[1] Pablopiwan, Silvanopiwan, hinallataq Timoteopiwanmi Tesalónika llaqtapi kashaq iñiq t'aqaman qelqamuykiku. Dios Yayanchispa, hinallataq Señor Jesucristoq allinpaq qokuyninpas, thak kayninpas qankunawanpuni kachun.
[2] Qankunamantaqa, llapallaykichismantan Diosman grasiasta qoshallaykupuni. Diosman parlayniykupiqa qankunamanta yuyarishallaykikupunitaqmi.
[3] Dios Yayanchispa ñawpaqenpi iñiywan ruwasqaykichismanta, munakuypi llank'asqaykichismantaqa yuyarillaykupunin. Hinallataq Señorninchis Jesucristopi pasiensiawan suyakuq kasqaykichistapas, mana sayk'uspaykun yuyarillaykupuni.
[4] Munakusqayku wawqe-panakuna, Diospa akllakusqan kasqay- kichistan yachayku.
[5] Allin willakuyniykuqa, manan rimayllapichu chayamurqasunkichis. Aswanpas atiypi, Santo Espiritupi, cheqaq kaypi iman chayamurqasunkichis. Hinan qankunaqa, imaynatachus qankunaq allinniykichispaq ruwasqaykutapas yachankichis.
[6] Qankunaqa, ñoqaykutawan, Señortawan qatichikuqkunañan kapunkichis. Chaymi may hatun ñak'ariykuna chawpipi Santo Espírituq kusikuyninwan Diospa simintaqa chaskiykuwarqankiku.
[7] Chay hinapin, Masedonia probinsiantinpi, hinallataq Akaya probinsiantinpi iñiqkunaq yachaqakunankupaqraq karqankichis.
[8] Señorpa siminqa, qankunamanta qallarispanmi ch'iqechisqa karqan. Manan Masedonia probinsiapiwan, Akaya probinsiapiwan imallachu, aswanpas Diospi iñikusqaykichisqa tukuy cheqaskunapin uyarikun. Chaymi ñoqaykuq rimarinaykuqa, manaña nesesarioñachu kapun.
[9] Imaynatachus chaskiykuwasqaykikuta, hinallataq, imaynatachus idolokunamanta, kawsashaq cheqaq Diosta serbinaykichispaq kutirikusqaykichistapas paykuna kikinkupunin willakunku.
[10] Hinan, wañusqakunamanta kawsarichimpusqan Churin Jesusta, hanaq pachamanta hamunanta makillapuni suyashankichis. Hamuq k'arak phiñakuymanta qespichiwaqninchisqa paymi.