<1 Tesalonicenses - Tesalónica markacho taq yärakuq mayinkunaman apóstol Pablo punta kaq cartata cartakushqan 3

[1] Qamkuna kaqman shamuyta mana kamäpakurmi fiyupa lakikushkä. Saymi Atenas markacho kikilä kanä kaptinpis

[2] qamkuna kaqman wawqinsi Timoteuta kachamurqä. Musyayashqaykinöpis Timoteuqa Diospa sirviqnin karmi Jesucristupa ali wilakuyninta wilakur puriykan. Paymi yachasiyäshunki y shakyäsiyäshunki Jesucristuman yärakuyänaykipaq.

[3] Sayno shakyäsiyäshuptikimi runakuna chikiyäshuptikipis lakikuyankisu. Musyayankimi Jesucristuta chaskikushqansipita runakuna nakasimänansipaq kashqanta.

[4] Saynölami qamkunawan kaykarpis wilarqä Jesucristuman yärakushqansipita runakuna chikimänansipaq kashqanta. Say nishqänölami lapanpis päsaykan.

[5] Saymi qamkunapaq lakikur Tayta Diosman yärakuykäyashqaykita musyanäpaq Timoteuta kachamurqä. Fiyupami lakikurqä Satanás ima sapatapis churapäyäshuptiki Jesucristuman manana yärakuyashqaykita yarpar. Sayno kaptinqa ali wilakuyta wilapashqäkunapis manakaqlapaqmi kanman karqan.

[6] Qamkuna kaqpita Timoteo kutiykamurmi wilamash Tayta Diosman shumaq yärakuykäyashqaykita y kuyanakuykäyashqaykitapis. Saynöpis wilamash noqakunapaq lakikur kutiyämunäta munaykäyashqaykitami. Saymi noqakunapis watukakuq kutimuyta yarpaykäyä.

[7] Shumaq yärakuykäyashqaykita wilayämaptinmi nakarpis kushish kaykäyä.

[8] Ali kaykäyashqaykita musyarmi shonqükunapis asikyarkun.

[9] Tayta Diosninsi yanapäyäshushqaykipita fiyupa kushikur lapan shonqükunawanmi payta agradëcikuyä.

[10] Saymi paqaspa junaqpa lapan shonqükunawan payta manakuykäyä qamkunaman kutiyämunäpaq. Chämurnami masta yachasiyäshayki Tayta Dios munashqanno kawayänaykipaq.

[11] Papäninsi Tayta Dios y Señorninsi Jesucristo kamakaykasisun qamkunaman watukakuq kutiyämunäpaq.

[12] Señor Jesucristo yanapaykuyäläshunki qamkunata kuyashqänöla kikikipura y wakin runakunawanpis kuyanakuyänaykipaq.

[13] Saynöpis yanapaykuyäläshunki lapan shonquykikunawan yärakur pay munashqanno kawayänaykipaq. Saynöpami salvashqan runakunawan Señorninsi Jesucristo kutimuptin Papäninsi Tayta Diospa nawpancho jusaynaq kayanki.