[1] Chaymantataqmi, chunka tawayoq wata qhepataña Bernabewan wakmanta Jerusalén llaqtaman wicharqani. Hinallataqmi Titotapas pusarikurqayku.
[2] Ichaqa, rikhuriypi rikusqayman hinan wicharqani. Hinan mana-judío runakunaman allin willakuy willashasqayta allinpaq qhawarisqa runakunaman sapaqllapi sut'incharqani. Chaytaqa ñawpaq llank'asqaypas, kunan llank'asqaypas mana yanqapaq kananpaqmi ruwarqani.
[3] Ichaqa, ñoqawan kashaq Titopas hinaña Gresia llaqtayoq runa kashaspapas, sirkunsidakunanpaqqa manan qatirisqachu karqan.
[4] Chaywanpas, falso wawqekunaqa kasharqankupunin. Paykunaqa, Cristo Jesuspi kacharichisqaña kasqaykuta qhawararuyta munaspankun, ñoqayku ukhuman pakallapi suskhuyamurqanku. Hinan, kamachi kayman wakmanta churayta munawarqanku.
[5] Allin willakuypa cheqaq kaynin qankunapi takyananpaqmi, paykunataqa manapuni huk ratullapas kasurqaykuchu.
[6] Chaywanpas ichaqa, allinpaq qhawarisqa runakuna ñawpa tiempopichá allinpaq qhawarisqa karqanku. Chaymanta ñoqamanqa manan imapas qokuwanchu. Diosqa manan runakunaq rikch'aynintachu qhawan. Hinaqa chay allinpaq qhawarisqa runakuna ñoqaq nisqaymanqa, manan imallatapas yapaykuwanchu.
[7] Aswanpas, imaynan Pedroman allin willakuyta sirkunsidasqakunaman willananpaq qosqa karqan, chay hinallataqmi, ñoqamanpas allin willakuyta mana sirkunsidasqakunaman willanaypaq, qosqa kawarqan. Chaytataqmi rikurqanku.
[8] Pichus sirkunsidasqa kaqkunaman apóstol kananpaq Pedrota churaqmi, ñoqatapas mana-judío runakunaman rinaypaq churawarqan.
[9] Jakobopas, Cefaspas, hinallataq Juanpas, Diosqa allinpaq qokuynin qowasqantan repararqanku. Hinaqtinmi Bernabemanwan, ñoqamanwan, puriqmasinku kanaykupaq señalta hina, paña makinkuwan hap'iykuwarqanku. Hinan paykunaqa, iñiq t'aqata tusaq hina qhawarisqa kanku. Ñoqaykutataq mana-judío runakunaman rinaykupaq allinpaq hap'iwarqanku. Paykuna kikinkutataqmi ichaqa, sikunsidasqa kaqkunaman rinankupaq allinpaq hap'ikurqanku.
[10] Hinaqa wakchakunamanta yuyarikunallaykupaqmi niwarqanku. Hinan chaytaqa allinta kallpachakuspaypuni k'uchi kaywan ruwarqani.
[11] Pedrotaqmi ichaqa, Antiokía llaqtaman hamurqan. Hinan payqa, chaypi anyaykusqa kananpaq hina ruwasharqan. Chaymi uya-uyapura kashaspayku, paypa kontranpi churakurqani.
[12] Pedroqa, sirkunsidasqa kaqkunatan manchakurqan. Chayraykun Jakoboq partinmanta runakuna manaraq chayamushaqtinku, payqa mana-judío runakunawan kuska mikhusharqan. Chayaramuqtinkutaqmi ichaqa, mana-judío runakunawan manaña mikhuyta munaspa t'aqakurqan.
[13] Hinallataqmi wakin judío runakunapas, Pedroq iskay-uya kayninpi ruwaysikusharqanku. Hinan paykunaq iskay-uya kayninkuman Bernabepas aysaykusqaraq karqan.
[14] Allin willakuy cheqaq kayman hina, mana siwk ñanpi purisqankuta rikuspaytaqmi, llapankuq ñawpaqenkupi Pedrota nirqani: ‘Qan kikiykin, judío runa kashaspayki, manapuni judío runa hinachu kawsashanki. Aswanpas mana-judío runakuna hinan kawsashanki. ¿Imanaqtintaq mana-judío runakunatari, judío runa hina kawsanankupaq qatirinki?’ nispay.
[15] Ñoqanchisqa, judío runapunin naserqanchis. Manataqmi mana-judío runakunapuramanta huchasapakunachu kanchis.
[16] Runaqa, manan Kamachikuy Simita waqaychasqanwanchu chaninman tukuchisqa kanqa. Aswanpas Jesucristopi iñiyllanwanmi chaninman tukuchisqaqa kanqa. Chaytaqa yachanchismi. Ñoqaykupas Cristo Jesuspin iñirqayku. Chayraykun ñoqaykupas mana Kamachikuy Simita waqaychasqaykuraykuchu, aswanpas Cristopi iñikusqaykurayku Diosqa chaninman tukuchiwarqanku. Diosqa manan pitapas Kamachikuy Simita waqaychasqanwanchu chaninman tukuchinqa.
[17] Ñoqaykuqa, Cristopi chaninman tukuchisqa kaytan maskhashayku. Ichaqa ñoqayku kikiyku huchapiraqmi tarikushayku. Chay hinaqa, ¿Cristori, huchata serbiqchu kanman? ¡Imaynallanmantapas manapunin!
[18] Thunipusqaytachus wakmanta hatarichisaq chayqa, Kamachikuy Simita p'akiqmi kapuni.
[19] Ñoqaqa Diospaq kawsanaypaqmi, Kamachikuy Simiq chawpinta, Kamachikuy Simipaq wañupurqani.
[20] Cristowan kuska chakatasqañan kashani. Manañataqmi ñoqaqa kawsaniñachu, aswanpas Criston ñoqapi kawsashan. Kunan aycha kuerpopi kawsakushaniraq chayqa, Diospa Churinpi iñisqaypa chawpintan kawsashani. Paymi ñoqata munakuwarqan. Hinan pay kikinta ñoqarayku hap'iykuchikurqan.
[21] Sichus Kamachikuy Simiq chawpinta Diospa chanin kaynin hamunman karqan chayqa, yanqapaqmi Cristoqa wañunman karqan. Chayraykun Diospa allinpaq qokuynintaqa manapuni wikch'uykukunichu.