[1] Wawqe-panallaykuna, ñoqanchis yachachiq kaqkuna aswan k'arakwan taripasqa kananchistaqa yachanchismi. Chayrayku, ama askhachu qankunamanta yachachiqkuna kaytaqa munaychis.
[2] Llapallanchismi imaymanakunapi pantanchis. Sichus pillapas rimakuyninpi mana pantanchu chayqa, payqa k'apak runan. Llapan kuerponwanpas kasuchikuyta atinmi.
[3] Qhawariychis, kaballokunaq siminmanmi frenota churanchis. Chay hinapin, kasuwanchis, hinallataq llapan kuerpontapas kutirichiyta atinchis.
[4] Barkokunatapas qhawarillaychistaq. Ancha hatunmi, hinallataq ancha kallpayoq wayraq apaykachasqanmi kanku. Chaywanpas ichaqa, barko apaqmi huk huch'uy timonllawan, maymanchus pay munan, chayman barkota apan.
[5] Huch'uy usuqsillachallan hatun sach'a-sach'ata ruphapun. Chay hinallataqmi qallupas, kuerpoq huch'uy miembrollan kashaspa, hatun imaymanakunamantaraq rimaykachan. Chayta qhawariychis.
[6] Qallupas huk ninan. Llapan mana chanin kaqwan hunt'aykusqan kashan. Kuerponchispa miembronkunapurapi churasqataqmi qalluqa kashan. Hinan llapan kuerponchista qhellichan. Llapan kawsayninchistataqmi qalluqa yawrarichin. Kikin infiernoq ninanwantaqmi yawrarichisqa kashan.
[7] Kay kawsay pachapiqa, llapan k'ita uywakunatapas, phalaq animalkunatapas, pampan suchuq animalkunatapas, mamaqochapi kaq animalkunatapas mansuyachikunmi. Kay pachapi runataqmi, chay animalkunataqa mansuyachirqan.
[8] Ichaqa, manan mayqen runapas qallunta mansuyachiyta atinchu. Qalluqa, mana allinwan, hinallataq wañuchiq benenowan hunt'aykusqan kashan.
[9] Qalluwanmi Dios Yayanchistapas saminchanchis. Chay kikin qallullawantaqmi Diospa rikch'ayninman rikch'ayniyoq kamasqa runakunatapas ñakanchis.
[10] Saminchaypas, hinallataq ñakaypas kasqan simillamantan lloqsimun. Wawqe-panallaykuna, chaykunaqa manan chay hinachu kanan.
[11] ¿Misk'i unu, hinallataq haya unupas kasqan pukyullamanta lloqsimuyta atinmanchu?
[12] Wawqe-panallaykuna, ¿igos sach'apas, aseitunasta ruruyta atinmanchu? Otaq, ¿ubas yurapas igosta ruruyta atinmanchu? Chay hinallataqmi huk pukyullamantaqa p'osqo unupiwan, misk'i unupiwan lloqsimuyta manapuni atinmanchu.
[13] ¿Pitaq qankuna ukhupi yachaysapa, hinallataq allinta entiendiq kan? Payqa, allin kawsayninwan ruwayninta, yachaysapa kaywan, hinallataq llamp'u sonqo kaywan rikuchikuchun.
[14] Ichaqa sichus sonqoykichispi millay tumpanakuykuna, hinallataq qhawanakuykuna kan chayqa, umata ama hoqariychischu. Nitaq cheqaq kaqpa kontranpipas llullakuychischu.
[15] Manan chayqa hanaqmanta uraykamuq yachaychu. Aswanpas, hallp'a pachamanta, runaq aycha kayninmanta, supaymanta iman hamun.
[16] Maypichus tumpanakuykunapas, qhawanakuykunapas kan chayqa, chaypin ch'arwi, hinallataq tukuy mana allin ruwaykunapas kan.
[17] Hanaqmanta hamuq yachaymi ichaqa, ñawpaqtaqa ch'uyapuni. Chaymantapas thak kaypi kawsay, llamp'u kaywan kawsay, hinallataq mana kikinpa munasqallanta ruwaymi. Chay yachayqa, ancha yanapaykuywan, hinallataq allin ruruykunawan hunt'aykusqan kashan. Manataqmi mayqenmanpas sayapakuqchu, nitaq iskay-uyapaschu.
[18] Thak kayta ruwaqkunataqmi ichaqa, chanin kaypa ruruyninta, thak kaypi t'akanku.