<1 Tesalonicenses - Tesalónica markacho taq yärakuq mayinkunaman apóstol Pablo punta kaq cartata cartakushqan 2

[1] Wawqi panikuna, manami walälapaqsu qamkunaman shamur yachasiyashkä.

[2] Musyayashqaykinöpis qamkuna kaqman manaraq chäyämuptï Filipos markacho ashliyämashpan seqaypami nakasiyämash. Qamkuna kaqchöpis saynölami nakasiyämash. Sayno nakasiyämaptinpis Tayta Diosninsimi yanapäyämash ali wilakuyninta mana mansariypa wilakuyänäpaq.

[3] Noqakuna manami pitapis lutanta yachasiyänä raykusu ni pitapis sakyayänä raykusu ni pitapis lutanta criyisiyänä raykusu wilakuyä.

[4] Saypa trukanqa ali wilakuyninta wilakuyänäpaq Tayta Dios kachayämash kaptinmi wilakuykäyä. Manami runakuna munayashqantasu wilakuykäyä, saypa trukanqa Tayta Dios munashqantami. Payqa shonqunsi imata yarpashqantapis musyaykanmi.

[5] Musyayashqaykinöpis chaskikayämänayki rayku manami qamkunata halagayashkäsu. Tayta Dios musyanmi pitapis mana sakyayashqäta.

[6] Saynöpis manami alabash kayta ashirsu qamkuna kaqcho wilakuyashkä.

[7] Jesucristupa apostolnin kaykarqa gastükunapaq qamkunatami manakuyäman karqan. Manakuyänäpa trukanqa wawanta maman kuyashqannömi qamkunatapis kuyayashkä.

[8] Sayno kuyarmi Tayta Diospa wilakuyninta chaskikuyänayki rayku wanuyänäpaqpis listu kayashkä.

[9] Wawqi panikuna, ¿manaku yarpäyanki qamkuna kaqcho Tayta Diospa wilakuyninta wilakuyänäpaq kikïkuna aruyashqäta? Gastükunapaq yarpachakuyänaykita mana munarmi paqasta junaqtapis pasaypa utikäyashqäyaq aruyashkä.

[10] Qamkunapis y Tayta Diospis musyanmi qamkuna kaqcho kar pay munashqanno alilata rurar santu kawayashqäta.

[11] Saynöpis musyayankimi surinkunata taytan kuyashqanno qamkunata kuyayashqäta.

[12] Saymi ruwayarqä, shakyäsiyarqä y tantiyasiyarqä Tayta Dios munashqanno kawayänaykipaq. Paymi qayayäshushkanki mandashqancho imayyaqpis paywan kawayänaykipaq.

[13] Tayta Diospa ali wilakuyninta wilapäyaptï manami runakunapa yarpaynin kashqantasu yarpäyashkanki, saypa trukanqa Tayta Diospa wilakuynin kashqantami. Sayno tantiyarmi lapan shonquykikunawan chaskikuyashkanki. Wilakuyninta wiyarmi tantiyakuyashkanki pay munashqanno kawayänaykipaq. Saymi imaypis Tayta Diosta agradëcikuyä.

[14] Wawqi panikuna, marka mayikikuna nakasiyäshushqaykinölami Judeacho kaykaq wawqi panikunatapis Israel runakuna nakaykäsiyan.

[15] Say runakunami Señor Jesucristutapis wanusiyarqan. Saynölami Tayta Diospa profëtankunatapis unay ayllunkuna wanusiyarqan. Sayno runakunami noqakunatapis Judeapita qarqayämash. Paykuna manami Tayta Dios munashqannösu kawayan. Saynöpis manami munayansu Tayta Diospa ali wilakuyninta runakuna chaskikuyänanta.

[16] Saymi mana Israel runakunata wilapäyaptï sapata churapäyan mana salvakuyänanpaq. Sayno kar masmi jusata cargakuykäyan. Sayno kayashqanpitami juiciu junaqcho paykunata Tayta Dios fiyupa castiganqa.

[17] Wawqi panikuna, qamkuna kaqpita aywakuyashqä junaqpita pasa manami rikanakushkansinasu. Saymi qamkunapaq lakikur imaykanöpapis watukakuq kutimuyta munaykäyä.

[18] Noqa Pablo aska kutimi kutimuyta munashkä. Sayno kaptinpis Satanásmi sapata churapäyämash.

[19] Sapata churapäyämaptinpis qamkunami premiuta chaskishqä corönä kaykäyanki. Saymi Señor Jesucristo kutimuptin paypa nawpancho qamkunapita pasaypa kushikuyäshaq.

[20] Qamkunapita rasunpaypami Tayta Diosta alabar kushikuyäshaq.