[1] ¡Qhapaqkuna, sinchi muchuykuna qankunaman hamunasunkichismanta kunan waqaychis, hinallataq awllakuychis!
[2] Qhapaq kayniykichiskunaqa ismusqan kashan. Hinallataq p'achaykichiskunapas thutaq thutasqanmi kashan.
[3] Qoriykichispas, qolqeykichispas qhoqaq qhoqasqanmi kashan. Chay kasqan qhoqallataqmi qankunaq kontraykichispi rimarinqa, hinallataq aychaykichistapas nina hinaraq oqorapunqa. ¡P'uchukay p'unchaykunapaqmi qhapaq kayniykichista taqerqankichis!
[4] Qhawariychis, chakraykichispi ichhuqkunaq pagonmi kunkayoqta waqyakun. Pagonkuta mana qopuspaykichismi ichhuqkunata q'oturqankichis. Paykunaq waqyakusqankutaq, Ejersitokunaq Señorninpa ninrinman chayarqan.
[5] Qankunaqa, kay hallp'a pachapi qhapaq kaypin kawsarqankichis. Hinallataqmi aycha kusichiykunapi kawsarqankichis. Nak'ana p'unchaypaq hinaraqmi, sonqoykichista wirayachirqankichis.
[6] Huchachaspaykichismi, chanin runata wañuchirqankichis. Paytaqmi mana hark'apakurqasunkichischu.
[7] Chay hina kaqtinqa wawqe-panallaykuna, Señorpa hamunankama pasiensiawan suyakuqkuna kaychis. Qhawariychis, chakra llank'aqqa hallp'aq sumaq ruruynintan suyakun. Payqa, ñawpaq paratapas, qhepa paratapas chayamunankaman pasiensiawan suyakun.
[8] Señorpa hamuyninqa qayllaykamushanñan. Chayrayku, pasiensiawan suyakuychis. Sonqoykichistapas qaqata takyachiychis.
[9] Wawqe-panallaykuna, huchachayta mana chaskinaykichispaq, ama qankunapurapi hukkuna-hukkunaq kontranpi kihanakuychischu. Qhawariychis, ¡Chaninchaqqa punkupiñan kashan!
[10] Wawqe-panallaykuna, Diospa rantinpi rimaqkunaq sinchi ñak'ariyninkunamanta, hinallataq pasiensiawan suyakuyninkumanta yachaqakuychis. Paykunaqa, Señorpa sutinpin rimarqanku.
[11] Qhawariychis, qaqa sayaqkunataqa kusisamiyoqkunapaqmi hap'inchis. Qankunaqa, Jobpa pasiensiawan suyakuyninmanta uyarirqankichismi. Hinallataq, Señorpa ruwasqanpas imapaqchus kasqanta uyarillarqankichistaqmi. Señorqa llakipayakuq, hinallataq yanapaykukuq kasqantapas yachankichismi.
[12] Wawqe-panallaykuna, chaykunamantapas aswantaqa, amapuni huraychischu. Ama hanaq pacharaykupas, nitaq hallp'a pacharaykupas, nillataq ima huk huramentoraykupas huraychischu. Aswanqa, iskay-uya kayman ama urmanaykichispaq, ari nisqaykichisqa, ari nisqallapuni kachun. Manan nisqaykichispas, manan nisqallapuni kachun.
[13] ¿Pillapas qankunapurapi sasachakuykunapichu kashan? Chay hina kaqtinqa, ¡Diosman parlachun! ¿Pillapas kusisqachu kashan? Chay hina kaqtinqa, ¡yupaychay takikunata takichun!
[14] ¿Pillapas qankunapurapi onqosqachu kashan? Chay hina kaqtinqa, iñiq t'aqamanta kurak runakunata waqyachichun. Chay kurak runakunataq, Señorpa sutinpi aseitewan hawispanku, paypaq Diosman parlachunku.
[15] Hinan iñiywan Diosman parlayqa, onqosqata qhaliyachinqa. Señortaqmi paytaqa sayarichinqa. Sitaqchus huchallikurqan chayqa, Señormi paytaqa pampachanqa.
[16] Kamachikuy Simi p'akisqaykichista hukkunahukkunawan willanakapuychis. Hinallataq hukkuna-hukkunapaq Diosman parlaychis. Chay hinapin Diosqa qhaliyachisunkichis. Chanin runaq tukuy sonqonwan Diosman parlayninqa ancha kallpayoqmi.
[17] Eliasqa ñoqanchis hina, pisi-kallpa runallan karqan. Ichaqa paymi mana paramunanpaq yapa-yapamanta Diosman parlarqan. Hinan, hallp'a pachapi kinsa wata soqta killan mana para murqanchu.
[18] Hinan wakmanta Eliasqa Diosman parlallarqantaq. Hanaq pachataqmi parata qomurqan. Hinan hallp'aqa rurunta qollarqantaq.
[19] Wawqe-panallaykuna, pillapas qankuna ukhupi, cheqaq kaqmanta pantarunmanmi. Hinaspa pantasqanmanta mayqenpas kutichimunmanmi.
[20] Sichus pipas huchallikuqta pantasqan ñanmanta kutichimunqa chayqa, kutichimuqmi chay huchayoqpa almanta wañuymanta qespichinqa. Hinan ancha askha huchakunatapas pakaykunqa. Chayta yachaychis.