[1] ¡Yaw Galasia probinsiapi iñiqkuna, mana yuyayniyoqmi kankichis! Ñoqaykuqa, chakatasqa Jesucristota qankunapurapi sut'itapunin reqsichirqaykiku. ¿Chay cheqaq kaqta mana kasukunaykichispaqri pipunitaq layqachirqasunkichis?
[2] Qankunamantaqa kayllatan yachayta munashani: ¿Espiritutari, Kamachikuy Simi ruwaykunaq ruwasqaykichispa chawpintachu chaskirqankichis? ¿Ichari, uyarispa iñisqaykichispa chawpintachu chaskirqankichis?
[3] ¿Imaynaniraq mana yuyayniyoqtaq kankichisri? ¿Espírituq chawpinta qallarispaykichischu, kunantaq aycha kaqpa chawpinta tukupunkichis?
[4] ¿Sinchita ñak'arisqaykichisri yanqapaqchu karqan? Chay ñak'arisqaykichisqa manapunin yanqapaqchu karqan.
[5] Hinaqa Diosmi Espiritunta askhapi qankunaman qosunkichis. Hinan musphana ruwaykunata qankunapurapi ruwan. ¿Chaytari, Kamachikuy Simi ruwaykunaq ruwasqaykichisraykuchu, icha uyarispa iñisqaykichisraykuchu ruwan?
[6] Imaynan Qelqapas nin: ‘Abrahamqa Diosta kreerqanmi. Hinan chay iñiyninqa, paypa chaninninpaq yupasqa karqan’ nispa. (Gen. 15:6)
[7] Chay hinan, iñiypi kaqkunaqa Abrahampa wawankuna kanku. Chayta yachaychispuni.
[8] Diosqa, mana-judío runakunata, iñiyninkuhawa, chaninman tukuchipunanmantan Qelqakunaqa nisqa karqan. Chaymi Qelqakunaqa ñawpaqmantapacharaq chay allin willakuyta Abrahamman willarqan: ‘Qanpin, llapallan suyukunaqa saminchasqa kanqaku,’ nispa. (Gen. 12:3; 18:18; 22:18)
[9] Chay hinapin, iñiypi kashaqkunaqa, iñiyniyoq Abrahamwan kuska Diospa saminchasqan kanku.
[10] Qelqasqan kashan: ‘Kamachikuy Simipi llapallan imaymanakuna qelqasqa kaqkunata mana kasukuqkunaqa, llapallankun ñakasqa kashanku,’ nispa. (Deut. 27:26) Chayraykun, Kamachikuy Simi ruway hunt'ayman hap'ipakuqkunaqa, llapallanku ñakasqa kashanku.
[11] Qelqaqa ninmi: ‘Chanin runaqa iñiyllawanpunin kawsanqa,’ nispa. (Hab. 2:4) Chayraykun, mana pipas Diospa ñawpaqenpi Kamachikuy Simiwanqa chaninman tukuchisqa kanmanchu. Chayqa sut'ipunin kashan.
[12] Kamachikuy Simitaqmi ichaqa, nin: ‘Pipas Kamachikuy Simita kasukuqqa chay ruwasqanwanmi kawsanqa,’ nispa. (Lev. 18:5) Chayraykun, Kamachikuy Simiqa mana iñiymantachu hamun.
[13] Qelqasqan kashan: ‘Llapallan pipas k'aspipi warkusqa kaqqa, ñakasqa kachun,’ nispa. (Deut. 21:23) Chayraykun Cristoqa, ñoqanchisrayku chay ñakayman churaykukurqan. Chay hinapin chay Kamachikuy Simiq ñakasqa kayninmanta rantipapuwarqanchis.
[14] Iñiyninchispa chawpinta, prometiwasqanchis Espirituta chaskinanchispaqmi Cristoqa rantipapuwarqanchis. Hinallataq, Cristo Jesuspa chawpinta, Abrahampa saminchaynin mana-judío runakunaman chayananpaqmi rantipapuwarqanchis.
