[1] Ichaqa wawqe-panaykuna, tiempokunamantapas, p'unchaykunamantapas manañan imapas qelqamunayqa nesesarioñachu.
[2] Imaynan suwaqa tuta hamun, chay hinallataqmi Señorpa hamunan p'unchaypas kanqa. Chaytaqa qankuna kikiykichismi allintapuni yachankichis.
[3] Maypachachus runakuna nishanqaku: ‘Thak kaypi, hinallataq allinmi kashanchis,’ nispanku, chayllamanmi qonqaylla wañuy ñak'ariyqa chayamunqa. Imaynan onqoq warmiman wachakunan nanay chayamun, chay hinatan paykunaman chay wañuy ñak'ariy chayamunqa. Manataqmi imaynanmantapas ayqekuytaqa atinqakuchu.
[4] Qankunan ichaqa wawqe-panaykuna, manaña laqha-tutayaqpiñachu kashankichis. Chaymi, chay p'unchayqa, mana imaynan suwaqa qonqaylla hap'in, chay hinatachu hap'isunkichis.
[5] Qankunaqa, llapallaykichismi k'anchaypa, hinallataq p'unchaypa wawankuna kankichis. Manan tutayaqpa, nitaq laqha-tutayaqpa wawankunañachu kanchis.
[6] Chay hinaqa, ama wakinkuna hinachu puñushasunchis. Aswanpas rikch'ashallasunchispuni, hinallataq makilla kuidakuq kasunchis.
[7] Puñuqkunaqa tutan puñunku. Hinallataq, machaqkunapas tutan machanku.
[8] Ñoqanchis p'unchaypa kaqkunan ichaqa, korasawan hina, iñiywan, munakuywan ima p'achakunanchis. Qespikuypi suyakuywantaq kaskowan hina, churakunanchis. Chay hinapin makilla kuidakuq kasunchis.
[9] Diosqa, manan k'arak phiñakuypaqchu churawarqanchis. Aswanpas Señorninchis Jesucristoq chawpinta qespikuyman aypananchispaqmi churawarqanchis.
[10] Paymi ñoqanchisrayku wañurqan. Chaymi kawsashasunchisña chaypas, otaq wañukapusunchisña chaypas, paywan kuskallapuni kawsasunchis.
[11] Chay hinaqa, imaynan ruwashallankichispuni, chay hinata hukkuna-hukkunawan sonqochanakuychis. Hinallataq hukkunahukkunawan kallpachanakuychis.
[12] Wawqe-panaykuna, qankunapurapi llank'aqkunatapas, Señorpi umalliqniykichiskunatapas, anyaykuqniykichiskunatapas allinta qhawarinaykichispaqmi balikuykiku.
[13] Paykunataqa llank'asqankurayku, ancha balorniyoqtapuni, hinallataq munakuywanpuni qhawariychis. Hukkuna-hukkunawantaq, thak kaypi kawsaychis.
[14] Chay hinallataqmi wawqe-panaykuna, qellakunata anyaykunaykichispaqwan, chiriyasqakunata kallpachaykunaykichispaqwan balikuykiku. Chay hinallataqmi, pisi-kallpayoqkunatapas yanapaykunaykichispaq, hinallataq llapapaqpas pasiensiayoq kanaykichispaq balikuykiku.
[15] Qhawariychis, ama mayqenpas mana allinmanta, mana allinllawantaq kutichichunchu. Aswanpas hukkuna-hukkunapaqpas, hinallataq llapapaqpas allin kaqllatapuni ruwayta munaychis.
[16] Kusisqallapuni kashay chis.
[17] Ama sayk'uspa Diosmanqa parlashallaychispuni.
[18] Qankunapaq Diospa munayninqa Cristo Jesuspi grasiasta qoynillaykichispunin. Chayrayku, tukuy imapipas Diosman grasiasta qoshallaychispuni.
[19] Santo Espiritutaqa, ama thasnuychischu.
[20] Diospa rantinpi rimaqkunaq rimasqankunataqa, ama pisipaq hap'iychischu.
[21] Aswanpas llapanta t'aqwiychis. Hinaspataq allin kaqta hap'ikuychis.
[22] Tukuy mana allin kaqkunamanta t'aqakuychis.
[23] Kikin thak kay Diostaq, llapallanta hunt'asqapi ch'uyanchasunkichis. Hinan llapallan espirituykichistapas, almaykichistapas, hinallataq aycha kuerpoykichistapas, Señorninchis Jesucristoq hamunankama, mana imamantapas huchachanata waqaychasunkichis.
[24] Waqyaqniykichis Diosqa, hunt'aqpunin. Payllataqmi llapan chaykunatapas hunt'anqa.
[25] Wawqe-panaykuna, ñoqaykupaqpas Diosman parlapullawankikupuni.
[26] Ch'uya much'aykuywan llapallan wawqepanakunata napaykapuwankiku.
[27] Señorninchisrayku, kay qelqata llapallan t'aqasqa wawqe-panakunaman ñawinchakunanpaqmi anchatapuni balikuykichis.
[28] Señorninchis Jesucristoq allinpaq qokuynin qankunawanpuni kachun. Ahinapuni kachun.