[1] ¿Maymantataq maqanakuykunapas, qankunapurapi huchatariykunapas rikhurimun? ¿Manachu sonqoykichis ukhupi maqanakuq aycha kuerpoykichispa munasqanman aysachikuyniykichiskunamanta rikhurimun?
[2] Sinchitan munapayankichis, manataq kapusunkichischu. Wañuchinkichis, hinallataq enbidiakuymantapas yawrarinkichisraqmi, manataq tariyta atinkichischu. Qankunaqa huchatarinkichis, hinallataq maqanakunkichis, manataqmi ichaqa mañakunkichischu. Chayraykun, mana ima munasqaykichispas kapusunkichischu.
[3] Manan allintachu mañakunkichis. Kuerpoykichispa, mana allin q'ochukuyninkunapi tukunaykichispaqmi mañakunkichis. Chayraykun mana chaskinkichischu.
[4] ¡Qankunaqa, wasanchaq qharikuna, hinallataq wasanchaq warmikunan kankichis! Kay pacha kawsaywan hukllachakuyqa, Diospa awqanman tukupuymi. ¿Chayta manachu yachankichis? Chay hina kaqtinqa, pillapas kay pachaq amigon kayta munan chayqa, Diospa awqanmanmi tukupun.
[5] Qelqaqa ninmi: ‘Ñoqanchispi tiyakuq Espirituqa wañukuywanraqmi munakuwanchis,’ nispa. (Gen. 6:5) ¿Chay Qelqaqa, yanqa simitapas nishanman hinatachu kreenkichis?
[6] Paymi ichaqa, aswan askha allinpaq qokuyta qon. Chaymi nin: ‘Diosmi hatunchakuqkunaq kontranpi sayarin. Huch'uyaykukuqkunamantaqmi ichaqa, allinpaq qokuyninta qon,’ nispa. (Prov. 3:34)
[7] Chay hinaqa, Diosta kasukuychispuni. Saqraq kontranpitaq ichaqa, qaqata sayaychis. Hinan saqraqa qankunamanta ayqekunqa.
[8] Diosman asuykuychis, chay hinapin paypas qankunaman asuykamullasunkichistaq. Huchasapakuna, makiykichista mayllikuychis. Iskayta yuyaykuqkuna, sonqoykichista ch'uyanchakuychis.
[9] Sonqoykichispi nanachikuychis, waqapakuychis, hinallataq waqaychis. Asikuyniykichispas waqapakuyman tukupuchun. Q'ochukuyniykichispas llakikuyman tukupuchun.
[10] Señorpa ñawpaqenpi huch'uyaykukuychis, hinan payqa altoman hoqarisunkichis.
[11] Wawqe-panallaykuna, ama qankunapurapi hukkunahukkunamanta mana allinta rimaychischu. Pipas wawqenpa kontranpi mana allinta riman, otaq wawqenta huchachan chayqa, Kamachikuy Simimantan mana allinta riman. Hinallataqmi Kamachikuy Simitapas huchachan. Sichus Kamachikuy Simita huchachanki chayqa, manan Kamachikuy Simita ruwaqchu kanki. Aswanpas chaninchaqmi kanki.
[12] Kamachikuy Simita qoqqa ch'ullallan. Payqa qespichinanpaqpas, wañuchinanpaqpas atiyniyoqmi. Ichaqa, ¿runamasiykita huchachanaykipaq, pitaq qanri kanki?
[13] Pikunachus ninkichis: ‘Kunan, otaq paqarin haqay llaqtata risunchis. Chaypitaq, huk wata kamusunchis. Hinan qhatuspa qolqeta tarimusunchis,’ nispaykichis. Chayta niqkuna, uyariychis.
[14] Qankunaqa huk ratu rikhuriruspa, chinkarapuq phuyu hinallan kankichis. Chayraykun, paqarin p'unchay imaynachus kananta, hinallataq kawsayniykichis imaynachus kanantapas mana yachankichischu.
[15] Aswanchá niwaqchis: ‘Sichus Señor munanqa chayqa, kawsasunchis. Hinaspa kaytapas, haqaytapas ruwasunchis,’ nispaykichis.
[16] Kunantaq ichaqa, anchaykachayniykichispi rimaykachashankichis. Chay hina llapa rimaykachaykunaqa manan allinchu.
[17] Chay hina kaqtinqa, pipas allin kaq ruwayta yachashaspa, mana ruwanchu chayqa, huchallikunmi.