[1] Ichaqa nillanitaqmi: ‘Erensia chaskiqqa, llapan kaqniyoqña kan chaypas, wawallaraq kashaspanqa, huk kamachiwan ninakunmi.
[2] Aswanmi taytanpa señalasqan tiempokama kuidaqkunayoq, hinallataq qhawaqkunayoq kashan,’ nispay.
[3] Chay hinallataqmi ñoqanchispas, maypachachus wawallaraq kashaspaqa, kamachi karqanchis. Hinallataq kay pachaq imaymana kamachikuyninkunaman hap'ipasqa karqanchis.
[4] Tiempo hunt'akapuqtinmi ichaqa, Diosqa Churinta kachamurqan. Churinqa, warmimantan naserqan. Hinallataq Kamachikuy Simi tiempopin naserqan.
[5] Kamachikuy Simita kasukuqkunata rantipapunanpaq, hinallataq wawan kananchispaq, wawachakapuyta chaskinanchispaqmi chaytaqa ruwarqan.
[6] Wawankuna kasqaykichisraykutaqmi, Diosqa Churinpa Espiritunta sonqoykichisman kachamurqan. Paymi waqyakun: ‘Abba Yayay,’ nispa.
[7] Chay hinaqa, manañan kamachiñachu kanki. Aswanpas wawanñan kapunki. Sichus wawanña kapunki chayqa, Cristoq chawpinta Diosmanta erensiata chaskiqñan kapunki.
[8] Cheqaqtapunin, huk tiempopiqa manaraq Diosta reqsikushaspaykichis, mana cheqaq dioskunata serbirqankichis.
[9] Kunantaq ichaqa, Diosta reqsikunkichisña, otaq huk niypiqa, Diospa reqsisqanña kankichis. Chay hinaqa, ¿imanaqtintaq wakmanta pisikallpayoq, hinallataq mana baleq kay pachaq imaymana kamachikuyninkunamanri kutirishankichis? ¿Wakmantachu, huktawan chaykunaq kamachin kayta munashankichis?
[10] ¡Qankunaqa, p'unchaykunatapas, killakunatapas, poqoy-ch'akiriy tiempokunatapas, hinallataq watakunatapas waqaychashankichisraqmi!
[11] Qankunaq allinniykichispaqmi qankunapurapi llank'arqani. Chay llank'asqay yanqapaq kananmantan manchakushani.
[12] Wawqe-panaykuna, imaynan ñoqaqa qankunaman hina tukurqani, chay hinallataq qankunapas ñoqa hina kanaykichispaq balikuykichis. Manan ima mana allintapas ruwawarqankichischu.
[13] Aycha kuerpopi onqosqa kasqayraykun, ñawpaq kutita allin willakuyta qankunaman willarqaykichis. Chaytaqa yachankichisñan.
[14] Aycha kuerpoypi onqoyniyña prueba kawaqtinpas, manan pisinchawarqankichischu, nitaq millakuwarqankichispaschu. Aswanmi Diospa angelninta hinaraq, chaymantapas kikin Cristo Jesusta hinaraq chaskiykuwarqankichis.
[15] Chay hinaqa, ¿maypitaq chay kusikuyniykichisri kashan? Uyanchaspaymi niykichis: ‘Sichus atikunman karqan chayqa, ñawiykichistapas horqorukusparaqmi qowankichisman karqan,’ nispay.
[16] ¿Hinaqtinri, kunan qankunaman cheqaq kaqta nisqayhawachu, awqaykichisman tukurapuni?
[17] Paykunaqa qankunamanta wañukunkuraqmi. Ichaqa mana allinpaqmi chaytaqa ruwanku. Aswanpas paykunamanta wañukuqraq kanaykichispaqmi, Ñoqaykumanta qankunata t'aqaruyta munashanku.
[18] Allin kaqmanta wañukuqraq kayqa allinpunin. Ichaqa manataq chaypi qankunawan kashallaqtiychu.
[19] Wawallaykuna, Cristoq rikch'aynin qankunapi hunt'akunankama, wachakuq warmi hinaraq qankunamanta wakmanta nanayta muchushani.
[20] Qankunamantan muspharisqaraq kashani. Chayraykun, huk niraymanta rimaykunaypaq kunanpacha qankunawan kayta munashayman.
[21] Kamachikuy Simita kasukuyta munaqkunatan nini: ‘¿Kamachikuy Simimantari manachu uyarirqankichis?’ nispay.
[22] Kamachikuy Simipin Abrahampa iskay churiyoq kasqanmanta qelqasqa kashan: ‘Huknin churinmi kamachin warmipi karqan. Huk kaq churinñataq mana kamachin warmipi karqan,’ nispa.
[23] Hinaqa, kamachin warmipi naseqmi aychaman hina naserqan. Mana kamachi warmipi naseqtaqmi ichaqa, promesaq chawpinta naserqan.
[24] Kaykunapin huk rikch'anachiy hina yachachikuyqa kashan: Kay warmikunaqa iskay rimanakuymi kanku. Huk kaqqa Sinaí orqopi rimanakuymi. Chay rimanakuytan Agarqa rikuchin. Paymi kamachi kanankupaq wawakunata wachakurqan.
[25] Agarqa, Arabia hap'iypi Sinaí orqomanmi rikch'akun. Chayqa, kunan p'unchay Jerusalén llaqtamanmi rikch'akun. Hinan payqa, wawankunantin kuska, kamachi kashanku.
[26] Hanaq pachapi kashaq Jerusalén llaqtataqmi ichaqa, mana kamachichu. Paytaqmi llapanchispa mamanchispuni.
[27] Qelqaqa ninmi: ‘Wikch'usqa warmiq wawankunan, qosayoq warmiq wawankunamantaqa aswan askharaq kanku. Chayrayku, mana wiksallikuy atiq warmi, mana wachakuq kasqaykimanta kusikuy. Hinallataq mana wachakuy nanaypichu kashasqaykimanta, qonqaylla kusikuywan, qaparispa kunkayoqta waqyakuy,’ nispa. (Isa. 54:1)
[28] Chay hinaqa wawqe-panaykuna, ñoqanchismi Isaak hina, promesa wawakunaqa kanchis.
[29] Ichaqa, imaynan haqay tiempopipas, aychaman hina naseqqa Espirituman hina naseqta qatiykacharqan, chay hinallataqmi kunanpas kashan.
[30] Ichaqa, ¿Qelqari imanintaq? Qelqaqa ninmi: ‘Kamachi warmiq wawanqa, manan hayk'aqpas mana kamachi warmiq wawanwan kuskaqa tupaqninta chaskinmanchu. Chayrayku, kamachi warmitaqa, wawantinta hawaman wikch'upuy,’ nispa. (Gen. 21:10)
[31] Chay hinaqa wawqe-panaykuna, ñoqanchisqa manapunin kamachi warmiq wawankunachu kanchis. Aswanpas mana kamachi warmiq wawankunan kanchis.