Tesalónica markacho taq yärakuq mayinkunaman apóstol Pablo qepa kaq cartata cartakushqan 3

[1] Wawqi panikuna, ali wilakuyninta maysaymanpis chäsiyänäpaq Tayta Diosta manakuyay. Saynöpis manakuyay qamkunata wilapaptï kushish chaskikuyashqaykinöla wakin runakunapis chaskikuyänanpaq.

[2] Saynöpis fiyu runakunapita sapämänanpaq Tayta Diosta manakuyay. Musyayashqaykinöpis manami lapan runakunasu Jesucristuman yärakuyan.

[3] Tayta Diosmi imaypis yanapaykäyäshunki payman yärakuyänaykipaq y ima jusamanpis Satanás mana ishkisiyäshunaykipaq.

[4] Tayta Dios sayno yanapäyäshuptikimi musyayä yachasiyashqäta imaypis cäsukuyänaykipaq kashqanta.

[5] Tayta Dios yanapaykuyäläshunki pay kuyakuq kashqanno qamkunapis kuyakuq kayänaykipaq. Saynöpis yanapaykuyäläshunki imano nakarpis Jesucristuno pacienciakur kawayänaykipaq.

[6] Wawqi panikuna, Señor Jesucristupa jutinchömi qamkunata nikä: Yachasiyashqäta mana cäsukuq qela wawqi panikunapita witikuyay.

[7] Musyayankimi noqakunata rikakayämashqaykino qamkunapis kawayänaykipaq kashqanta. Qamkuna kaqcho kar manami imaypis jitaräkushkäsu.

[8] Dembaldilaqa manami mikuyashkäsu, saypa trukanqa mana afanakuyänaykipaq paqasta junaqtami aruyashkä.

[9] Apóstol kar yanapäyämänaykipaq manakuyänä kaptinpis manami manakuyashkäsu, saypa trukanqa arukuyashkä qamkunapis rikakamar arukuyänaykipaqmi.

[10] Qamkuna kaqcho kar maynami yachasiyarqä pipis aruyta mana munaptinqa pachanta mana qarayänaykipaq.

[11] Sayno yachaykäsiyaptïpis ¿imanirtaq wakin wawqi panikuna arukuyänanpa trukanqa runa imano kawakushqantapis rikapar puriykäyan?

[12] Señor Jesucristupa jutinchömi sayno kawaq wawqi panikunata nï: Wayin wayin puriyänaykipa trukanqa mikuyänaykipaq arukuyay.

[13] Wawqi panikuna, mana ajayaypa ali kaqkunalata imaypis rurayay.

[14] Kay cartacho qelqamushqäta mayqanpis mana chaskikuptinqa paywan amana shuntakäyaynasu. Saynöpa capazmi penqakur tantiyakuyanman.

[15] Isanqa ama chikiyaysu, saypa trukanqa wawqikitano y panikitano shumaq tantiyasiyay.

[16] Ima päsayäshuptikipis ali kawayta qomaqninsi Tayta Dios yanapaykuyäshunki ali kawayänaykipaq. Tayta Dios qamkunawan imaypis kaykuläsun.

[17] Kay cartata dictashqänöla juk qelqapämash kaptinpis ushanantaqa noqa Pablumi qelqarkamü. Lapan cartakushqäkunachöpis ushanantaqa kikïmi qelqä.

[18] Señorninsi Jesucristo kuyapäyäshushpayki imaypis yanapaykuyäläshunki. [Amén.]