<2 Tesalonicenses - Tesalónica markacho taq yärakuq mayinkunaman apóstol Pablo qepa kaq cartata cartakushqan 1

[1] Tesalónica markacho kaykaq yärakuq mayïkuna: Noqa Pablo, wawqinsi Silvano y Timoteumi kay cartata apaykäsiyämü. Qamkunaqa Papäninsi Tayta Diospa y Señor Jesucristupa makinchömi kaykäyanki.

[2] Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.

[3] Wawqi panikuna, Jesucristuman waran waran mas yärakuyashqaykita y runa mayikita kuyayashqaykita musyarmi Tayta Diosta imaypis agradëcikuyä.

[4] Saymi juklä markakunamanpis chaykur wawqi panikunata wilayä runakuna chikir nakasiyäshuptikipis Jesucristuman yärakuykäyashqaykita.

[5] Mana ajayaypa Jesucristuman sayno yärakuyaptikimi tantiyayä ali juzgaq Tayta Dios mandaykashqanman yaykuyänaykipaq kashqanta.

[6] Tayta Dios ali juzgaq karmi contrayki sharkuqkunata castiganqa.

[7] Qamkunatami isanqa noqakunatawan manana nakanansipaq shuntakamäshun. Sayno kanqa Señor Jesucristo munayyuq angilninkunawan jana pasapita kutimuptinmi.

[8] Tayta Diosta mana cäsukuyashpan Señorninsi Jesucristupa ali wilakuyninta mana chaskikuqkunatami bunyaypa bunyar rupaykaq nina chawpincho shamur castiganqa.

[9] Paykunaqa munayyuq Tayta Diospa nawpanman chäyänanpa trukanqa infiernuchömi imayyaqpis nakayanqa.

[10] Sayno kanqa Señor Jesucristo kay pasaman kutimuptinmi. Say junaqmi payman yärakuqkuna seqaypa kushikur alabayanqa. Saychömi qamkunapis Jesucristupa ali wilakuyninta wilakuyashqäta cäsukuyashqaykipita kushish alabayanki.

[11] Saymi Tayta Diosninsita imaypis manakuyä pay munashqanno kawayänaykipaq. Sayno kawayänaykipaqmi qayayäshushkanki. Munayninwan yanapaykuyäläshunki payman yärakur alikunata imaypis rurayänaykipaq.

[12] Sayno kawayaptikimi Señorninsi Jesucristupa jutinta joqarir alabayanqa y qamkunapis Jesucristo kashqanno kayankipaq. Sayno kanqa Tayta Diosninsi y Señor Jesucristupis kuyayäshushpayki yanapäyäshuptikimi.