<1 Tesalonicenses - Tesalónica markacho taq yärakuq mayinkunaman apóstol Pablo punta kaq cartata cartakushqan 1

[1] Tesalónica markacho kaykaq yärakuq mayïkuna: Noqa Pablo, wawqinsi Silvano y Timoteumi kay cartata cartakaykäyämü. Qamkunaqa Papäninsi Tayta Diospa y Señor Jesucristupa makinchömi kaykäyanki. Tayta Dios [y Señor Jesucristo] kuyapäyäshushpayki ali kawayänaykipaq yanapaykuyäläshunki.

[2] Qamkunapaq Tayta Diosta manakur imaypis agradëcikuyä

[3] payman yärakur alilata rurayashqaykipita, pïmaywanpis kuyanakuyashqaykipita y imano nakarpis Señor Jesucristo kutimunanta shuyaraykäyashqaykipitami.

[4] Wawqi panikuna, musyayämi Tayta Dios kuyayäshushpayki akrayäshushqaykita.

[5] Sayta musyayä ali wilakuyninta Espíritu Santupa poderninwan wilapaptï chaskikuyaptikimi. Qamkunapis musyayankimi kuyayashqäta y Tayta Dios munashqanno kawayashqätapis.

[6] Noqakunapa conträ y Señor Jesucristupa contran sharkuyashqannömi qamkunapapis contrayki sharkuykäyan. Fiyupa nakarpis Espíritu Santu yanapäyäshuptikimi Jesucristupa wilakuyninta kushish cäsukuykäyanki.

[7] Sayta musyarmi Macedonia y Acaya provinciakunacho lapan wawqi panikuna tantiyakuykäyan qamkunano cäsukuyänanpaq.

[8] Qamkuna kaqpita aywarmi Señor Jesucristupa wilakuyninta Macedonia y Acaya provinciakunapa päsar maysaychöpis wilakuykäyan. Wilakuyninta wilakuyashqannölami shumaq yärakuyashqaykitapis wilakuykäyan. Saymi mayman chäyaptïpis parlaykäyan Tayta Diosman yärakuyashqaykita. Mana wilapäyaptïpis

[9] maysaychömi musyaykäyan shumaq chaskikayämashqaykita y ïdulukunata adorayta kacharir imayyaqpis kawaq Tayta Diostana adoraykäyashqaykita. Payqa rasunpa kaq Diosmi kaykan.

[10] Saynöpis musyaykäyanmi Tayta Diospa Surin Jesucristo gloriapita kutimuqta shuyakuykäyashqaykita. Paytami Tayta Dios wanushqanpita kawarisimush. Paymi juiciu final junaqcho castïgupita salvamäshun.