[1] Hinaqa, kacharichisqa kananchispaqmi, Cristoqa kacharichiwarqanchis. Chay kacharichisqa kaypi qaqata sayaychis, amataq wakmanta kamachi kay yugomanqa churakuychischu.
[2] Qhawariychis, ñoqa Pablon niykichis: ‘Sichus sirkunsidachikullankichis chayqa, Cristoqa manan imapaqpas balisunkichismanchu,’ nispay.
[3] Llapallan sirkunsidachikuy munaq runakunatan yapamanta willaspay nini: ‘Pipas sirkunsidachikun chayqa, llapan Kamachikuy Simitan hunt'ananpuni,’ nispay.
[4] Kamachikuy Simiwan chaninman tukuchisqa kayta yuyaqkunaqa, Cristomantan t'aqarikapurqankichis. Hinallataqmi Diospa allinpaq qokuyninmantapas urmaykapurqankichis.
[5] Ñoqanchismi ichaqa, Espírituq chawpinta, chanin kay suyakuyta iñiypa chawpinta suyakushanchis.
[6] Cristo Jesuspiqa, sirkunsidasqa kaypas, mana sirkunsidasqa kaypas manapunin imapaqpas balenchu. Aswanpas munakuypa chawpinta ruwaq iñiyllan baleqqa.
[7] Qankunaqa allillantapunin purisharqankichis. Chay hinaqa, ¿cheqaq kaqta mana kasukunaykichispaqri, pitaq hark'arqasunkichis?
[8] Chay mana kasukuy uyachiyqa, manan waqyaqniykichis Diosmantachu hamun.
[9] Pisi lebadurallan llapan peqataqa poqochin.
[10] Ama huk hinakunata yuyaykushanaykichispaq qankunamanta ñoqaq sonqo churayniyqa Señorllapipunin kashan. Ichaqa, pichus qankunata muspharichisunkichis chayqa, piña mayña kaspapas, muchuchisqapunin kanqa.
[11] Ichaqa wawqepanaykuna, ñoqataqchus sirkunsisionmantaraq willakushayman chayqa, ¿imanaqtintaq qatiykachasqaraqri kashani? Chay hina kaqtinqa, misk'achiq krusqa yanqapaqmi kanman.
[12] ¡Sirkunsidakuywan ch'aqwarayta hatarichiqniykichiskunaqa paykuna kikinkuta sirkunsidakuspa, hukpaqkama wit'ukuyninkun allinqa kanman!
[13] Wawqe-panaykuna, qankunaqa kacharichisqa kaymanmi waqyasqa karqankichis. Ichaqa, amayá chay kacharichisqa kasqaykichistaqa huchallikunaykichispaqchu hap'iychis. Aswanpas munakuypa chawpinta, hukkuna-hukkunawan serbiykunakuychis.
[14] Qelqaqa ninmi: ‘Runamasiykitan qan kikiykita hinapuni munakunki,’ nispa. (Leb. 19:18) Chay ch'ulla simillapin, llapan Kamachikuy Simiqa hunt'akun.
[15] Sitaqchus qankunapurapi k'utunakuspa mikhuykunakunkichisraq chayqa, qankunapura ama ch'usaqyarachinakunaykichispaq allinta qhawakuychis.
[16] Chay hinaqa, kaytan niykichis: ‘Espirituman hina puriychis. Chay hinapin manapuniña aycha kuerpoq millay munasqankunata saksachinkichischu,’ nispay.
[17] Aycha kuerpoqa, Espírituq kontranpi kaqkunatan sinchitapuni munan. Espirituñataqmi ichaqa, aycha kuerpoq kontranpi kaqkunata anchatapuni munan. Munasqaykichista mana ruwanaykichispaqmi iskayninku kontrallinakunku.
[18] Ichaqa, sichus Espíritu pusashasunkichis chayqa, manan Kamachikuy Simita kasukuy tiempopiñachu kashankichis.
[19] Aycha kuerpoq ruwayninkunaqa, sut'i reqsisqapunin kanku. Chaykunaqa kaykunan: Wasanchaykuna, qhellipi puriykuna, qhellipi kawsaykuna, aycha kuerpo mana watakuykuna iman kanku.
[20] Hinallataq, idolota yupaychaykuna, layqanakuykuna, awqanakuykuna, huchatariykuna, tumpanakuykuna, k'arak phiñakuykuna, t'aqanakuykuna, cheqninakuykuna, wak t'aqakunata hatarichiykuna iman kanku.
[21] Hinallataq, enbidianakuykuna, runa wañuchiykuna, machaykuna, fiestapi machaykuspa sinchi waqlliykuna, chay hina kaq huchakuna iman kanku. Imaynan ñawpaqtaraq anyarqaykichisña, chay hinallatataqmi kunanpas niykichis: ‘Chaykunata ruwashallaqkunaqa, manapunin Diospa qhapaq suyumanqa haykunqakuchu,’ nispay.
[22] Espírituq ruruynintaqmi ichaqa kaykuna: Munakuypiwan, kusikuypiwan, thak kaypiwan, pasiensiayoq kaypiwan, sumaq sonqo kaypiwan, qoykukuq kaypiwan, iñiypiwan ima kanku.
[23] Hinallataq, llamp'u kaypiwan, aycha kuerpo kamachiypiwanmi kanku. Chaykunaq kontranpiqa, manan ima kamachikuypas kanchu.
[24] Cristoq kaqkunataqmi ichaqa, aycha kuerpota, millay qhelli huchapakuyninkunatawan, sinchi mana allin yuyaykuyninkunatawan ña chakatapunkuña.
[25] Sichus Espírituq chawpinta kawsashanchis chayqa, Espírituq chawpillantapuni purishasunpas.
[26] Ama hukkuna-hukkunawan phiñachinakuspa, nitaq hukkuna-hukkunawan enbidianakuspa, yanqa hatunchakuqchu kasunchis.