[15] Wawqe-panaykuna, runa kayniypin rimani. Runakunaq rimanakuyninña kanman chaypas takyapachisqaña kaqtinqa, manan pipas yanqayachipuyta, nitaq yapaykuytapas atinmanchu.
[16] Kunantaq ichaqa, Diosqa Abrahamman, hinallataq mirayninmanwan promesankunata prometirqan. Manan askhapas kanman hinachu mirayniykikunaman nispaqa nin. Aswanpas ch'ullallamantan nin: ‘Qanpa mirayniykimanmi,’ nispa. (Gen. 12:7; 13:15; 24:7) Chaytaqa Cristomantan nishan.
[17] Chay hinaqa kaytan nini: ‘Rimanakuymanta, tawa pachak kinsa chunkan wata qhepatañan Kamachikuy Simiqa hamurqan. Chay rimanakuytan Diosqa Cristopaq ñawpaqmantaraq Abrahamwan takyapachirqan. Kamachikuy Simiqa manan rimanakuyta tukuchipunchu, nitaq promesatapas yanqayachipunchu.
[18] Sichus Kamachikuy Simiq chawpinta erensia kanman chayqa, manan promesaq chawpintañachu kanman. Diosmi ichaqa, promesaq chawpinta Abrahamman erensiata yanqallan qorqan,’ nispay.
[19] Chay hinaqa, ¿imapaqtaq Kamachikuy Simiri qosqa karqan? Runakunan, Kamachikuy Simita mana kasukuspa p'akirqanku. Chaymi Diospa, prometisqan chaskiq miray hamunankama Kamachikuy Simiqa yapasqa karqan. Hinan huk allipunachiqpa makinpa chawpinta, kay Kamachikuy Simiqa angelkunaq chawpinta kamachisqa karqan.
[20] Allipunachiqqa, manan ch'ulla runallapaqchu. Diosmi ichaqa, ch'ullallapuni.
[21] ¿Kamachikuy Simiri, Diospa promesankunata kontrallikunchu? ¡Imaynallanmantapas manapunin! Sichus Kamachikuy Simi kawsachiy atiq kananpaq qosqa kanman karqan chayqa, Kamachikuy Simipipunin chanin kayqa kanman karqan.
[22] Jesucristopi iñiqkunamanmi ichaqa, iñiypa chawpinta Diosqa promesata qon. Chaypaqmi Qelqakunapas llapan runakunata huchapi wisq'arqan.
[23] Manaraq iñiy hamushaqtinmi ichaqa, Kamachikuy Simipi presochasqa kasharqanchis. Imachus qonqaylla hamuq iñiy kasqanta Diospa rikuchiwananchispaqmi, Kamachikuy Simiqa wisq'awarqanchis.
[24] Chay hinapin, iñiywan chaninman tukuchisqa kananchispaq, Kamachikuy Simiqa Cristoman pusawaqninchis karqan.
[25] Iñiymi chayamunña. Chaymi manaña pusawaqninchiswanñachu kashanchis.
[26] Chay hinaqa, llapaykichismi Cristo Jesuspi iñikusqaykichispa chawpinta Diospa wawankuna kapunkichis.
[27] Llapallataqmi Cristopi bautisasqa kaqkunaqa, Cristowanña p'achallikapunkichis.
[28] Llapallaykichistaqmi Cristo Jesuspiqa ch'ullallaña kapunkichis. Chayraykun, manaña judío runapas, nitaq griego runapas, nitaq kamachipas, nitaq mana kamachipas, nitaq qharipas, nillataq warmipas kanñachu.
[29] Aswanqa Cristoqñan kapunkichis. Chaymi, promesaman hinaqa, erensia chaskiq hina, cheqapaqpuni Abrahampa mirayninkuna kankichis.