1 Tesalonicenses - Tesalónica markacho taq yärakuq mayinkunaman apóstol Pablo punta kaq cartata cartakushqan 5
[1] Wawqi panikuna, Señor Jesucristo imay höra ni imay junaq kutimunanpaq kashqanta mana musyarmi saypitaqa qelqamüsu.
[2] Isanqa musyayankimi sakaypa elaqpita suwa shamushqanno paypis elaqpita kutimunanpaq kashqanta.
[3] Imapis mana päsananpaq kashqanta runakuna niyaptinpis warmita qeshyakuy nanay elaqpita sarishqannömi Tayta Diospa castïgun elaqpita chämunqa. Say castïgupita manami pipis qeshpinqasu.
[4] Wawqi panikuna, qamkuna manami sakaqchönösu kaykäyanki Jesucristo suwano elaqpita kutimur kamarikünita sapuykuyäshunaykipaq. Saypa trukanqa lapaykimi aksichönöna kawaykäyanki.
[6] Sayno kaykaptinqa wakin runakuna punukash kayashqannöqa ama kashunsu, sinöqa maya mayala Jesucristuta shuyakuykäshun.
[7] Sakäpakushno kaqkunaqa punukashno y shinkashno karmi Jesucristo kutimunanpaq kashqanta tantiyakuyansu.
[8] Noqansiqa asikyaychöna kashpansi shumaq tantiyakushun, Tayta Diosman yärakushun y piwanpis kuyanakushun. Sayno kawarqa chalëcunsi jatishnömi kaykansi. Tayta Dios salvamashqansita shumaq tantiyarqa cascunsi jatishnönami kaykansi.
[9] Manami castigash kanansipaqsu Tayta Dios akramashkansi, sinöqa Jesucristuman yärakur salvash kanansipaqmi.
[10] Jesucristumi noqansi rayku wanurqan kawaykarpis o wanukurpis paywan juntu kawanansipaq.
[11] Sayno kaykaptinqa imaypis shakyäsinakuyashqaykinöla jukniki juknikipis tantiyasinakur shakyäsinakuyay.
[12] Wawqi panikuna, Señor Jesucristupa ali wilakuyninta yachasishuqnikikunata ali rikayay. Paykunami ali pusharäyäshunki y shakyäsiyäshunki Tayta Dios munashqanno kawayänaykipaq.
[13] Sayno yachasiyäshushqaykipita paykunata respitar shumaq kuyayay. Saynöpis mana chikinakuypa ali kawayay.
[14] Wawqi panikuna, arukuyta mana munaqkunata arukuyänanpaq yäsiyay. Lakish kaykaqkunata kushikuyänanpaq shakyäsiyay. Yanapaypaq kaqkunata imalawanpis yanapäyay. Pïmaypaqpis pacienciayki kasun.
[15] Runa mayiki contrayki kaptinpis qamkunaqa paykunapa contran ama kayaysu. Saypa trukanqa yärakuq mayikiwanpis y pïmaywanpis ali kawayay.
[16] Imaypis kushishla kawayay.
[17] Imay hörapis Tayta Diosta manakuyay.
[18] Imapitapis Tayta Diosta agradëcikuyay. Jesucristupa makincho kayaptikimi sayno kawayänaykita Tayta Dios munan.
[19] Santu Espïrituta cäsukuyanki.
[20] Espíritu Santu tantiyasishqanta pipis wilakuptin manakaqman ama churayankisu.
[21] Isanqa shumaq tantiyakuyanki Espíritu Santupita kashqanta o mana kashqantapis. Paypita kaptinqa chaskikuyanki.
[22] Imatapis lutankunata ama rurayankisu.
[23] Ali kawayta qomaqninsi Tayta Dios yanapaykuyäläshunki pay munashqanno imaypis kawayänaykipaq. Saynöpis cuerpuykita, almaykita y espïrituykitapis ali rikaykuläsun Jesucristo kutimur jusaynaqta tariyäshunaykipaq.
[24] Qayayäshuqniki Tayta Diosqa promitishqankunata imaypis cumplinmi. Saymi jusaynaqta tariyäshunaykipaq imaypis yanapäyäshunki.
[25] Wawqi panikuna, noqakunapaqpis Tayta Diosta manakuyay.
[26] Wawqi panikunata qaqlancho musayashpayki winchikuykuyälay.
[27] Señor Jesucristupa jutinchömi qamkunata ruwakü wawqi panikunata kay cartata liyipäyänaykipaq.
[28] Señorninsi Jesucristo kuyapäyäshushpayki imaypis yanapaykuyäläshunki. [Amén.]