[1] Wawqe-panallaykuna, k'ancharishaq Señorninchis Jesucristopi iñiyniykichisqa, ama runakunaq rikch'ayninta qhawaychu kachun.
[2] Huk runaqa, qori sortijayoq, hinallataq lliphllirishaq p'achayoqpas, huñukuyniykichisman haykumunmanmi. Hinallataq huk wakcha runapas, thanta p'achayoq haykumullanmantaqmi.
[3] Hinan qankunaqa, pichus lliphllirishaq p'achallayoqta sumaqta chaskinkichis. Ninkichistaq: ‘Kay allin kaq tiyanapi tiyaykuy,’ nispaykichis. Wakchatataq ninkichis: ‘Qanqa haqayllapi sayaykuy,’ nispaykichis. Otaq: ‘Chakiypa kasqan pampachallapi tiyaykuy,’ nispaykichis.
[4] Chay hinapiqa, ¿manachu qankunapurapi runakunaq rikch'ayninta qhawashankichis? Hinallataq, ¿manachu qankunaqa, mana allin yuyaykunawan chaninchaqkuna kankichis?
[5] Munakusqay wawqe-panallaykuna, uyariwaychis. ¿Manachu Diosqa kay pachapi wakchakunata iñiyninkupi qhapaq kanankupaq akllakurqan? Hinallataq, ¿Diosqa, munakuqninkunapaq, qhapaq suyuta prometisqan erensiata chaskiqkunapas manachu paykunallataq kanku?
[6] Qankunataq ichaqa, wakchakunata pisichankichis. ¿Manachu qhapaqkunaqa saruchakusunkichis? ¿Manachu paykuna chaninchana wasikunaman aysasunkichis?
[7] ¿Manachu paykunaqa, qankunata sutiyasqasunkichis allin sutiq kontranpi k'arakta k'amisunkichis?
[8] Sichus Qelqaq nisqanman hina, reypa kamachikuynin simita cheqaqtapuni hunt'ankichis chayqa, allintan ruwankichis. Chay Qelqaqa ninmi: ‘Runamasiykitan qan kikiykita hinapuni munakunki,’ nispa. (Lev. 19:18)
[9] Ichaqa, sichus runakunaq rikch'ayninta qhawankichis chayqa, huchallikunkichismi. Kamachikuy Simitaqmi, kamachikuy simi p'akiqkunata hina huchachasunkichis.
[10] Pillapas llapan Kamachikuy Simita waqaychanmanmi, ichaqa, sichus hukllapipas misk'anman chayqa, llapanmantan huchachasqa kapun.
[11] Diosmi nirqan: ‘Aman wasanchankichu,’ nispa. (Exo. 20:14 Deut. 5:18) Nillarqantaqmi: ‘Aman runata wañuchinkichu,’ nispa. (Exo. 20:13 Deut. 5:17) Sichus mana wasanchankichu, ichaqa runatataq wañuchinki chayqa, llapan Kamachikuy Simita p'akiqmi kapunki.
[12] Ñoqanchisqa kacharichisqa kay kamachikuy simiman hinan chaninchasqa kasunchis. Chay hinaqa, chayman hinallapuni rimaychis, hinallataq ruwaychispas.
[13] Haqay mana yanapaykuqpaqmi, mana yanapaykuyniyoq taripay kanqa. Yanapaykuytaqmi, taripaytaqa atipan.
[14] Wawqe-panallaykuna, sichus pillapas nin: ‘Iñiyniyqa kanmi,’ nispa, ichaqa manataq ruwaynin kanchu chayqa, ¿imapaqtaq chay iñiyninri balen? ¿Chay hina iñiyninri, qespichiyta atinmanchu?
[15] Huk wawqepas, otaq huk panapas mana p'achayoq kashankumanmi. Hinallataq, sapa p'unchay mikhunankumanta pisichikuypipas kashallankumantaqmi.
[16] Qankunamanta hukniykichistaqchá ninqa: ‘Q'oñirikuspaykichis, hinallataq saksaykuspaykichis, thak kaypi ripuychis,’ nispa. Ichaqa, kuerpon imamantachus pisichikun, chayta manataq qonkichischu chayqa, ¿imapaqtaq balen?
[17] Chay hinallataqmi iñiypas, manachus ruwaynin kan chayqa, kikinpin wañusqa kashan.
[18] Pillapas ninmanmi: ‘Qanpan iñiyniyki kan, ñoqaqtaq ruwayniykuna kan,’ nispa. Ñoqataq ichaqa niyman: ‘¡Iñiyniykita mana ruwayniykikunallawan rikuchiway, ñoqataq iñiyniyta ruwayniykunawan rikuchisayki!’ nispay.
[19] Ch'ullalla Dios kasqanta kreespaykiqa, allintan ruwanki. Supaykunapas kreenkun, hinallataq khatatatankun.
[20] Ichaqa, yanqapaq kawsaq runa, ¿mana ruwayniyoq iñiy wañusqa kasqantachu yachayta munanki?
[21] Abrahammi churin Isaakta altarpi haywarqan. Chay hinaqa, ¿manachu taytanchis Abrahamqa, ruwayninkunarayku chaninman tukuchisqa karqan?
[22] Abrahampa iñiyninqa, ruwayninkunawan kuskan rikuchikurqan. Hinallataq ruwayninwanmi iñiyninqa k'apakchasqa karqan. ¿Chayta manachu yachankichis?
[23] Qelqaqa ninmi: ‘Abrahamqa Diospin iñirqan. Chaymi Diosqa chaninpaq qhawarirqan,’ nispa. (Gen. 15:6) Chay hinapin Qelqaqa hunt'akurqan. Chayraykun Diosqa Abrahamta sutiyarqan: ‘Diospa amigon,’ nispa.
[24] Runaqa, manan iñiyninraykullachu chaninman tukuchisqa kanqa. Aswanpas ruwayninraykupiwanmi chaninman tukuchisqa kanqa. ¿Chayta manachu yachankichis?
[25] Chay hinallataqmi, qhellipi puriq Rahab warmiwanpas karqan. Payqa, willaqkunata chaskispanmi, wak ñanninta paykunata kacharparirqan. Chay ruwayninraykutaqmi, payqa chaninman tukuchisqa karqan.
[26] Imaynan mana espirituyoq kuerpopas wañusqa kashan, chay hinallataqmi mana ruwayniyoq iñiypas wañusqa kashan.