[1] Patronkuna, qamkunapapis patronniki jana pasachömi kaykan. Saymi ashmaynikikunata ali rikar imachöpis yanapäyänayki.
[2] Wawqi panikuna, Tayta Diosta agradëcikuyashpayki payta imaypis manakuyay.
[3] Noqakunapaqpis Tayta Diosta manakuykuyälay Jesucristupa ali wilakuyninta wilakuyaptï shumaq chaskikuyänanpaq. Say wilakuyninta wilakushqäpitami carcilcho wichqaraykä.
[4] Saynöpis manakuykuyälay ali wilakuyninta pïmaytapis shumaq tantiyasinäpaq.
[5] Jesucristuta mana chaskikuq runakunawan ali kawayay. Alikunalata imaypis rurayay.
[6] Piwanpis parlarqa ali shimilaykipa shakya shakyala parlapäyanki.
[7] Kuyay wawqinsi Tíquico chämurmi imano kaykashqätapis wilayäshunki. Paypis Señor Jesucristupa wilakuqninmi kaykan.
[8] Saymi payta kachaykämü imano kaykashqätapis wilayäshunaykipaq. Paymi shakyäsiyäshunki Tayta Diosman shumaq yärakuyänaykipaq.
[9] Tíquicuwanmi Tayta Diosman yärakuq marka mayiki kuyay wawqinsi Onésimutapis kachaykämü. Paykunami wilayäshunki kaycho ima päsashqankunatapis.
[10] Noqawan prësu kaykaq wawqinsi Aristarcumi salüdunta apasikamun. Saynömi Bernabépa prïmun Marcuspis salüdunta apasikamun. Marcos chämuptin yäsishqänöla shumaq chaskikuykuyay.
[11] Saynölami Justo niyashqan Jesúspis salüdunta qamkunapaq apasikamun. Aristarco, Marcos y Justumi Tayta Dios mandaykashqancho ali yanapämar shumaq shakyäsiyäman. Paykunalami Israel mayïkunapitaqa yanapaykäyäman.
[12] Jesucristupa sirviqnin marka mayiki Epafraspis salüduntami apasikamun. Paymi lapan shonqunwan qamkunapaq imaypis manakuykan Tayta Dios munashqanno ali kawayänaykipaq.
[13] Qamkunapaq seqaypami lakikuykan. Saynölami lakikuykan Laodiceacho y Hierápolischo kaykaq wawqi panikunapaqpis.
[14] Kuyanakuyashqä mëdicu Lucaswan Demaspis salüduntami qamkunapaq apasikayämun.
[15] Laodiceacho kaykaq wawqi panikunatapis salüdüta qoykuyälanki. Saynöpis salüdüta qoykuyälanki Ninfasta y wayincho shuntakaq wawqi panikunatapis.
[16] Kay cartata liyiskir apasiyanki Laodiceacho kaq wawqi panikunaman paykunapis liyiyänanpaq. Saynömi Laodiceaman apasishqä cartata liyirkur paykunapis apasiyämunqa qamkunapis liyiyänaykipaq.
[17] Wawqinsi Arquiputa niyanki: “Señor Jesucristo churashushqaykino mana qelanaypa payta sirviy”.
[18] Kay salüdütaqa kikïmi qelqarkamü. Mana qonqaylapa Tayta Diosta manakuyay prësu kaykashqäpita yarqunäpaq. Tayta Dios lapaykita kuyapaykuyäläshunki. [Amén.]