<1 Tesalonicenses - Tesalónica markacho taq yärakuq mayinkunaman apóstol Pablo punta kaq cartata cartakushqan 4

[1] Wawqi panikuna, Señor Jesucristupa jutinchömi qamkunata ruwakuyä yachasishqänöla Tayta Dios munashqanno imaypis kawayänaykipaq. Pay munashqanno kawayashqaykita musyarpis waran waran saynöla kawayänaykipaqmi shakyaykäsiyä.

[2] Musyayankimi Señor Jesucristupa wilakuqnin kar imata yachasiyashqätapis.

[3] Jusaynaq kawayänaykita munarmi fornicación jusata jusalikuyänaykita Tayta Dios munansu,

[4] sinöqa majaykikunawan respitanakur ali kawayänaykitami munan.

[5] Saynöpis manami munansu Jesucristuta mana chaskikuqkunano shanaripakur jukwan jukwan purikuyänaykita.

[6] Sayno kaptinqa ama mayqaykikunapis jukpa warminwan kakuyaysu. Sayno kakurqa runa mayikitami engañaykanki. Wilayashkänami sayno kaqkunataqa Señor Jesucristo mana kuyapaypa castigananpaq kashqanta.

[7] Manami jusalikur purikunansipaqsu Tayta Dios akramashkansi, saypa trukanqa pay munashqanno kawanansipaqmi.

[8] Kay yachasiyashqäkunata pipis mana chaskikurqa manami noqakunatasu manakaqman churaykäman, sinöqa Espíritu Santuta qomaqninsi Tayta Diostami.

[9] Jukniki juknikipis kuyanakur ali kawayänaykipaqmi Tayta Dios tantiyasiyäshushkanki. Saymi nistäyankisu kuyanakuyänaykipaq tantiyasinäta.

[10] Macedonia provinciacho taq lapan wawqi panikunawan alishi kuyanakuykäyanki. Sayno kaptinpis qamkunata shakyäsiyä masraq kuyanakuyänaykipaqmi.

[11] Piwanpis mana rimanakuylapa kawayay. Runa mayiki imano kawakushqantapis ama rikapäyaysu. Saypa trukanqa yäsishqänöla ima aruylachöpis arukuyay.

[12] Sayno aruyaptikimi imaykipis pishïyäshunkisu y Jesucristuman mana yärakuqkunapis respitayäshunki.

[13] Wawqi panikuna, wanurpis kawarimunansipaq kashqanta musyayänaykitami munä. Wakin runakunaqa wanur pamparäyashlancho ushakäyänanpaq kashqanta yarparmi fiyupa lakikuyan. Noqansiqa paykunano ama lakikushunsu.

[14] Musyansimi wanushqanpita Jesucristuta Tayta Dios kawarisimushqanta. Jesucristuta kawarisimushqannölami payta chaskikuqkunatapis Tayta Dios kawarirkasimur Jesucristuwan shuntakunqa.

[15] Saymi Jesucristo yachasishqanno noqapis qamkunata nï: Mayqansipis Jesucristo kutimushqan junaqyaq kawarqa manami wanushkunapita mas puntatasu paywan tinkuq aywashun.

[16] Jana pasapita Jesucristo kutimuptinmi mandaq ángel sinchipa qayakamushqan y Tayta Diospa cornëtanta tukamushqanpis wiyakämunqa. Say hörami Jesucristuman yärakuykar wanukuqkuna puntata kawariyämunqa.

[17] Nirkurnami kawaykaqkunatapis shuntakamäshun. Pukutay jananchönami Señor Jesucristuwan lapansi tinkushun. Nirkurmi paywan juntu imayyaqpis kawakushun.

[18] Sayno kananpaq kaykaptinqa kay yachasishqäkunata yarpäsinakur jukniki juknikipis shakyäsinakuyay.